Bu şəxsi fikrimə hamı şərik olmasa da yəqin tərəf çıxanlar çox olacaq. BMT-nin bu günlərdə Nyu-Yorkda davam edən 76-cı sessiyasında Azərbaycan Prezidentinə xüsusi məruzə verilməli idi. Buna beynəlxalq möhkəm siyasi əsaslar var.
Əvvəla, Azərbaycan Prezidenti korona pandemiyası ilə səmərəli mübarizədə təkmil milli model yaratmaqla bərabər qlobal səylərin birləşdirilməsi naminə dünyanın ən təşəbbüskar və real iş görən liderləri sırasında çoxlarının qibtə etdiyi yer tutur. Pandemiya ilə mübarizədə ilk beynəlxalq müzakirə platformasını İlham Əliyev təşkil etdi - Türk dövlətləri şurasında və Qoşulmama Hərəkatında 2020-ci ilin aprel-may aylarında videokonfrans təşkil etdi, BMT-nin xüsusi sessiyasının çağırılmasını təklif etdi və təklif baş tutdu, ÜST-yə 10 milyon dollar yardım etdi, əlavə 30-dan çox ölkəyə dəstək verildi, bəzi dövlətlərin cinayətkar "vaksin şovinizminə" qarşı cəsarətlə ilk etiraz edənlərdən oldu və sair.
İkinci, BMT-nin nüfuzu üçün çox vacib olan təşkilati islahatlar məsələsini ardıcıl olaraq qaldırır, "BMT-nin özünü gücləndirmək potensialı getdikcə zəifləyir" kimi güclü təşviqedici fikri səhv etmirəmsə ilk dəfə bizim Prezident deyib. Nə vaxtsa BMT sistemində struktur islahatları olacaqsa, burada Əliyevin çağırış və tənqidlərinin müəyyən rolu olacaq.
Üçüncü, İlham Əliyev BMT tarixində ilk dəfə olaraq Təhlükəsizlik Şurasının dörd qətnaməsinin bu təşkilatın heç bir dəstəyi olmadan tək dövlətin gücü ilə icrasını təmin etdi, regionumuzda BMT-nin özünün də istəyinə uyğun olaraq təcavüz və işğal faktına son qoydu, BMT qətnamələrinin icrası tarixində tam yeni presedent yaratdı. Əslində BMT-nin nüfuzu üçün xoş olmayan bir vəziyyəti aradan qaldırdı…
Nəhayət, müasir dünya tarixində ilk dəfə olaraq BMT-nin, Qoşulmama Hərəkatının, İƏT-in, Afrika Birliyi Təşkilatının, Avroittifaqın, Ərəb Liqası təmsilçilərinin qatıldığı beynəlxalq müzakirə platformasını təşkil edən də Əliyevdir.
Ən azı bu arqumentlər İlham Əliyevin BMT sessiyasında xüsusi məruzəçi statusu ilə təmin olunmasına əsas ola bilərdi..
Aydın QULİYEV
