Paşinyanın müəllim-səfirini Bayden 4 aydır qəbul etmir... Niyə?..

Yeganə Hacıyeva: “Paşinyan öz ailə dostu və müəllimini ABŞ-a səfir göndərib”

img

Erməni KİV-i Paşinyanın diplomatiya sahəsindəki uğursuz kadr təyinatlarını ciddi tənqid edir. Xüsusilə də ixtisasca müəllim olan yeni səfir Makuntsun etimadnsməsini 4 aydır prezidentə təqdim edə bilməməsi böyük qınağa səbəb olub.

Sitat: “Ola bilsin ki, Makuntsın Vaşinqtonda qaldığı 4 aya yaxın müddətdə fəaliyyətini daha dəqiq xarakterizə etmək çətindir. Təkcə onu demək kifayətdir ki, o, bugünə kimi etimadnaməsini ABŞ prezidentinə təqdim etməyib. Bunu onunla izah edirlər ki, pandemiyaya görə Bayden real həyatda görüşlər keçirmir, ona görə də məktublar poçtla göndərilib”.

Vurğulanır ki, Ağ Evin saytında ABŞ prezidentinin olduqca intensiv və gündəlik keçirdiyi görüşlərlə bağlı mesajlar kifayət qədərdir. Məqalədə daha sonra deyilir: “Makunts Dövlət Departamentində hələ də qəbul edilməyib, prosedura uyğun olaraq səfir etimadnaməsinin surətini oradan alaraq işə başlayır. Şayiələrə görə, xanım sadəcə ora dəvət olunmayıb. Təəccüblüdür ki, onun Amerikanın yüksək vəzifəli şəxsləri ilə təmas dairəsi indiyədək əsasən konqresmenlərlə – Ermənistan Qrupunun ənənəvi üzvləri ilə məhdudlaşır.

Bəli, vaxtilə Vaşinqton Makuntsun təyin edilməsi üçün razılıq vermişdi. Amma Amerika administrasiyasının faktiki məlumatsızlığı ölkəyə münasibətdən belə xəbər vermir, daha doğrusu, zərrə qədər diplomatik iş təcrübəsi və müvafiq biliyi olmayan müəllimin təyinatına münasibətdir. Səfirin rütbəsi və peşəkarlığı bu dövlətin qəbul edən ölkəyə hörmət dərəcəsini göstərir, onun əhəmiyyətini və rolunu vurğulayır”.

Politoloq Yeganə Hacıyeva “Bakı-Xəbər”ə açıqlamasında bildirdi ki, Nikol Paşinyanın idarəetmə siyasəti daha çox səriştəsiz kadrların yerdəyişməsilə yadda qalıb: “Maraqlı bir rəqəmi nəzərinizə çatdırmaq istərdim. Paşinyan vəzifədə olandan indiyə kimi sayca 39-cu naziri dəyişib. Ən strateji sahə olan müdafiə nazirliyinə son bir ildə 3 nazir təyinatı reallaşdırıb. Başqa bir missal. Son seçkilərin ərəfəsində Ermənistanın böyük vilayətlərindən birinə ali təhsili belə olmayan bir kadrı rəhbər təyin etdi. Həmin adamın əvvəlki işi yanacaqdoldurma məntəqəsində operatorluq olmuşdu. Səriştəsiz kadr siyasəti özünü həm də xarici siyasətlə bağlı sahələrdə göstərir. Xüsusilə də səfir təyinatlarında. Son illər ərzində xarici ölkələrə təyin edilən səfirlərin bir çoxunun ümumiyyətlə diplomatik sahə ilə heç bir bağlılığı olmayıb.  Barəsində söz açılan Makunts Paşinyanın həyat yoldaşı Anna Akopyanın rəfiqəsi, həm də baş nazirin ingilis dili müəllimidir. Yəni Paşinyan öz ailə dostu və müəllimini ABŞ-a səfir göndərib. Ermənistanın xaricdə oturuşmuş lobbi təşkilatları olduğu üçün, xarici siyasətlə bağlı fəaliyyəti səfirlərdən daha çox onlar həyata keçirir. Son vaxtlar isə  bu siyasəti kriminal-lobbi qrupları nəzarətə alıb. ABŞ-la bağlı da vəziyyət eynidir. Çünki ermənilərin ən güclü diasporu məhz həmin ölkədədir. Təbiidir ki, Bayden administrasiyası bundan xəbərdardı. Bu səbəbdən də Ermənistanın göndərdiyi qadın səfirin personasına belə qeyri-ciddi yanaşırlar”.

Məhəmmədəli QƏRİBLİ

Son xəbərlər