Rusiya prezidenti Vladimir Putin Ermənistanın müstəqilliyinin 30-cu ildönümü ilə bağlı baş nazir Nikol Paşinyan və prezident Armen Sarkisyana təbrik teleqramı göndərib. Putin göndərdiyi teleqramda rus və erməni xalqlarını qardaş adlandırıb: “Rusiya ilə Ermənistan arasında müttəfiqlik münasibətlərinin daha da inkişaf etdirilməsi iki ölkənin qardaş xalqlarının maraqlarına cavab verir. Ermənistanla münasibətlər yaxşı dostluq ənənələrinə, mədəni və mənəvi yaxınlığa əsaslanır. Bu münasibətlərin müttəfiqlik ruhunda daha da inkişaf etməsi qardaş xalqlarımızın əsas maraqlarına cavab verir”.
Rusiya prezidenti iki ölkənin Avrasiya İqtisadi Birliyi (EAEU), Kollektiv Təhlükəsizlik Müqaviləsi Təşkilatı (KTMT) və MDB çərçivəsində müxtəlif sahələrdə sıx əməkdaşlıq və konstruktiv qarşılıqlı əlaqələr qurduğunu qeyd edib.
Bu necə qardaşlıqdır ki, son 3 ildə Ermənistan cəmiyyətində antirus ovqatı, çağrışları bu və ya digər formada artıb? Özü də bu proses hələ də səngiməyib. Xüsusən də İkinci Qarabağ müharibəsindən sonra ermənilərin Rusiyaya nifrəti daha da artıb. Belə olan halda Putin hansı qardaşlıqdan danışır?
“Putin oradakı antirus əhval-ruhiyəsini çox yaxşı görür”
Sözügedən məsələ ilə bağlı fikirlərini “Bakı-Xəbər”lə bölüşən politoloq Sahil İsgəndərli hesab edir ki, Putinin səsləndirdiyi fikirlər əsasən diplomatik gedişdir: “Nəzərə alsaq ki, istər Rusiya, istərsə də dünyanın digər güc mərkəzləri üçün Ermənistan çox iyrənc, amma əlverişli alət rolunu oynayır, o baxımdan bu təsadüfi deyil. Bu səbəbdən düşünürəm ki, Vladimir Putinin çox güclü və hansısa məntiqli bir siyasi gediş etdiyini başa düşmək olar. Yəni məntiqi baxımdan bu anlaşılandır. Ancaq digər tərəfdən, istər Putin, istərsə də digər Rusiya rəsmiləri çox yaxşı bilirlər ki, Ermənistanın ikiüzlü siyasətinə heç vaxt bel bağlamaq olmaz. Bunu tarix dəfələrlə sübut edib. Birinci Dünya müharibəsində ermənilər əvvəlcə Osmanlı İmperiyasına arxadan zərbə vurdular. Bolşevik Rusiyası “Böyük Ermənistan” layihəsini rədd edəndən sonra onlar ruslara qarşı da satqınlıqla məşğul oldular. O baxımdan, fikrimcə, Putin xususi xidmət orqanlarında çalışan şəxs kimi çox yaxşı başa düşür ki, heç vaxt ermənilərin səmimiyyətinə inanmaq olmaz. Ancaq o da bir həqiqətdir ki, Rusiyada çox güclü erməni lobbisi var. Onlar birokratik aparata müəyyən qədər təsir edə bilirlər. Sözsüz ki, Putin Ermənistanda antirus əhval-ruhiyyəsini çox yaxşı görür. Onlar gözəl bilirlər ki, bu cür ovqat heç də epizodik xarakter daşıyan hal deyil. Çünki ermənilər hər zaman Rusiyanı “Böyük Ermənistan” layihəsinin reallaşmasında bir maneə hesab edirlər. Onların əsas ittihamı odur ki, Rusiya neçə illərdir ermənilərsiz Ermənistan yaratmaq istəyir. Əlbəttə ki, belə olan halda söhbət müttəfiqlikdən, qardaşlıqdan gedə bilməz. Ancaq çox təəssüflər olsun ki, Rusiyada erməni ianələrindən yararlanan çoxsaylı siyasətbazlar var. Onlar bu oyunlar vasitəsilə öz şəxsi maraqlarına xidmət edirlər. Onlar Rusiyanın dövlət maraqlarını ümumiyyətlə inkar edirlər. SSRİ vaxtında da xristian maraqlarından çıxış edən siyasətbazlar son nəticədə Rusiyanın maraqlarına çox böyük ziyanlar vurdular”.
Politoloq onu da qeyd etdi ki, Rusiya rəsmiləri bu cür fikirlərlə Ermənistanı nəzarətdə saxlamaq istəyir.
Vidadi ORDAHALLI
