Baş nazir Nikol Paşinyanın noyabrın 23-də keçirdiyi onlayn mətbuat konfransında səsləndirdiyi fikirlərlə bağlı Ermənistanda yeni siyasi qalmaqal qopub. Burada müxalifət Paşinyanın səsləndirdiyi fikirlərdən istifadə edərək, baş nazirə qarşı daha aqressiv mövqe sərgiləməyə can atır.
Həmin mətbuat konfransında Paşinyan bildirmişdi ki, noyabrın 26-da Azərbaycan lideri ilə keçiriləcək görüşdə hər hansı sənəd imzalanarsa, bu yalnız delimitasiya və demarkasiyanı həyata keçirəcək komissiyanın təşkili və formatı barədə olacaq. Paşinyan burada Ermənistanın üzləşdiyi təhlükəsizlik çətinliklərinə də toxunmuşdu. Baş nazir dəfələrlə etiraf etmişdi ki, “biz hazırda minalanmış sahədən keçirik və çox ehtiyatlı olmalıyıq”. Bu fonda Ermənistanın keçmiş prezidenti Serj Sarkisyana bağlı “Şərəf duyuram” müxalifət fraksiyasının deputatı Ayk Mamicanyan qeyd edir ki, Paşinyan onun bəyanatlarını təkcə daxili auditoriyanın eşitmədiyini unudur. Deputat bildirib ki, baş nazirin iki saat davam edən mətbuat konfransında səsləndirdiyi fikirlər Ermənistanın mövqeyini daha da zəiflədib: “Sualların əvvəlcədən göndərildiyi nəzərə alınarsa, onun suallarla tanış olmaq üçün vaxtı olub. Suallar qruplaşdırılmışdı. O, sadəcə olaraq, tənbəl şagird kimi ev tapşırığını yerinə yetirməyib”. Mamicanyan xatırladıb ki, Paşinyanın mətbuat konfransında səsləndirdiyi başqa fikirlərdə zor tətbiq edilməsi, Azərbaycanın şantajdan istifadə etməsi və Ermənistanı cəngəlliyə çevirmək istəməsi kimi təhlükələrdən söz açılır. Millət vəkili sual edib ki, baş nazir delimitasiya və demarkasiya prosesinə hədə altında niyə gedir? Mamicanyan eyni zamanda soruşur ki, delimitasiya və demarkasiyanın başlanması Ermənistanın Azərbaycanın ərazi bütövlüyünü tanıması deməkdirmi? “Azatutyun” radiosu yazır ki, Paşinyan mətbuat konfransında bu qəbildən olan suallara cavab verərkən 1991-ci ildə MDB yaradılarkən Azərbaycan və Ermənistanın bir-birinin ərazi bütövlüyünü tanıdıqlarını deyib. Minasyan iddia edir ki, Paşinyanın bu bəyanatları da ciddi narahatlıq yaradır: “Bəs qarabağlılar hansı ərazidə öz müqəddəratlarını müəyyən edəcəklər? Paşinyan azərbaycanlıların, türklərin və sairin dediklərini deyirdi. Əgər diqqətli olsaydınız, bilərdiniz ki, o, ərazi məsələsinə başqa müstəvidə baxır. Yəni biz Qarabağın hansısa konkret ərazidə öz müqəddərratını təyin etməsi və xalqın bu ərazidə təhlükəsizliyinin təminatı məsələsini qaldırmamalıyıq və yalnız xalqın bu ərazidə yaşamaq hüququ olması məsələsini qaldıra bilərik. Bu o deməkdir ki, o, Qarabağ problemini Azərbaycanın tərkibində, həm də Qarabağ ermənilərinin fiziki varlığına daimi təhlükə şəraitində görür. Başqa sözlərlə, onun səsləndirdiyi formul ermənilərin Qarabağdan qovulması formuludur”. “Azatutyun” radiosu yazır ki, baş nazirin iki saat davam edən mətbuat konfransında müxalifətçilərə ən ağır gələn bu məqam olub. Bu arada daha bir maraqlı məqam odur ki, Paşinyan baş nazir vəzifəsində ən böyük sarsıntını 2019-cu ildə Noraqavit gömrüyündə Ermənistanın bayrağını döşəmənin üstündə görərkən keçirdiyini deyib. Müxalifətçilərin firkincə, burdan belə çıxır ki, Paşinyanı 44 günlük müharibənin minlərlə qurbanı, Qarabağın böyük bir hissəsinin itirilməsi sarsıtmayıb.
