Qərb dövlətləri, ABŞ başda olmaqla, əvvəlki kimi Rusiyanın şaxtalar düşəndə Ukraynaya qarşı genişmiqyaslı hücum əməliyyatlarına başlayacağını bildirir. Belə bir vaxtda diqqət çəkən məqamlardan biri Qərbin Ukrayna ərazisində və Qara dənizdə aktiv şəkildə hərbi qüvvə cəmləşdirməsidir.
Yayılan məlumata əsasən, ABŞ Rusiyanın sərhədboyu qoşun cəmləşdirməsini nəzərə alaraq, Ukraynaya hərbi müşavirlər və yeni avadanlıqlar, o cümlədən silahlar göndərməyə hazırlaşır. Birləşmiş Ştatlar Ukraynaya tank əleyhinə “Javelin” raket komplekslərinin yeni partiyasını, “Stinger” daşınan zenit-raket komplekslərini göndərməyi planlaşdırır. Pentaqon israr edir ki, Əfqanıstan üçün nəzərdə tutulmuş bəzi avadanlıqlar, o cümlədən “Mi-17” vertolyotları Ukraynaya göndərilsin. “The Mirror” qəzeti isə yazır ki, Böyük Britaniya da Ukraynaya Rusiyanın gözlənilən müdaxiləsinin qarşısını almaq üçün hərbi dəstək göndərməyə hazırlaşır. Nəşrin yazdığına görə, Böyük Britaniya 600-ə qədər xüsusi təyinatlı döyüşçünü Ukraynanın köməyinə göndərməyə hazırdır. Situasiya ilə tanış olan mənbələr nəşrə deyiblər ki, Böyük Britaniya Silahlı Qüvvələrinin Baş qərargah rəisi Nik Karter Rusiya ilə Qərb arasında Ukraynadan başlayacaq müharibə risqinin çox yüksək olduğu qənaətindədir. Mənbələr deyiblər ki, Britaniya komandanlığı Ukraynanın köməyinə Xüsusi Hava Xidmətinin döyüşçülərini, tibb personalını, mühəndisləri, rabitəçiləri, 16-cı hava-hücum briqadasından 400-ə yaxın hərbi qulluqçunu göndərməyə hazırlaşır. Onları ilk zərurət halında Ukrayna ərazisinə çatdıracaqlar. Britaniya xüsusi təyinatlıları bu missiya haqda xəbərdar ediliblər, onların avadanlıqları isə təcili nəql olunmaq üçün qablaşdırılıb. Mənbə onu da bildirib ki, xüsusi təyinatlıların hazırlanması barədə qərar Böyük Britaniyanın Müdafiə Nazirliyinin yüksək vəzifəli nümayəndələrinin və MI6 xarici kəşfiyyat xidmətinin direktoru Riçard Murun hökumətə Kremlin Ukraynaya müdaxilə planlarının tamamilə ciddi olduğu barədə məruzələr təqdim etməsindən sonra qəbul edilib. MI6 direktoru bildirib ki, Rusiya və onun rəhbərliyi təkcə Ukrayna üçün deyil, bütün Qərb üçün real və aşkar təhdid təşkil edir.
