Tehran Şəhər Şurası Şimali Azərbaycanın şəhər-qəsəbə adları ilə bağlı nə plan qurur?..

Bünyamin Qəmbərli: “Azərbaycan cəmiyyəti və Azərbaycan höküməti İranın hər cür təxribatlarına hazır olmalıdır”

img

Cənubi Azərbaycandakı mədəni fəalların “Facebook”da etdikləri paylaşıma istinadən “Teleqram”da yayılan məlumatlara görə, Tehranda küçələrə "Badikubə”, “Şuşi”, “Nardan” adları verilib.

Məlumata əsasən, Tehran Şəhər Şurası Azərbaycan Respublikasının bir sıra şəhərlərinin adlarını təhrif edib və saxtalaşdırıb. Şuranın qərarı ilə  paytaxtda bəzi keçidlərin adları yeni erməni adları ilə dəyişdirilib. Şuranın saytında, bununla yanaşı, bır sıra kənar küçələrə Azərbaycan şəhərlərinin adlarının təhrif olunmuş forması - “Badikubə”, “Şuşi”, başqa bir keçidə isə “Nardan” adı verilib.

İki kiçik küçəyə isə “Aran” və “Lənkəran” adlarının verildiyi qeyd edilib.

Tehranın burada da haypərəst mövqedən çıxış etdiyi ortaya çıxır.

Şuşi nə deməkdi, Şuşa adlandıra bilməzdilər, yaxud Nardan əvəzinə Nardaran adlandırmaq olmazdı?

Tehran Şəhər Şurası Şimali Azərbaycanın şəhər-qəsəbə adları ilə bağlı nə plan qurur?..

  • İran da hayların saxtalaşdırma hərəkətlərinə dəstək verir və Şuşanı “Şuşi” kimi təqdim edir, bununla da ermənipərəst mövqeyini bir daha ortaya qoyur”

Sabiq deputat, tarixçi Bünyamin Qəmbərli “Bakı-Xəbər”ə şərhində bildirdi ki, İran rejimi Quzey Azərbaycanla bağlı mütəmadi olaraq təxribatçı addımlar atır. “İranın Quzey Azərbaycanla bağlı həyata keçirdiyi deyilən təxribatlar nə ilkdir, nə də son. Bu, Güney Azərbaycanda baş verən proseslərin böyük əksəriyyətinin quzeydəki siyasi partiyalar, QHT-lər,  KİV, ictimai fəallar və hakimiyyət tərəfindən laqeyd qarşılanmasının nəticəsidir ki, belə hallar baş verir. Çoxlarının Güney Azərbaycanın daxilində gedən proseslərdən xəbəri yoxdur. Bu təxribat isə daha çox ona görə diqqəti çəkir ki, birbaşa Quzey Azərbaycanla bağlıdır. Amma Güney Azərbaycanla bağlı o qədər ciddi proseslər gedir ki,  Şimali Azərbaycanda buna tamam laqeyd yanaşılır”. Şərqi Azərbaycan ostanının parçalandığını deyən B.Qəmbərlinin sözlərinə görə, rejim Azərbaycanı parçalamağa, bölməyə və maksimum dərəcədə kiçiltməyə, Azərbaycan adını sıradan çıxarmağa çalışır. Şərqi, yaxud qərbi Azərbaycan ostanını artıq Azərbaycan yox, Təbriz, Urmiya, yaxud Ərdəbil kimi adlandırırlar, məqsəd odur ki, Azərbaycan sözü, Azərbaycan adı ilə bağlı hər şey, yer adları, toponimlər, oykonimlər və sair sıradan çıxarılsın, unudulsun. Bunlarla bərabər Azərbaycan ərazilərində kürdlərin yerləşdirilməsi, Urmiya gölünün quruludulması, Azərbaycan tarixi, arxeoloji, memarlıq abidələrinin uçurdulub dağıdılması kimi təxribatlar, xoşagəlməz hallar İran rejimi tərəfindən Güney Azərbaycanda həyata keçirilir. “Bütün bunlar isə qüzeydə susqunluqla qarşılanıb. Son hadisələrə də ona görə həssaslıqla yanaşılır ki, bu təxribatlar Azərbaycanın qüzeyi ilə əlaqədardır. Burada təəccüblü bir şey yoxdur, çünki İran rejimi açıq-açığına Azərbaycanla bağlı təxribatlarını davam etdirir. Bilirsiz ki, ermənilər Şuşa adını təhrif edərək, erməniləşdirmək məqsədilə ona “Şuşi” deyir. İran da hayların saxtalaşdırma hərəkətlərinə dəstək verir və Şuşanı “Şuşi” kimi təqdim edir, bununla da ermənipərəst mövqeyini bir daha ortaya qoyur. Bu da İran rejiminin birbaşa ermənilərə xidmət etməklə, erməni sevgisi ilə və Azərbayvana nifrətlə bağlıdır. Bakı sözünü “Badikübə” kimi yazmaqla bunu güneydəki soydaşlarımız üçün bir az anlaşılmaz edirlər ki, Bakı sevgisi sıradan çıxsın. Görürsüz Nardarana ad verirlər? Niyə? Çünki onların dini baxımdan Nardarana bağı daha çoxdur. Halbuki, orada Gəncə və başqa şəhərlərimizin adına da küçə verə bilərdilər. Amma bunlar hər zaman panfarsizmin, paniranizmin maraqlarını güdürlər. Yəni harasa Şimal Azərbaycana aid olan bir şəhərin, məkanın adını verirlərsə, bu, Azərbaycana sevgidən qaynaqlanmır və onların dini-ideoloji baxımdan bağlı olduqları, eyni zamanda da Azərbaycana verdikləri meajlarla bağlıdır. Üstəlik onu da deyim ki, bunların hamısı sadəcə başlanğıcdır. Azərbaycan dövləti İrandan hər hansı formada bir dostluq görə bilməz, bu onların təbiətinə ziddir. İran Azərbaycan adında müstəqil dövlətin olmasını həzm və qəbul edə bilmir, bununla barışmır, ona görə də Azərbaycan cəmiyyəti və Azərbaycan höküməti İranın hər cür təxribatlarına hazır olmalıdır”- deyə B.Qəmbərli qeyd etdi.

İradə SARIYEVA

Son xəbərlər