Digər keçmiş prezident Robert Köçəryanın “Hayastan” müxalif blokundan deputat Artsvik Minasyan isə qeyd edir ki, əvvəla, Paşinyanın dediklərinə inanmır, ikincisi də, imzalanmalı hər hansı sənəd parlamentə təqdim olunmalıdır: “Mən inanmıram ki, bu sənəddə təhlükəli müddəalar olmayacaq. Bununla belə, Paşinyan çıxışında o qədər təhlükəli fikirlər səsləndirib ki, bu fikirlər bəyanat və ya sənəddə də yer ala bilər. İkincisi də, onun beynəlxalq münasibətlər çərçivəsində imzalamalı olduğu sənəd parlamentdə ratifikasiyadan keçməlidir”. Ermənistanın keçmiş müdafiə naziri Seyran Ohanyan noyabrın 25-də parlamentdə rəhbərlik etdiyi müxalifətçi “Hayastan” fraksiyasının təşəbbüsü ilə keçirilən dinləmədə iddia edib ki, delimitasiya və demarkasiya qanla və birtərəfli qaydada keçirilir. Ohanyan bəyan edib ki, Ermənistan hakimiyyəti sərhədlərin dəqiqləşdirilməsi prosesinə bunun üçün müvafiq şərait olmadan başlayır. Onun sözlərinə görə bu, “Türkiyə-Azərbaycan hiyləsinə” uyğun olaraq keçirilən tələsik və vaxtsız prosesdir: “Bugünlərdə delimitasiya və demarkasiya əslində ən alçaq bir tərzdə aparılır - erməni əsgərin qanı ilə. Noyabrın 16-da baş verən hadisə bunun təsdiqidir. Ali hakimiyyətin bir nümayəndəsi də izah eləmədi ki, birgünlük müharibə niyə baş verdi, onun ardınca nələr oldu və ondan əvvəl nə olmuşdu. Fakt budur ki, indi bizim həlak olanlarımız, yaralılarımız, əsirlərimiz var və Azərbaycan Ermənistanın suveren ərazisinə girib. Yəni sərhədin qanla demarkasiyası baş verib”. Ohanyanın sözlərinə görə, bu gün Ermənistanda bir nəfər də yoxdur ki, ölkənin sərhədini millimetrinədək dəqiqliyi ilə təsəvvür etsin, çünki sərhədlər sovet illərində dəyişdirilirdi: “Müharibə vaxtı tutulmuş mövqelər sərhədə dair gələcək danışıqlara böyük təsir göstərəcək. Ən mühüm mövqeləri Azərbaycana verməklə, yolları, sərhədyanı kəndləri təzyiq altında qoymaqla, alternativlər axtarmaqla hazırkı hakimiyyət ölkənin təhlükəsizlik potensialını heçə endirib. Mən bilmirəm ki, gələcəkdə alternativ İrəvan harda olacaq”.
Dinləmədə bilavasitə çıxış etməyən parlamentdənkənar qüvvələrin nümayəndələri isə bu dinləmənin artıq gecikdiyindən narahatlıq ifadə ediblər. Son günlərdə İrəvanda keçirilən antihökumət aksiyalarının təşkilatçılarından vəkil Ara Zöhrabyan deyib ki, parlamentdə oturub gözləmək lazımdır: “Qoy Paşinyan təyyarədən düşüb nə dediyini, nəyi müzakirə etdiyini, nə imzaladığını, xalqımızın başına daha hansı müsibətləri gətirmək istədiyini desin”.
Tahir TAĞIYEV
