Rusiya prezidenti Vladimir Putin Xarici İşlər Nazirliyinin xüsusi tapşırıqlar üzrə səfiri Mikael Ağasandyanı ölkəsinin Kollektiv Təhlükəsizlik Müqaviləsi Təşkilatında (KTMT) daimi və səlahiyyətli nümayəndəsi təyin edib.
Başqa bir sərəncamla Putin Xarici İşlər Nazirliyinin xüsusi tapşırıqlar üzrə səfiri Andrey Şvedovu bu vəzifədən azad edib.
Milliyyətcə erməni olan Mikael Ağasandyan 2015-ci ildə Rusiya Xarici İşlər Nazirliyinin Beynəlxalq Təşkilatlar Departamentinin direktor müavini vəzifəsinə təyin edilib. BMT Təhlükəsizlik Şurasının fəaliyyəti, Yaxın Şərq və Şimali Afrikadakı vəziyyət, sanksiyalar siyasəti, Balkan münasibətləri ilə bağlı məsələlərə nəzarət edib. Bundan əvvəl o, Rusiyanın BMT yanında daimi nümayəndəliyində çalışıb. Qeyd edək ki, rotasiya qaydasına əsasən KTMT-yə sədrliyi də Ermənistan edir. Məhz belə bir məqamda Putinin quruma Rusiyanın təmsilçisi kimi miliyyətcə erməni olan bir diplomat təyin etməsi təsadüf sayıla bilərmi? Bəllidir ki, Ermənistan bu qurumdakı təmsilçilyindən istifadə etməklə, hər zaman KTMT-ni Azərbaycana qarşı yönəltməyə çalışıb. Hazırda, qismən də olsa, Ermənistanın və erməniliyin mövqeyinin KTMT-də güclənməsi qurumun bizə olan gələcək münasibətini dəyişə bilərmi?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Putinin KTMT-yə erməni təyin etməsi, görünür, başqa bir amillə bağlıdır: “Məlumdur ki, KTMT-də dönəm sədrliyi Ermənistana keçir. Buna görə də Putin güman edir ki, bu amil nümayəndənin işini asanlaşdırar. Yəni ermənilərin bir-birilə yaxşı dil tapa bilməsi nöqteyi-nəzərindən belə ehtimal ola bilər. Burada ciddi bir prinsipial məna axtarmaq da lazım deyil. Hətta KTMT-nin baş katibi vəzifəsi belə o qədər də ciddi post deyil. Rusiyanın və ya başqa bir ölkənin həmin təşkilatdakı nümayəndəsi isə ümumiyyətlə kiçik postdur. Hətta deyərdim ki, KTMT-nin üzvü olmaq da kiməsə əlavə səlahiyyət vermir. Orada bütün prosesi Rusiya idarə edir. Qurumda Qazaxıstan, Belarus kimi nüfuzlu ölkələr olsa da, bütün proses Rusiyanın nəzarəti altındadır. Təşkilat nəyəsə müdaxilə etmək qərarına gəlsə, əsas ağırlıq Rusiyanın üzərinə düşmüş olacaq. 44 günlük müharibə zamanı Ermənistan nə qədər çalışdısa, KTMT-ni münaqişəyə cəlb edə bilmədi. Çünki Rusiya müxtəlif bəhanələrlə bundan yayındı. Qurumun 2016-cı ilə qədər baş katibi olmuş Nikolay Bordyuja Ermənistana kifayət qədər vədlər vermişdi. Bununla da Ermənistanda saxta əminlik yaranmışdı ki, Azərbaycan güc yolu ilə ərazilərini azad etmək istəsə, qarşısında Rusiyanı görə bilər. Ancaq biz bunu görmədik. Müharibə zamanı KTMT tamamilə neytral qaldı. Düzdür, Azərbaycan da onlara bəhanə vermədi. Bütün təxribatlara baxmayaraq, Ermənistan ərazisinə bir güllə belə atmadı. Bu baxımdan da, Ermənistanın baş katibliyi və erməni əsilli nümayəndənin Rusiyanı təmsil etdiyi dönəmdə də nəsə dəyişməyəcək. Bütövlükdə KTMT öz gücünü Əfqanıstanla olan sərhədə yönəldəcək. Hazırda onlar üçün daha vacib olan budur. Bizim narahatlığımıza heç bir əsas yoxdur. Bizi daha ciddi işlər gözləyir. Rusiyanın vastəçiliyi, Türkiyənin iştirakı ilə ilin sonuna kimi sülh zazişinin imzalanacağını gözləyirik. Belə xırda detallar bizi naharat etməməlidir”.
Məhəmmədəli QƏRİBLİ
