ABŞ Prezidenti Co Bayden baş nazir Nikol Paşinyana Ermənistanın müstəqilliyinin 30-cu ildönümü ilə əlaqədar məktubunda sırf ermənipərəst mövqe ifadə edib. Co Bayden bildirib: “Erməni xalqı faciəli insan tələfatına səbəb olan Dağlıq Qarabağdakı hərbi əməliyyatlar da daxil olmaqla çətinliklərlə üzləşib… Erməni xalqının dərdini bölüşərək, ATƏT-in Minsk Qrupu formatında və digər regional formatlarda Ermənistan hökuməti ilə əlbir olaraq regional sabitliyi stimullaşdırmaq və münaqişəni həll etmək üçün çalışacağıq”.
ABŞ prezidenti daha sonra vurğulayıb ki, Amerika Birləşmiş Ştatları Azərbaycanda saxlanılan erməni məhbusların azad edilməsi üçün tədbirlər görməyə davam edəcək.
Əvvəla, yaxşı olardı ki, Bayden Qarabağda ermənilərin niyə ölməsinə səbəb olan motiv barədə də bir-iki kəlmə yazaydı. Deməliydi ki, Ermənistan başqasının torpağını işğal etdiyi səbəbindən belə faciə ilə üzləşib. İkincisi, ABŞ prezidenti həllini tapan münaqişənin gələcək həllindən danışır və bunun özünü prosesdən təcrid etmiş ATƏT-in Minsk Qrupu formatında davamını arzulayır. Hazırda həbsdə olanlar isə əsir yox, diversantlardı. Bir sözlə, ABŞ prezidenti Azərbaycanın maraqları ilə qətiyyən uzlaşmayan və Ermənistanın əsassız müdafiəsinə həsr edilən mövqe ifadə edib.
Politoloq Yeganə Hacıyeva “Bakı-Xəbər”ə açıqlamasında bildirdi ki, ABŞ prezidentinin Paşinyana göndərdiyi bu məktub bundan öncəkindən mahiyyət baxımından fərqlənir: “Baydenin may ayında göndərdiyi məktubda da müharibə ilə bağlı eyhamlar var idi. Burada isə sentimental və bədii notlarla ermənilərin “faciəsini” qabardır. Əsas səbəblərdən biri budur ki, Co Bayden ABŞ prezidentləri arasında administrasiyasında ən çox erməni təmsil olunan ölkə rəhbəridir. Bu faktor özünü ABŞ-ın xarici siyasət kursunda da büruzə verir. Xüsusilə də Cənubi Qafqaz siyasətində bu daha çox özünü göstərir. Bu regionda sülhün əldə olunması üçün bir format far, o da 10 noyabr razılaşmasıdır. Həmin formatda ABŞ yer almır. Hazırkı dönəm üçün Minsk Qrupu formatı ümumiyyətlə işlək deyil. Fəaliyyətdə olduğu uzun bir dönəmdə həmin format yalnız dialoqu dəstəlklədi. Heç bir həll mexanizimi yarada bilmədi. Özünü prosesdən kənarlaşdıran bu təsisatı yenidən diriltmək cəhdi yalnız ermənilərə lazımdır. Baydenin qeyd etdiyi bu fakir, ola bilsin ki, 10 noyabr razılaşmasının həyata keçməyən bəndlərini nəzərdə tutur. Bundan kənarda nəsə etmək mümkün deyil. Baydenin məktubunun diplomatik məzmunda olmasından hiss edilir ki, məsələdə bir erməni barmağı var. Bütün dünya gözəl bilir ki, Ermənistan müharibəni niyə uduzub. Bütün bunlar onların başına işğalçı olmaları səbəbindən gəlib. Çox təəssüf ki, Bayden ən vacib olan bu detalın üzərindən sükutla keçir. Buradan müasir siyasətin ədalətsizliyi görünür. ABŞ-ın bu mövqeyini tam ifşa etmək üçün işğaldan azad edilən Ağdama baxmaq kifayətdir. Yaxşı olardı ki, Bayden həmin səhnələrə də bir diqqət yetirsin. Onda ermənilərin necə “iztirab” çəkdiyini daha aydın görə bilərdi. Belə məzmunda olan məktub ABŞ kimi ölkənin imicinə yaraşmır. Çünki obyektivlikdən əsər-əlamət yoxdur. Azərbaycan öz mövqeyini aydın ifadə edib. Orada münaqişənin öz həllini tapdığı qeyd olunub və hər hansı Minsk Qrupuna ehtiyacın olmadığı bildirilib”.
Məhəmmədəli QƏRİBLİ
