Sosial şəbəkələrdə, guya Azərbaycanda şəhidlərin milliyətinə görə onlar arasında fərq qoyulduğu, ayrı-seçkilik edildiyi, etnik problemlər olduğuna dair dezinformasiyalar yayılır. Heç şübhəsiz, bu da növbəti təxribat dalğasıdir ki, ölkəmizdə qarışıqlıq yaratmaq istəyənlər uydurub.
Sosial şəbəkələrdə şəhid ruhlarına təxribatı yayanlar bilməlidir ki, bu torpağın uğrunda canından keçən hər kəs bizimdir, bütün xalqımızındır, dövlətimizindir. Birinci və İkinci Qarabağ müharibələrində Azərbaycanda yaşayan bütün xalqların nümayəndələri iştirak edib, canlarını fəda ediblər. Azərbaycan bizim hamımızın vətənidir.
“Milliyyətindən, dinindən asılı olmayaraq bütün şəhidlərimiz bizimdir, onlar bu Vətənin övladlarıdır”
“Müasir İnkişaf” Birliyinin rəhbəri Mübariz Göyüşlü “Bakı-Xəbər”ə bildirdi ki, bu təxribatdır və bu təxribatı yayanlar insanlığın üz qarasıdır. “Bu təxribatı yayanlar ən axırıncı adamlardır ki, özlərini bu kökə salırlar. Şəhidlərimizin adından istifadə edərək hansısa “siyasi mübarizə”yə cəhd edilməsi yolverilməzdir. Azərbaycanda birmənalı olaraq milli-etnik ayrıseçkilik deyilən bir məsələ yoxdur, olmayıb da. Heş kəs buna aid bir fakt göstərə bilməz. Şəhidlərlə bağlı isə ümimiyyətlə hansısa bir uydurma milli, etnik ayrıseçkilikdən danışmaq olmaz, bunu düşünmək belə ayıbdır. Azərbaycanın ərazi bütövlüyü uğrunda Azərbaycanda bütün xalqların nümayəndələri döyüşüb, canlarından keçiblər. Milliyyətindən, dinindən asılı olmayaraq bütün şəhidlərimiz bizimdir, onlar bu vətənin övladlarıdır. Azərbaycanın yəhudi, rus və digər millətlərdən olan Milli Qəhrəmanları var. Bütün qəhrəmanlarımızın ruhu ölkəmizdə böyük hörmət və ehtiramla yada salınır. Sosial şəbəkələrdə də, KİV-də də şəhidlərə heç bir ayrıseçkilik qoyulmur, onların şəkilləri paylaşılır, barələrində yazılar yazılır. Azərbaycanda yaşayan bütün xalqların nümayəndələri öz vətənləri Azərbaycan uğrunda canlarından keçiblər. Burada heç bir ayrıseçkilikdən söhbət gedə bilməz. Azərbaycan dövləti də bütün şəhid ailələrinə qayğı və diqqətlə yanaşır. Şəhidlərimizə münasibətimiz çox həssasdır. Hansısa təxribatçılar cəmiyyətimizdə bölücülük, etnik qarşıdurma yaratmaq məqsədilə bu təxribatları dövriyyəyə buraxıbsa, çox yanılıb. Çünki Azərbaycan cəmiyyətində bu təxribat keçərli deyil. Hardasa hansısa bir məmurun səhlənkar münasibətini dövlətin, xalqın münasibəti kimi qələmə vermək yolverilməzdir”.
M.Göyüşlü qeyd etdi ki, ruslar da, ləzgilər də, tatlar da, udilər də, avarlar da, yəhudilər də, bu ölkədə yaşayan bütün digər xalqların övladları da Azərbaycana qəlbən, ruhən, mənən bağlı olub. M.Göyüşlünün sözlərinə görə, bu gün kimlərinsə şəhidlərin adlarından istifadə edib çirkin kampaniya aparması cəhdləri boşa çıxacaq, çünki xalqımız da, dövlətimiz də öz şəhidinə sahib çıxmağı bacarır.
M.Göyüşlü dedi ki, həm Prezident İlham Əliyev, həm də ölkəmizin Birinci vitse-prezidenti Mehriban Əliyeva şəhid ailələrinə çox böyük qayğı və diqqət, şəhidlərin ruhuna böyük ehtiram bəsləyirlər.
İradə SARIYEVA
