Tofiq Abbasov: “Əksinə, bizim əlavə siyasi dividend qazanma imkanlarımız artıb”
Rusiya və ABŞ Silahlı Qüvvələrinin Baş Qərargah rəisləri Valeri Gerasimov və Mark Milli arasında görüş olub. Bu barədə məlumatı Rusiyanın Müdafiə Nazirliyi yayıb. Bildirilir ki, görüş Finlandiyanın paytaxtı Helsinki şəhərində keçirilib.
Tərəflər görüş zamanı hərbçilər arasında münaqişələrin yaranması risqinin azaldılması ilə bağlı məsələləri müzakirə ediblər. Nazirlik, həmçinin qeyd edib ki, görüş zamanı qarşılıqlı maraq doğuran məsələlər ətrafında fikir mübadiləsi aparılıb və sözügedən görüş konstruktiv xarakter daşıyıb. Qərb mediasının məlumatına görə isə, danışıqlar ABŞ və tərəfdaşlarının Əfqanıstanı tərk etməsindən sonra terrorizmlə mübarizə vasitələrinin axtarılması fonunda keçirilib. Məlumdur ki, bu formatda görüş bir neçə dəfə Bakıda keçirilib. Hazırda iki ölkənin ali rütbəli şəxsləri arasındakı görüşün Bakıda deyil, Helsinkidə keçirilməsini erməni mediası öz xeyirlərinə manipulyasiya edir. Onlar iddia edirlər ki, Bakıya etimadın zəifləməsi səbəbindən ənənəvi görüş yeri dəyişdirilib. Bu iddiaları nə dərəcədə əsaslı saymaq olar?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, görüşün Helsinkidə baş tutmasından belə nəticələri çıxarmaq doğru deyil: “Bizə etimadın zəiflədiyini o zaman iddia etmək olar ki, rəsmi Bakı anlaşılmaz siyasət yürütməyə başlasın. Rusiya və başqa ölkələrlə gərginlik pik həddinə çatsın. Azərbaycan öz siyasətini sülh, qarşılıqlı inam və əminamanlıq üzərində qurur. Hazırda BMT-nin Baş Assanbleyasının 76-cı sesiyası çərçivəsində edilən çıxışların məzmunu sülh və əminamanlıqla bağlıdır. Azərbaycan bu proseslərə öz töhfəsini verib. BMT-nin 4 qətnaməsini biz öz gücümüzə icra etmişik. Bu baxımdan da, bizim siyasətimizdə hər hansı bir kardinal dəyişiklik nəzərə çarpa bilməz. Əksinə, bizim əlavə siyasi dividend qazanma imkanlarımız artıb. Bu da, yalnız ermənilərin deyil, həm də onların havadarlarının ürəyincə olan məsələ deyil. Onlar çalışırlar ki, Azərbaycanın obrazını qara boyalarla çəksinlər. Güya biz kimlərəsə təhdidlər yaradırıq. Bunların hamısı uydurmalardı”.
Hansısa görüşün Bakıda baş tutmamasından belə nəticələrə gəlmək yalnız qərəzli yanaşmanın məhsulu ola bilər: “Azərbaycan öz ənənəvi siyasi kursundan imtina etməyib. Bunun da kökündə şəffaflıq durur. Bizdən fərqli olaraq, Ermənistan çaşqınlıqdan doğan qeyri-rasional addımlar atır. Yalan və hiylə ilə özlərinə dəstəkçi axtarırlar. Onların öz milli suveren imkanlarını reallaşdırmağa imkanları, heç həvəsləri də yoxdur. Azərbaycan isə öz siyasətini yürüdür. Stereotiplər kimdəsə fərqli fikir yarada bilər. Bundan fərqli mülahizələr də irəli sürülər. Bizi narahat etmir. Deyilən formatda görüş Bakıda keçiriləndə ermənilər nə yazırdı? Onlar həmin vaxt da bizə etimadın olmadığını deyirdilərsə, deməli, ortada irrasional yanaşma mövcuddur. Biz öz siyasətimizi kiminsə xoşuna gəlmək konturları üzərində qurmuruq”.
Məhəmmədəli QƏRİBLİ
