Almaniya hökuməti azərbaycanlı qanunsuz miqrantlarla daha "prinsipual " davranır - 20 nəfəri də ölkədən çıxarır…
Almaniyada qanunsuz yaşayan və sığınacaq üçün müraciətləri rədd edilərək, barələrində deportasiya qərarı çıxarılan 20-yə yaxın Azərbaycan Respublikası vətəndaşı deportasiya ediləcək. Artıq bir neçə gündür ki, Almaniyanın Şimali Reyn Vestfaliya əyalətində yaşayan azərbaycanlılar Düsseldorf şəhər hava limanı yaxınlığındakı deportasiya mərkəzinə gətirilir.
Koronavirus testi verən azərbaycanlıların cümə günü gecə saatlarında çarter reysi ilə Azərbaycana deportasiya edilməsi gözlənilir. Deportasiya olunanların əksəriyyəti 2018-2020-ci illərdə Almaniyaya qaçqın statusu almaq üçün gedən, yerli məhkəmələrdən rədd cavabı alan və indiyə kimi ölkəni könüllü tərk etməyən şəxslərdir. Almaniya Miqrasiya və Qaçqınlarla iş üzrə Federal İdarənin məlumatına görə, bu ilin 9 ayı ərzində 407 Azərbaycan Respublikası vətəndaşı sığınacaq istəyib. Onlardan 259 nəfərin ərizəsi rədd edilib və barələrində ölkəni könüllü tərk etmələri üçün yerli məhkəmələr tərəfindən qərar çıxarılıb.
Qeyd edək ki, analoji statusda olan azərbaycanlı miqrantlar başqa Avropa ölkələrində də var. Maraqlıdır, niyə həmin ölkələr bu məsələdə Almaniya kimi prinsipiallıq ortaya qoymur?
Hüquq müdafiəçisi Sahib Məmmədov “Bakı-Xəbər”ə açıqlamasında bildirdi ki, Azərbaycanla Avropa İttifaqı və İsveçrə arasında qanunsuz miqrantların readmissiyası (Readmissiya dedikdə, saziş üzrə razılığa gələn dövlətlərdən birinin ərazisinə qeyri-qanuni daxil olduğu, qaldığı və ya yaşadığı aşkarlanan şəxslərin həmin dövlət tərəfindən göndərilməsi və mənşə dövlət tərəfindən qəbulu nəzərdə tutulur-red.) ilə bağlı saziş imzalanıb: “Həmin sazişə görə, Avropa İttifaqının istənilən dövləti Azərbaycan vətəndaşlarını və ya bizim ölkənin üzərindən ora daxil olmuş üçüncü ölkə vətəndaşlarını readmissiya edə bilər. Bu prosesin əksini Azərbaycan da Avropa İttifaqından bura gələnlərlə bağlı tətbiq edə bilər. Bu, beynəlxalq normanın tələbidir. Almaniyanın daha fəal olmasının bir sıra səbəbləri var. Çünki Almaniya ən çox miqrant qəbul edən ölkədir. Həmin ölkə miqrant probleminin girdabında çabalayır. Tanıdığım bir çilingər yaxınlaşıb məndən soruşurdu ki, “mqo nədir?” Sonradan başa düşürəm ki, bu “nco”, yəni qeyri hökümət təşkilatı demək istəyir. Deyirdi ki, Almaniyaya köçmək üçün ondan qht-sinin olmasını istəyiblər. Bir sözlə, hər yerindən duran siyasi mühacir və ya gey adı ilə həmin ölkələrə üz tutdu. Ən çox da Almaniyanı seçirlər. Onu da deyim ki, bu təkcə Azərbaycanla bağlı olan məsələ deyil. Kimlə readmissiya sazişləri varsa, hamısına bunu tətbiq edirlər. Müəyyən olunanda ki, saxta sənəd əsasında gəliblər, həmin adamları ölkədən çıxarırlar. Ancaq heç də bütün saxta sənədlərlə gedənlərin hamısını ölkədən çıxarmırlar. Mən heç xatırlamıram ki, kimsə Almaniyaya həqiqətən təqib olunduğu üçün gedib. Almaniyanın da readmissiyasında selektivlik var. Belə adamların çoxuna vəkilləri məsləhət görür ki, başlayın öz hökumətinizi söyməyə. Bu yolu seçənləri, sənədləri saxta olsa belə, ölkədən çıxarmırlar. Almaniya Avropanın ərazisinə və iqtisadiyaytına görə ən nəhəng ölkəsidir. Buna görə də, miqratlar daha çox ora üz tutur. Belarus sərhədində olanlar başqa ölkənin adını çəkmir, yalnız Almaniyaya getmək istədiklərini bəyan edirlər”.
Məhəmmədəli QƏRİBLİ
