Bayden erməni əsirlərdən danışdı, mina xəritələrini unutdu - erməniyönümlü mövqe...

Ramil Hüseynov: “Bayden yaxşı bilir ki, saxlanılan erməni diversantlar hərbi əsir deyil”

img

Birləşmiş Ştatlar prezidenti Co Bayden Ermənistanın müstəqilliyinin 30 illiyi ilə əlaqədar Ermənistan baş naziri Nikol Paşinyana təbrik məktubu göndərib. Təbrik məktubunda o, Qarabağ münaqişəsinin nizamlanmasına və erməni əsirlərin azad edilməsinə dəstək vəd edib.

Bayden iddia edib ki, guya erməni xalqı təhdidlərlə üzləşib: “Ermənistan xalqı təhdidlər, o cümlədən Dağlıq Qarabağda hərbi əməliyyatlarla bağlı təhdidlərlə üzləşib, bu da faciəvi itkilərə səbəb olub. Biz erməni xalqının acısına ortaq olaraq, ATƏT-in Minsk Qrupu formatında və digər regional formatlarda regional sabitliyin təmin edilməsi və münaqişənin nizamlanması üçün Ermənistan hökuməti ilə əl-ələ işləyəcəyik. ABŞ Azərbaycanda saxlanılan erməni əsirlərin azad edilməsi istiqamətində tədbirləri davam etdirəcək”.

Maraqlıdır ki, Co Bayden Azərbaycanın 2 dəfə həbsdən azad etdiyi diversantlardan, Ermənistanın hələ də vermək istəmədiyi mina xəritələrindən bir kəlmə də danışmayıb.

  • “...öz maraqlarını yenidən önə çəkmək üçün Ermənistandan bir maşa kimi istifadə edirlər”

Məsələyə münasibət bildirən Yeni Yol Partiyasının sədri Ramil Hüseynovun fikrincə, Baydenin belə aşırı ermənipərəst mövqe sərgiləməsi təsadüfi deyil: “Bu bir sıra məsələlərdən irəli gəlir. Əvvəla, Co Bayden uzun illərdir erməni lobbisi ilə çox yaxın münasibətlərə malikdir. Bu həmin Baydender ki, bədnam 907-ci Düzəlişin əsas müəlliflərindən biri olub. Konqresdə ermənilərin xeyrinə qəbul olunan qərarlarda fəal rol oynayıb. Ən nəhayət, Co Bayden ötən il seçki kampaniyasında ermənilərə bir sıra vədlər verdi. Bunun nəticəsi olaraq bu ilin aprelində qondarma “erməni soyqırıımını” tanıdı. Baydenin yenidən Qarabağla bağlı canfəşanlıq göstərməsi 10 noyabrdan sonra ABŞ-ın proseslərdən kənarda qalması ilə bağlıdır. Çünki Birləşmiş Ştatlar çalışır ki, ATƏT-in Minsk Qrupu timsalında yenidən proseslərə qatılsın. Azərbaycan Minsk Qrupunun vasitəçiliyini qəbul etmədiyi üçün bu minvalla Bakıya təzyiq göstərirlər. Məqsəd həm də Qərbə yaxın olan Nikol Paşinyanı qorumaqdır. Hamıya məlumdur ki, Paşinyan Soros layihəsidir. Bayden yaxşı bilir ki, Azərbaycanda saxlanılan erməni diversantlar hərbi əsir deyil. Sadəcə, öz maraqlarını yenidən önə çəkmək üçün Ermənistandan bir maşa kimi istifadə edirlər. Bayden adminstrasiyası ədalətli olsaydı, o zaman delimitasiya və demarkasiya məsələlərində, mina xəritələrinin verilməsində daha tələbkar mövqedən çıxış edərdi. Ancaq hələ ki, biz bunun əksini görürük”.

Partiya sədri hesab edir ki, kimin nə deməsindən asılı olmayaraq, Azərbaycanın maraqları öndə olmalıdır.

Vidadi ORDAHALLI

Son xəbərlər