Elşən Həsənov: “Belə təcrübədən Gürcüstanda istifadə olunub”
“Troyka Dialoq” investisiya şirkətinin keçmiş sahibi, erməni əsilli rusiyalı milyarder Ruben Vardanyan Ermənistan siyasətinə atılmağa və ölkəyə rəhbərlik etməyə hazırlaşır.
Bu haqda Vardanyan özü müsahibəsində bildirib. “Siyasətə qatılmağa hazırlaşırsınızmı” sualına biznesmen belə cavab verib: “Qısa cavab verirəm: hə. Lakin siyasətdə mən hesab edirəm ki, bu suala cavabı sadəcə siyasi partiyadan fərqli olaraq başqa cür verirlər... Mən millətim üçün çəkməçi də olmağa hazıram, təmizlikçi də, rəhbər də”.
O əlavə edib ki, Ermənistanın inkişafına dair çox mühüm suallara cavab tapmağa çalışır:
“Bütün bu suallar biznesmen kimi mənim çərçivəmdən kənara çıxır və adi gündəlik həyatımla uyğun gəlmir. Bu mənada əlbəttə, mən siyasətdəyəm”.
Vardanyan təsdiq edib ki, Ermənistan çox ağır vəziyyətdədir və indi onun müstəqil dövlət kimi qorunub saxlanılması məsələsi çox kəskin dayanıb. Ona görə də belə vəziyyətdə dövlət rəhbəri olmaq üçün çox cəsarətli və riskə getməyə hazır adam tələb olunur.
Erməni əsilli milyarderin bu niyyəti Rusiyanın Paşinyanı dəyişmək planının tərkib hissəsi ola bilərmi?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Rusiya öz ərazisində olan oliqarxlardan daim təzyiq aləti kimi istifadə edir: “Biz belə addımları vaxtilə Azərbaycana qarşı da görmüşük. 2013-cü ildə “Milyarderlər İttifaqı” adlı qurum yaradıb azərbaycanlı əsilli bəzi milyarderləri ora cəmləyib, Azərbaycanla bağlı siyasi iddia ortaya qoymaq istədilər. Ancaq Azərbaycandakı hakimiyyətin monolitliyi buna imkan vermədi. Ermənistanda hazırda vəziyyət gərgindir. Paşinyan Qərbə meyllənmək istəyir. Ona qarşı radikal müxalifətdə olanlar isə müharibə tərəfdarı olan revanşistlərdir. Rusiyaya hər iki variant sərf etmir. Həm revanşistlərin hakimiyyətə gəlməyini istəmir, həm də hakimiyyətin Qərbə meyllənməsini. Belə olan təqdirdə, ən optimal yol, Rusiyadakı varlı erməniləri bu prosesə cəlb etməkdir. Bundan əvvəl erməni əsilli digər rusiyalı milyarder, “Taşir” qrupunun rəhbəri Samvel Karapetyan da Ermənistanda siyasi fəaliyyətə başladığını elan etmişdi. Lakin onun siyasi fəaliyyəti hələlik nəzərə çarpmır. Deməli, bütün bunlar təsadüfi deyil və Rusiyanın nəzarəti altında baş verir. Ermənistan əhalisi də varlı adamlara inanır. Belə təcrübədən Gürcüstanda istifadə olunub. Rusiyaya yaxın milyarder İvanaşvili Moskvanın dəstəyi ilə Qərbin adamı olan Saakaşvilini devirib, hakimiyyətə gələ bildi”.
Məhəmmədəli QƏRİBLİ
