Azərbaycanla Rusiya Qarabağ nizamlanmasının iki vacib məsələsini həll edib - medianın maraqlı versiyası...

Məhəmməd Əsədullazadə: “İlk növbədə sərhədlərin delimitasiya və demarkasiyası həll edilməlidir”

img

Ermənistanın “Qraparak” qəzeti yazır ki, Azərbaycan-Rusiya danışıqlarının növbəti mərhələsində Qarabağ nizamlanmasının iki vacib məsələsi praktiki olaraq öz həllini tapıb: “Birincisi, SSRİ-nin xəritələri əsasında Azərbaycanla Ermənistan arasındakı sərhədin demarkasiyası və delimitasiyası. İkincisi, Zəngəzur dəhlizinin Rusiya və Ermənistan sərhədçilərinin nəzarəti altında açılması”.

Qeyd olunur ki, dəhliz boyu sərhəd keçid məntəqələri quraşdırılacaq və azərbaycanlılar yoldan istifadə haqqını ödəyəcəklər. Hətta rəqəm də göstərilir - ildə 150 milyon dollar. Azərbaycan sərhədçilərinin nəzarətinə keçən Gorus-Qafan yoluna gəlincə, erməni KİV-nin yazdığına görə, Rusiya tərəfi Tatev-Qafan dolama yolunun tikintisini maliyyələşdirəcəyinə söz verib. Eyni zamanda danışıqlarda "Artsax" anlayışı heç bir formada qeyd olunmur.

Nəşr onu da yazır ki, parlamentin müdafiə komissiyasının sədri Andranik Köçəryan bu məlumatları nə təsdiq, nə də təkzib edib, amma bunları deyib: “Bütün addımlar sülh dövrünün qurulmasına gətirib çıxaracaq”.

Maraqlıdır, sülh razılaşması ilə bağlı deyilən versiyalar nə dərəcədə real görünür?

  • “Sülh sazişinin bağlanması məsələsində Rusiyadan çox şey asılıdır”

Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə prizmadan yanaşdı. Onun fikrincə, sülh sazişinin bağlanması məsələsində Rusiyadan çox şey asılıdır: “Ermənistanla Azərbaycan arasında sülhün əldə edilməsi istiqamətində ilk növbədə Rusiya tərəfi İrəvandan 10 noybr və 11 yanvar razılaşmalarına əməl edilməsini tələb etməlidir. Çünki Rusiya burada əsas tərəfdir və sülhün əldə edilməsinə ədalətli yanaşmalıdır. Rusiyanın iştirakı ilə danışıqlar davam edir. Təbii ki, ilk növbədə sərhədlərin delimitasiya və demarkasiyası həll edilməlidir. Azərbaycan bunu bir neçə aydır ki, Ermənistandan tələb edir. Ancaq buna baxmayaraq, Ermənistan rəhbərliyi hələ də öz ampluasında qalır və ATƏT-in Minsk Qrupu çərçivəsində sülhün əldə edilməsi şərtini irəli sürür. Ona görə də Ermənistanda müəyyən mətbuat orqanları bu kimi informasiyalara ehtiyatla yanaşılmalıdır. Ermənistan, əlbəttə ki, Azərbaycanın ərazi bütövlüyünü tanıyacaq. Çünki Qarabağ məsələsi bitib və onu yenidən danışıqlar masasına gətirmək mümkün deyil. Ermənistan inkişaf etmək istəyirsə, Azərbaycanla münasibətləri normallaşdırmalıdır”.

Politoloq onu da qeyd etdi ki, sülh danışıqları ilə bağlı bir sıra məsələlərə yaxın aylarda aydınlıq gələcək.

Vidadi ORDAHALLI

Son xəbərlər