İki yeni parlament Ermənistan-Rusiya əlaqələrində nəyi dəyişəcək? - Paşinyanın Putinə məktubu...

Azər Həsrət: “Bu, iki ölkə münasibətlərinə hansısa yenilik gətirməyəcək”

img

Ermənistanın Baş naziri Nikol Paşinyan Rusiya Federasiyasının Prezidenti Vladimir Putinə Dövlət Dumasına seçkilərdə “Vahid Rusiya” partiyasının qalib gəlməsi ilə əlaqədar təbrik məktubu göndərib.

 

Paşinyan məktubda bildurib: “Hörmətli Vladimir Vladimiroviç, “Vahid Rusiya” partiyasının Rusiya Federasiyası Dövlət Dumasına keçirilən seçkilərdə qazandığı inamlı qələbə münasibətilə səmimi təbriklərimi qəbul edin. Seçkilərin nəticələri Rusiya vətəndaşlarının ölkənin siyasi rəhbərliyi tərəfindən ardıcıl olaraq həyata keçirilən kursu dəstəklədiyini göstərir. Sizə, Vladimir Vladimiroviç, rus xalqının çiçəklənməsi və rifahına yönəlmiş bütün fikirlərin və sonrakı layihələrin həyata keçirilməsini arzulayıram. Əminəm ki, bu yaxınlarda seçilmiş Ermənistan parlamenti ilə yeni çağırış Dövlət Duması arasında sıx əməkdaşlıq Ermənistan-Rusiya ittifaqının inkişafına mühüm töhfə verəcək”.

Paşinyan belə təəssürat yaratmağa çalışır ki, iki ölkənin yeni seçilmiş parlamentləri əlaqələrin möhkəmlənməsinə təsir edəcək. Əslinə baxanda, hər iki ölkənin parlament seçkilərində fövqəladə bir yenilik baş verməyib. O mənada ki, istər Ermənistanda, istərsə də Rusiyada keçirilən parlament seçkilərində hakimiyyəti təmsil edən partiyalar qələbə qazanıb.

O baxımdan, yeni parlamentlər faktorunun doğrudanmı belə təsir gücü olacaq? Bu nəyi dəyişəcək ki?

  • “Rusiya Ermənistanı necə bu vaxta kimi özünün vassalı hesab edirdisə, həmin siyasət bundan sonra da davam edəcək”

Məsələyə münasibət bildirən ekspert Azər Həsrətin sözlərinə görə, bu, iki ölkə münasibətlərinə hansısa yenilik gətirməyəcək: “İki ölkədə yaxın dövrlərdə parlament seçkiləri keçirilsə də, ümumi götürəndə Ermənistan-Rusiya münasibətlərində qeyri-adi heç nə baş vermir. Bundan sonra da bu belə olacaq. Sadəcə olaraq, Paşinyan üzdə Rusiyameyilli olsa da, daxildə Qərbmeyillidir. Ermənistanı Rusiyanın nəzarətindən çıxarıb, daha çox Qərbə inteqrasiya etməyin tərəfdarıdır. Ancaq hazırkı vəziyyətdə Rusiya Ermənistanın tək çıxış yoludur. Ona görə də tərəflər seçkilərdən sonra bir-birinin ünvanına bu cür nəzakət müraciəti edir. Hesab edirəm ki, burada qeyri-adi heç nə yoxdur. O baxımdan bu o demək deyil ki, Ermənistan-Rusiya münasibətlərində yeni bir səhifə açılacaq. Onsuz da Rusiyanın xarici siyasətini Kreml müəyyən edir. Yəni yeni heç nə baş verməyəcək. Rusiya Ermənistanı necə bu vaxta kimi özünün vassalı hesab edirdisə, həmin siyasət bundan sonra da davam edəcək. Ermənistan da indiyə qədər özünü nücə görməyə məcbur olurdusa, bundan sonra da elə olacaq. O baxımdan qeyri-adi nəsə gözləməyə dəyməz. Putin onsuz da Paşinyanın səmimiyyətinə inanmır. Biz əsla belə şeylərdən narahat olmamalıyıq. Ona görə ki, Ermənistandan fərqli olaraq, Azərbaycan müstəqil siyasət yeridir. Bizi düşündürən Azərbaycan xalqının mövqeyi və dövlətimizin maraqlarıdır. Eyni zamanda dövlətin xalqla birliyidir. Burda da problem yoxdur. Ona görə ki, Prezident İlham Əliyevin bütün bunlarla bağlı hər hansı narahatlığı yoxdur”.

Ekspert hesab edir ki, Azərbaycan bundan sonra daha da güclənəcək.

Vidadi ORDAHALLI

Son xəbərlər