Paşinyan hələ də "iki erməni dövləti"ndən danışır - birini çox yarıtdı...
Ermənistanın Baş naziri Nikol Paşinyan İrəvandakı Respublika meydanında ölkə müstəqilliyinin 30 illiyinə həsr olunmuş tədbirdəki çıxışında yenidən separatçı fikirlər səsləndirib. O qeyd edib ki, məğlubiyyətləri qələbəyə çevrilməlidir.
Paşinyan çıxışında Ermənistanın 30 illik müstəqillik tarixinə ekskurs edib: “Uğur və uğursuzluq, qələbə və məğlubiyyət, göz yaşı və sevinc, ilham və ümidsizlik, heyranlıq və məyusluq, müharibələr, qələbə və məğlubiyyət görəcəyik. İndi sual necə yaşayacağımız və uşaqların, dul qadınların, ataların gözlərinə necə baxacağımızdır. Verilmiş qurbanların mənasız sayılmaması üçün nə etməli? Bizim ən böyük vəzifəmiz müstəqil bir dövlətin gələcəyi üçün doğru təlimatları formalaşdırmaqdır”.
Paşinyan çıxışında Azərbaycana qarşı yenə də separatçı ifadələrə yer verib: “Məğlubiyyətimizi qələbəyə çevirməliyik. Qəhrəmanlar Ermənistan və “Artsax” uğrunda öldülər. İki erməni dövləti yaşadıqca, qəhrəmanlarımız sağdır, “Artsax” və Ermənistan respublikaları inkişaf edərkən, bu onların qurbanlarının olmadığını göstərir. Söhbət uşaqlarının, qardaş və bacılarının vətənindən gedir”.
Göründüyü kimi, Paşinyan öz ampluasına qayıdıb. Onun bir vaxtlar səsləndirdiyi “Qarabağ Ermənistandır, nöqtə” fikirindən sonra müharibə başladı və ona lazım olan dərs verildi. Hazırda sülh danışıqları, sərhədlərin dəqiqləşməsi, kommunikasiyaların açılması kimi proseslıərin gündəmdə olduğu bir zamanda Paşinyanın yenidən iki erməni dövlətindən danışması hansı anlama gələ bilər?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, Nikol Paşinyanın yenidən sərsəm iddialarla çıxış etməsi erməni məkrli xislətinin davam etdiyinə bir işarədir: “Bir tərəfdən Paşinyan Türkiyə ilə Gürcüstan vasitəçiliyi ilə danışıqlara gedir, digər tərəfdən Rusiya Köçəryanın əli ilə oradakı müxalifəti gücləndirir. Yəni Ermənistanda xaotik proseslər cərayan edir. Ən başlıcası isə budur ki, onlar sülhdən daha çox müharibəyə meyllənirlər. Bizim qələbəmizi həzm edə bilmirlər. Buna görə də Paşinyan revanşist fikirlər səsləndirir. Bölgədə gərginliyin olması faktdır. Müharibənin hər an başlaya biləcəyinə dair ehtimallar böyükdür. Azərbaycan bunu bilir və bir an da olsun dayanmır. Təlimlərini davam etdirir. İranın bizə qarşı mövqeyi də bu layihənin tərkib elementidir. 44 günlük müharibədə biz yalnız Ermənistana deyil, bütövlükdə türk düşmənlərinə qalib gəlmişik. Bu səbəbdən də qələbəmizin möhkəmlənməsinə imkan vermirlər. Paşinyanın bu mövqeyindən görünür ki, o, səmimi deyil. Nə qədər ki, Ermənistan sülh sazişini imzalamayıb, biz hər zaman bu cür separatist, qızışdırıcı fikirlərlə rastlaşacağıq. Yaxşı olar ki, Ermənistanı müdafiə edən qüvvələr bunu görsün. Baxsınlar və görsünlər, iki erməni “dövlətinin” olması ilə fəxr edən bir adamla biz hansı nəticəni əldə edə bilərik? Paşinyan demoqoqiyaya üstünük verən adamdır. Yadınızdadırsa, müharibədən əvvəl də belə sərsəm fikirlər səsləndirirdi. Sanki bir il qabaqkı proses yenidən başlayır. Türkiyənin hərbi heyəti Naxçıvana gəlib, təlim keçir. Görünür, Paşinyanı qızışdırıcı mövqeyə sövq etdirən qüvvələri sülhün olması qane etmir. Biz istənilən ssenariyə hazırlıq. Cünki bilirik ki, qarşımızda erməni kimi düşmənimiz var. Paşinyan heç bir erməni dövlətini əməlli-başlı idarə edə bilmir. Hansı ikinci erməni dövlətindən danışır? Qarabağda bir balaca yarımçıq işimiz var, onu da tamamlayıb, ermənilərin xülyalarına birdəfəlik son qoyacağıq”.
Məhəmmədəli QƏRİBLİ
