Paşinyanı Putinin yanında “Azərbaycan bizim əraziyə soxulub” kimi yalanlara kim(lər) həvəsləndirir?..

img

Ermənistanın baş naziri Nikol Paşinyan yalan danışmaqdan nə usanır, nə də bezir. Noyabrın 26-da Soçidə Azərbaycan Respublikasının Prezidenti İlham Əliyev, Rusiya Federasiyasının Prezidenti Vladimir Putin və Ermənistan Respublikasının baş naziri Nikol Paşinyan arasında keçirilən üçtərəfli görüş zamanı Paşinyan yenə də yalan danışıb:

“Bu il mayın 12-dən bəri Ermənistan-Azərbaycan sərhədində faktiki olaraq böhranlı vəziyyətdir və bizim rəyimiz belədir ki, Azərbaycan qoşunları Ermənistanın suveren ərazisinə soxulub. Əlbəttə, Ermənistan və Azərbaycan arasında sərhədlər delimitasiya və demarkasiya edilməyib, lakin dövlət sərhədi mövcuddur və bu, Ermənistan Respublikasının suveren ərazisidir...”

Bu görüşdə Paşinyan  “Azərbaycan qoşunları Ermənistanın suveren ərazisinə soxulub” deməklə yalan danışdı.

Paşinyan Putinin yanında bu yalanı nəyə arxayın olaraq sərbəst deyir?

AMEA-nın Fəlsəfə və Sosiologiya İnstitutunun aparıcı elmi işçisi, siyasi şərhçi, tarix üzrə fəlsəfə doktoru, dosent Faiq Ələkbərli baki-xeber.com-a bildirdi ki, Paşinyan Putinin onun yalanlarına göz yumacağına arxayın olaraq yalan söyləyib. F.Ələkbərlinin sözlərinə görə, Azərbaycan qoşunlarının Ermənistan ərazisinə daxil olmadığını Putin də yaxşı bilir, sadəcə buna göz yumur. “Paşinyan bilir ki, Putin onun yalanlarına əhəmiyyət verməyəcək,  buna görə də növbəti dəfə yalançılığından qalmadı. Putin də bilir ki, Paşinyanın bu açıqlaması yalan olmaqla yanaşı həm də çox gülməlidir. Çünki dünənə qədər Azərbaycanın ərzilərini işğal altında saxlayan, suveren ərazilərimizə qarşı işğalçılıq siyasəti aparan və uzun illər bu işğalçılıq siyasətini davam etdirən Ermənistan olub. Bunu bütün dünya bilir. Paşinyan hansı əsaslarla Azərbaycana qarşı əks arqumentlər irəli sürür? Bu əlbəttə, heç bir məntiqə sığışmır, çünki Azərbaycan nəinki suveren Ermənistan ərazisinə daxil olub, əksinə Azərbaycan hələ də öz tarixi ərazilərinin, torpaqlarının bir qismini bərpa etməyib. Hələ Azərbaycan BMT-nin müstəqil Azərbaycan ərazisi kimi tanıdığı əraziləri bərpa etmək istəyir. Əgər Azərbaycan 1918-1920-ci il xəritəsinə qayıtsa, o dövrün gerçəkliklərinə istinad etsə, onda sözün həqiqi mənasında Ermənistandan əsər-əlamət qalmaz. Yəni əslində  Paşinyanı qorxudan məqamlardan biri bu tarixi gerçəklikdir. Bu mənada “suveren Ermənistan”dan bəhs edib. O yaxşı bilir ki, Ermənistan yarananda 9 min kvadrat kilometr ərazidə yaranıb, geridə qalan ərazilər isə işğalçılıq siyasəti və Sovet Rusiyasının Azərbaycana etdiyi təzyiqlər nəticəsində Ermənistana verilib və onun ərazisi də 30 min kvadrat kilometrə qədər artıb. Mənə elə gəlir ki, Paşinyan çox narahatdır və qorxduğu üçün də çarəni yenə də yalan danışmaqda görüb. Çünki Paşinyanın yalan danışmaqdan başqa çarəsi olmayıb, Putin də bunu bildiyi üçün bu yalana göz yumub”. 

F.Ələkbərlinin fikrincə, Paşinyan hakimiyyətinin özü tikan üstə oturub və onlar yaxşı bilir ki, delimitasiya və demarkasiya işində beynəlxalq hüquq qaydaları işə salınarsa Ermənistanın varlığı yalnız 9 min kvadrat kilometrlə məhdudlaşmalıdır. “Paşinyan hökuməti isə Ermənistanın varlığını 30 min kvadrat kilometrlə qoruyub saxlamaq istəyir. Paşinyan  əlinə keçən fürsətdən istifadə edərək yalan danışıb bu yalana da Rusiya prezidenti şərait yaradıb. Putin yaxşı bilir təcavüzkar da, qonşularına qarşı ərazi iddiası irəli sürən də, təhdidlər edən də hansı ölkədir”.

F.Ələkbərli hesab edir ki, Azərbaycan BMT tərəfindən tanınan 86. 6 min kvadrat kilometrlik  ərazisini tam nəzarəti altına götürməlidir. “Paşinyan nə edirsə etsin bu mütləq gerçəkləşəcək. Bundan sonrakı mərhələdə də Ermənistan özünü beynəlxalq hüquqa, beynəlxalq konvensiyalara uyğun aparmasa onda Azərbaycan Cümhuriyyət dövründəki torpaqlarına sahib çıxmaq hüququnu tam özündə saxlayır” - deyə F.Ələkbərli qeyd etdi.

İradə SARIYEVA 

Son xəbərlər