Fransızlar Qarabağa pozucu səfərlərdən hələ imtina etməyib - hər şey sülhməramlıların gözü önündə baş verir…

Rauf Zeyni: “...Qanunsuzluğa yol verənlər öz layiqli cəzasını almalıdır”

img

Fransalı hüquq müdafiəçiləri Azərbaycanın Qarabağ bölgəsinə qanunsuz səfər edib. Bu ölkənin “L'Œuvre d'Orient” təşkilatının nümayəndələri Azərbaycandan icazə almadan, dövlətimizi səfərləri barədə məlumatlandırmadan Laçın dəhlizi vasitəsilə qanunsuz olaraq Qarabağa gediblər. Müvəqqəti olaraq Rusiya sülhməramlılarının nəzarətində olan ərazimizə Fransanın “L'Œuvre d'Orient” təşkilatının nümayəndələrinin qanunsuz səfərinə sülhməramlılar göz yumub.

Erməni KİV-i yazır ki, “L'Œuvre d'Orient” təşkilatının nümayəndə heyəti Qarabağda ermənilərlə görüşlər keçirir. 

Ekspertlərin fikrincə, Fransanın həm dövlət, həm də müstəqil təşkilatlarının nümayəndələri dəfələrlə belə təxribatlara yol verib və Qarabağa qanunsuz səfərlər ediblər, buna görə isə onların heç biri cəzalandırılmayıb. Ekspertlərin sözlərinə görə, Qarabağa səfət etmək istəyən xarici nümayəndələr əvvəlcə Azərbaycan hökümətindən rəsmi icazə almalı və rəsmi Bakının icazəsindən sonra Laçın dəhlizi vasitəsilə yox, Bakıdan Qarabağa getməlidirlər.

  • “Sülhməramlıların fransalı nümayəndələrin bizim ərazimizə qanunsuz səfər etməsinə icazə verməsi yolverilməzdir və üçtərəfli bəyanatın tələblərinə ziddir”

Milli Qeyri Hökumət Forumunun prezidenti Rauf Zeyni “Bakı-Xəbər”ə açıqlamasında bildirdi ki, bütün hallarda, baş verənlərə görə rusiyalı sülhməramlılar məsuliyyət daşıyır. “Məlumatdan belə başa düşdüm ki, “L'Œuvre d'Orient” təşkilatı Fransaya aid olan bir təşkilatdır. Fransanın bu təşkilatının nümayəndələrinin Qarabağa qanunsuz səfərinə əraziyə ciddi nəzarət etməli olan Rusiya sülhməramlıları göz yumub, öz işlərinə səhlənkar yanaşıblar. Sülhməramlıların öz vəzifələrinə məsuliyyətsiz və laqeyd yanaşması nəticəsində fransalı hüquq müdafiəçiləri qeyri-qanuni olaraq Azərbaycan ərazisinə səfər ediblər. Sülhməramlıların fransalı nümayəndələrin bizim ərazimizə qanunsuz səfər etməsinə icazə verməsi yolverilməzdir və üçtərəfli bəyanatın tələblərinə ziddir. 10 noyabr sazişindən irəli gələrək hər kəs, eləcə də rus sülhməramlıları öz üzərinə düşən vəzifəni yerinə yetirməlidir. Əgər rus sülhməramlıları öz üzərilərinə düşən vəzifəni yerinə yetirmirlərsə, Azərbaycan höküməti tərəfindən onlara dərhal xəbərdarlıq edilməli və Azərbaycan ictimaiyyəti kəskin reaksiya verməlidir. Vətəndaş cəmiyyəti olaraq biz həmişə bu kimi məsələləri diqqətdə saxlamışıq, bütün qanunsuz hərəkətləri pisləmişik”.

“Azərbaycan ərazisinə heç kəsin icazəsiz səfər etməsinə icazə verilə bilməz” – deyən R.Zeyninin bildirdiyinə görə, ərazilərimizin azad edilənə qədər 30 il müddətində nəzarətsiz olması kifayətdir, artıq Azərbaycan dövləti, Azərbaycan Silahlı Qüvvələri öz ərazilərinə nəzarət edir, müvəqqəti olaraq isə müəyyən bir hissə sülhməranlıların nəzarətindədir. “Rus sülhməramlıları da bütövlükdə Azərbaycan Respublikasının nəzarətindədir. Ona görə də, xarici təşkilatların nümayəndələrinin Qarabağ ərazisinə qanunsuz olaraq səfər etməsinə şərait yaradanlar araşdırılmalıdır, onlar Rusiya sülhməramlıları olduğu üçün müvafiq qurumlara xəbərdarlıq göndərilməlidir ki, bundan sonra belə qanunsuzluqlara yol verilməsin, qanunsuzluğa yol verənlər isə öz layiqli cəzasını almalıdır. Biz bütün beynəlxalq hüquq normalarına hörmətlə yanaşırıq, ancaq bizim də qanunlarımıza beynəlxalq hüquq normaları çərçivəsində hər kəsdən hörmətlə yanaşmağı tələb edirik” - deyə R.Zeyni qeyd etdi.

İradə SARIYEVA

Son xəbərlər