“Globe and Mail” qəzeti isə qeyd edir ki, Kanada hökuməti də Ukraynadakı hərbi kontingentini gücləndirmək üçün müxtəlif variantları nəzərdən keçirir. Məlumata görə, Kanadanın milli müdafiə naziri təyin edilmiş Anita Anand hazırda belə bir təklifi nəzərdən keçirir. Mövcud kontingenti gücləndirmək üçün bir neçə variant var: Ukraynaya bir neçə yüz hərbi qulluqçu göndərmək, Rumıniyadan bu ölkəyə Kanadanın CF-18 qırıcılarını köçürmək, Kanada Hərbi Dəniz Qüvvələrinin hərbi gəmisini Qara dənizə göndərmək. Qeyd edək ki, 2015-ci ildən Kanada Silahlı Qüvvələri Ukraynanın Lvov vilayətindəki Yavoriv poliqonunda əsgər və zabitlərə təlim keçir. Missiyaya təxminən 200 kanadalı hərbçi daxildir. 2019-cu ilin martında Kanada hökuməti Ukraynadakı missiyanın müddətini 2022-ci ilin yazına qədər uzatmaq qərarına gəlib. Qeyd edilənlərə paralel olaraq ABŞ, Britaniya Qara dənizə hərbi gəmilər cəmləşdirir. Bu fonda Ukraynanın müdafiə və təhlükəsizlik Şurasının katibi Aleksey Danilov “Ukrinform” rəsmi xəbər agentliyinə müsahibəsində deyib ki, Qərb dövlətləri Rusiyanın hərbi təcavüzü qarşısında Ukraynanı tək qoymayacaq: “Hamı başa düşür ki, nə baş verir. Tərəfdaş ölkələr Ukraynadakı situasiya ilə bağlı məlumatlandırılıb və Putin müdaxilə qərarı verərsə, Rusiyanın hücumu zamanı Ukraynanı tək qoymayacaqlar”. Danilovun sözlərinə görə, Kremldə hələlik belə addıma gedib-getməmək barədə tərəddüd edirlər, amma Kiyev hadisələrin istənilən inkişafına hazırdır və Qərbin dəstəyini qazanıb: “Sirr deyil ki, biz kəşfiyyat məlumatları ilə mübadilə edirik. Naməlum olan yeganə məsələ budur - Putin hücum edəcəkmi, edəcəksə nə vaxt? Əgər “X” məqamı yetişsə, tərəfdaşlar Ukraynaya maksimal hərbi yardım edəcəklər”. NATO ölkələrinin Ukraynada fəallaşması, bura ordu qüvvələri cəmləşdirməsi Rusiyada kəskin reaksiya doğurur. Vladimir Putinin ən yaxın müşavirlərindən biri olan Rusiya Xarici Əlaqələr Şurasının idarə heyətinin rəhbəri Fyodor Lukyanov bu xüsusda bildirib ki, Ukraynada Şimali Atlantika Alyansı addımlarını davam etdirərsə, bu ölkəni öz sıralarına qəbuıl edərsə, Moskva Ukraynaya qarşı hərbi əməliyyatlara başlayacaq. Britaniyanın “The Telegraph” nəşrinin yazdığına görə, Lukyanov NATO-nun daha da Şərqə doğru irəliləməsinin Rusiya ilə qaçılmaz münaqişəyə səbəb olacağını da vurğulayıb: "Rusiya sistemi dəyişməli və yeni qırmızı xətlər çəkməli olacaq". Qeyd olunur ki, elə bu səbəbdən ABŞ və Avropa Rusiyanın hərbi müdaxiləsi təhlükəsi qarşısında Ukraynaya əlavə hərbi yardım göstərmək üçün danışıqlar aparır.
Bu arada “İzvestiya” Rusiya ordusunun Krıma TOS-1A “Solntsepek” və daha müasir TOS-2 “Tosoçka” ağır odsaçan komplekslərinin göndəriləcəyini yazır. Qəzetin yazdığına görə, Rusiya Cənub Hərbi Dairəsində bu komplekslərlə silahlanmış üç yeni batalyon yaradılır, onlar Ukrayna ilə sərhəddə və Krımda yerləşdiriləcək. Rusiya mediasının yazdığına görə isə, ölkənin Baş qərargahındakı mənbə Kiyevin Donbası “zəbt etmək” planını açıb. Mənbənin iddiasına görə, Azərbaycanın ötən il Qarabağda istifadə etdiyi hücum ssenarisi əsasında Ukrayna ordusunun Donbas üzərinə sürətli hücuma başlaması təhlükəsi var. Hücumun dekabrın sonlarında - yanvarın əvvəllərində, Yeni il bayramı fonunda başlayacağı iddia edilir. Mənbə iddia edib ki, Ukrayna qoşunlarının qarşısına qoyulmuş vəzifə Donetsk və Luqansk “xalq respublikalarının” dərinliklərində mövqelər tutaraq onları əldə saxlamaq, yerli əhali arasında “təmizləmə” aparmaqdır.
Ramil QULİYEV
