Fikrət Sadıqov: “Türkiyə şərtsiz Ermənistanla sərhədləri açmaz və Kreml Ankaranı buna məcbur edə bilməz”
Rusiya Xarici İşlər Nazirliyinin sözçüsü Mariya Zaxarova bildirib ki, Rusiya Ermənistandan Türkiyə ilə münasibətlərin normallaşdırılması üçün vasitəçilik təkilifi alıb və ölkəsi bununla bağlı yardım göstərməyə hazırdır:
“Ermənistan-Türkiyə münasibətlərinin normallaşdırılması regionda vəziyyətin sağlamlaşdırılmasına xidmət edəcək. Rusiya buna kömək etməyə hazırdır. Ölkəmiz bundan sonra da buna hər cür yardım göstərməyə hazırdır. Bu prosesin başlanması, şübhəsiz ki, regionda vəziyyətin ümumi sağlamlaşmasına və mehriban qonşuluq, etimad mühitinin formalaşmasına səbəb olardı ki, bu da indi xüsusilə aktualdır”.
M.Zaxarova onu da qeyd edib ki, hər hansı praktiki məqamlar yarandığında, Xarici İşlər Nazirliyi bu barədə məlumat verəcək. Təbii ki, prosesin həssaslığı nəzərə alınmaqla informasiya ona zərər vurmayacaqsa.
Maraqlıdır, Rusiya Türkiyəni məcbur edə bilərmi Ermənistanla sərhədi qeyid-şərtsiz açsın? Məsələn, Zəngəzur dəhlizinin açılması şərtini irəli sürməsin? Nəzərə almaq lazımdır ki, Ərdoğan sərhədlərin açılmasının Zəngəzur dəhlizinin açılmasından keçdiyini bəyan edib. Bu günlərdə Ermənistanın xarici işlər naziri Ararat Mirzoyan da xarici mətbuata açıqlamasında eyni məzmunlu fikirlər səsləndirib: “Türkiyə Ermənistanla münasibətlərin qurulması üçün yeni şərtlər qoyur. Onların arasında Zəngəzur dəhlizi də var”.
O baxımdan ekspertlər bunu necə dəyərləndirir?
- “... destruktiv mövqe sərgiləməklə nəyəsə nail ola bilməyəcəklər”
Məsələyə münasibət bildirən sabiq diplomat, politoloq Fikrət Sadıqovun fikrincə, qeyd-şərtsiz Türkiyə-Ermənistan sərhədlərinin açılması mümkünsüzdür: “Ümumilikdə, sözügedən məsələ ilə bağlı zaman-zaman müxtəlif bəyanatlar verilir. Ancaq belə bəyanatların bəzilərinin arxasında heç bir məna yoxdur. Söhbət yalnız regionda atılan real addımlardan getməlidir. Türkiyə şərtsiz Ermənistanla sərhədləri açmaz və Kreml Ankaranı buna məcbur edə bilməz. Nə Zaxarova, nə də onun naziri Lavrov bu reallığı dəyişə bilər. Çünki Türkiyə əvvəldən bəyan edib ki, bir sıra məsələlərin həllindən sonra Ermənistanla münasibətlər qurula bilər. Onların içində Zəngəzur dəhlizi məsələsi də var. Türkiyə heç vaxt Ermənistanın nazı ilə oynamayacaq. Rusiyanın vasitəçilik etməsi o demək deyil ki, Türkiyə Ermənistanla sərhədləri qeyd-şərtsiz açmalıdır. Ermənistan sərhədlərin açılmasını istəyirsə, o zaman 10 noyabr bəyanatında qeyd edilən məqamlara əməl etməlidir. Yoxsa destruktiv mövqe sərgiləməklə nəyəsə nail ola bilməyəcəklər”.
Politoloq onu da əlavə etdi ki, Ermənistan vaxtı uzatmaqla da nəyəsə nail ola bilməyəcək.
Vidadi ORDAHALLI
