Əliyev Azərbaycanı Rusiya üçün daha strateji tərəfdaş kimi təqdim etdi, nəinki Paşinyan Ermənistanı...
“Biz ikitərəfli formatda çox məsələləri həll etmişik və bu gün münasibətlərimizi strateji tərəfdaşların münasibətləri kimi səciyyələndiririk”. Bunu Prezident İlham Əliyev Soçidə Rusiya Prezidenti Vladimir Putinlə ikitərəfli görüşü zamanı deyib.
Dövlət başçısı bildirib ki, bu il ərzində biz çox fəal dialoq aparmışıq: “Həm görüşmüşük, həm də tez-tez telefonla danışmışıq. İkitərəfli münasibətlərimizin inkişaf dinamikası bizi çox sevindirir. Biz ikitərəfli formatda çox məsələləri həll etmişik və bu gün münasibətlərimizi strateji tərəfdaşların münasibətləri kimi səciyyələndiririk. Bu, sadəcə söz birləşməsi deyil, həqiqətən belədir və bütün istiqamətlər üzrə qarşılıqlı münasibətlərimizin səviyyəsini daha da yüksəltmək əzmindəyik. Sizin qeyd etdiyiniz kimi, əmtəə dövriyyəsi artır. İqtisadi sahədə əməkdaşlığa, o cümlədən biznes dairələri arasında qarşılıqlı maraq çox güclüdür. Əlbəttə, münasibətlərimizin çoxlu sahələri ehtiva etməsi bizi çox sevindirir. Hazırda biz iqtisadiyyatın, nəqliyyatın əksər sahələrinə, humanitar əməkdaşlığa aid 7 yol xəritəsini reallaşdırırıq”.
Görünən odur ki, Azərbaycanla Rusiya əlaqələri müxtəlif sahələrdə daha da genişlənir. Ermənistan Rusiya ilə strateji müttəfiq olsa da iki ölkə arasında bu səviyyədə əlaqələr yoxdur.
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, iki ölkə münasibətləri ilə bağlı Prezidentin səsləndirdiyi fikirlər reallığı əks etdirir: “Pandemiyanın zəifləməsindən sonra Azərbaycan-Rusiya iqtisadi əlaqələri genişlənir. Əmtəə dövriyyəsi artır, biznes əlaqələri genişlənir. O cümlədən, digər sahələrdə əlaqələr qurulur. Bu ondan irəli gəlir ki, Azərbaycan qonşularla münasibətlərin bərabər tərəfdaşlıq çərçivəsində qurulmasına xüsusi önəm verir. Azərbaycan regionda önəmli bir coğrafi məkanda yerləşməklə yanaşı, ciddi potensiala malikdir. Rusiya da bütün bunların fərqində olduğu üçün ölkəmizlə əlaqələrin inkişafına xüsusi diqqət ayırır. Ermənistan Avrasiya İqtisadi İttifaqında təmsil olunsa da Rusiya ilə bu cür geniş əlaqələr qura bilməyib. Baxmayaraq ki, iki ölkə arasında strateji müttəfiqlik sazişi var. Çünki Nikol Paşinyanın apardığı siyasət real əsaslara, strateji müttəfiqlik münasibətlərinə söykənmir. Özünü strateji müttəfiq hesab edən ölkə rus dilini sıxışdırmaz, rusafobiyaya geniş meydan verməz və s.”.
Ekspert hesab edir ki, münasibətlərin yüksələn xətt üzrə inkişafı Azərbaycanın maraqlarına cavab verir.
Vidadi ORDAHALLI
