Ayətullahın "Şirin quyruğu..." eyhamına Qafqaz Müsəlmanları İdarəsindən sərt reaksiya gözlənilir…

Tural İrfan: “Bu təqlidçilər, hətta tövsiyə xarakterli, sülhə çağıran, ortaq nöqtələrə təmasedici söz demək cəsarətində və ixtiyarında da deyillər”

img

Azərbaycanın öz ərazisində - Gorus-Qafan yolunda nəzarət-buraxılış məntəqəsi qurması İranı əməlli-başlı özündən çıxarıb. İran yük maşınlarının Qarabağa yük daşımalarının qarşısının alınmasına SEPAH qüvvələri Arazın o tayında nizami təlim keçirməklə cavab verib.

Təlimlər Horadizin paralelində yerləşən Aslandüzdən İran Culfasınadək əraziləri əhatə edəcək. Horadizdən Mehri şəhristanına qədər ərazilərimizin işğaldan azad olunduğunu və təlimlərin də məhz bu ərazidə keçirildiyini nəzərə alsaq, İranın bu addımının Azərbaycana nizami müdaxilə ilə təhdid olduğu aydındır. Maraqlıdır ki, İran bu təhdidini yalnız əməli fəaliyyəti ilə deyil, həm də sözlə dilə gətirib. İranın dini lideri Ayətullah Xamneyinin nümayəndəsi, Ərdəbil imamcüməsi ayətullah Seyid Həsən Amili öz cümə xütbəsində Azərbaycana “şirin quyruğu ilə oynamamağı” məsləhət görüb. Xəritəyə baxıb İranı şirə, onun Gorus-Qafan yoluyla nəqliyyat dəhlizini quyruğa bənzətsək, Amili həzrətlərinin nə demək istədiyi aydın olur. Amili xütbəsində Azərbaycana dəstək verən Türkiyə və Pakistanı da hədələyib. Qeyd edək ki, Azərbaycanın dini mərkəzi sayılan Qafqaz Müsəlmanları İdarəsi və onun rəhbəri tərəfindən iranlı mollanın bu açıqlamasına hələ də heç bir reaksiya verilməyib. Azərbaycan dini liderlərinin bu məsələdəki susqunluğu nə ilə bağlıdır?

İlahiyyatçı Tural İrfan “Bakı-Xəbər”ə açıqlamasında bildirdi ki, Ərdəbilin imam-cüməsi Həsən Amili, bir növ, ölkəmizə qarşı təhdidedici ifadələr səsləndirib: “Onun təhdidlərinə bizim din xadimlərimiz və ruhanilərimizin cavab verməməsinə təəssüf etsəm də, təəccüb etmirəm. Çünki bizim axundların əksəriyyəti elə həmin imam-cümənin təqlid etdiyi müctəhidin müqəllidləridir. Müqəllidin də müctəhidin fikirlərinə və ya müctəhidin nümayəndəsinin fikirlərinə qarşı çıxması bu şəxslərin tabe olduqları dini-siyasi xəttə ziddir. Bu təqlidçilər, hətta tövsiyə xarakterli, sülhə çağıran, ortaq nöqtələrə təmasedici söz demək cəsarətində və ixtiyarında da deyillər. Çünki dini məsələlərdə təqlidçilik elə bir şeydir ki, əgər sən təqlid etdiyin müctəhidin fikrinə əks çıxsan, sənin bütün ibadətlərin batil ola, hədər sayıla bilər. Bu və bir çox səbəbdən bizim müqəllidlərin çarəsiz və məzlum durumları anlaşılandır.

İndi niyə və nə cür olub, din mühitimizdə belə bir sistem formalaşıb ki, ruhanilərimizin, din xadimlərimizin böyük əksəriyyəti bizim dövlət siyasətimizin əksinə mövqe tutan, düşmənimizlə dost olan ölkənin ali ruhanilərinin müqəllidinə, müti xadiminə, pərəstişkarına və. s çevriliblər, buna toxunmuram...

Ancaq öz vicdan borcumu yerinə yetirmək xətrinə, Vətən qarşısında cavabdehlik naminə, haqsızlıq qarşısında susmağın şeytanlıq qədər çirkin olduğunu bildiyim üçün deyə bilərəm ki, adıçəkilən şəxs nə dini yöndən, nə qonşuluq baxımından, nə də siyasi tərəfdən doğru mövqe sərgiləməyib. Əgər islami dəyərləri nəzərə alsaq, Quranda Allah-təala vəhy edir ki, müsəlman müsəlmanın qardaşıdır. Müsəlman müsəlmana yardım etməli, onun düşmənini özünün düşməni hesab etməlidir. "Təvəlla", yəni dostlarla dost olmaq; "təbərra", yəni düşmənlərlə düşmən olmaqdır. Faktiki olaraq Ermənistan uzun illərdir Azərbaycan torpaqlarını işğalda saxlayaraq oradakı dini abidələri, məscidləri, kilsələri, qəbirləri, ziyarətgahları viran etdi, vandalizm aktları törətdi və bütün dünya da buna şahid oldu. Ermənistanın bu hərəkətinə susqun qalmaq İmam Əlinin (ə) nəzərincə zalıma yardım etməkdir”.

Məhəmmədəli QƏRİBLİ

Son xəbərlər