Ermənistanın müdafiə naziri Arşak Karapetyanın Moskvaya intensiv səfərlərinin əsl niyyəti məlum olub. Bildirilir ki, bunun əsas məqsədi Rusiyadan silah tədarük etmək olub. Karapetyan Moskvada səfərdə olarkən erməni mətbuatında 100 milyon dollarlıq növbəti kredit xəttinin ayrılması barədə məlumatlar yayıldı.
Bu vəsaitə İrəvanın Moskvadan hansı silahlar alması mümkündür? Qeyd edək ki, Rusiya kredit adı ilə əslində silahları Ermənistana pay verir. Çünki həmin ölkənin krediti geri qaytarmağa maddi imkanı yoxdur. Belə bir tranşı Rusiya 2018-ci ildə də etmişdi. Ancaq erməni hərbi ekspertləri yazır ki, bu məbləğlik silahla Azərbaycanla rəqabət aparmaq mümkün deyil.
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Azərbaycanın 44 günlük müharibədə əldə etdiyi uğur bəzi ölkələr tərəfindən həzm edilmir: “Bu da ona gətirib çıxarır ki, hansısa ölkələr buna əks təsir göstərmək, nələrsə etmək istəyir. Bunun da başında Rusiya, Fransa, İran dayanır. ABŞ da arada lobbiçiliklə təsir etmək istəyir. Erməniləri dəstəkləyən ölkələr və dünyadakı erməni lobbisi yenidən həmin ölkəni müharibəyə təhrik edir. Birinci Qarabağ müharibəsindən sonra Rusiya uzun müddət Ermənistana kredit adı ilə külli miqdarda silah verdi. Həmin silahların əksəriyyətini biz paytaxtda yaradılan Hərbi Qənimətlər Parkında görürük. Hazırda da Rusiya həmin siyasətini davam etdirir. Kredit burada görüntü üçündür. Reallıqda isə həmin silahları Ermənistana pay verirlər. Ermənistan rəzil gündə olan ölkədir. Onun silah almağa pulu hardandır? Üstəlik, hər necə silahlandırsalar da, onların Ermənistana heç bir faydası olmayacaq. Qələbə bayrağını qaldırmağa qüdrətli əsgəri olmayan ölkənin nə qədər silah əldə etməsi önəmli deyil. Ermənistan ordusunu biz hərb meydanında darmadağın etmişik. Onlar ağır psixoloji durumdadırlar. Belə vəziyyətdən çıxmaqlarına uzun illər lazımdır. Ermənistan ordusunda döyüş qabiliyyəti sıfrdadır. Ordan-burdan nəsə gətirməklə iş bitmir. Azərbaycanın arsenalında olan silahlarla biz onların uzun illərdən bəri topladıqları arsenalı bir neçə günə darmadağın etdik. Bu gün də həmin silahlar bizim istifadəmizdədir və düşmənə qarşı hazır vəziyyətdə dayanıb. Onların hər addımına qarşı adekvat addımlarımız var. Ermənistanın bizdə olan müasir silahları alması üçün qüdrəti yoxdur. Rusiyanın verdiyi silahlar isə uzun illər istifadədə olanlardı ki, belə texnika ilə nəsə etmək, bizimlə rəqabət aparmaq mümkün deyil. Biz hətta onların ən müasir silahı olan S-300 raketlərini də məhv etdik. Rusiya bu yolla öz arsenalındakı köhnə silahları təmizləyir. Bu səbəbdən də bu cür cılız silahlanma yolu ilə Ermənistan və onun havadarları bölgədəki güc balansını dəyişə bilməyəcək. Azərbaycan da tək deyil. Bizim Türkiyə və Pakistan kimi yaxın dostlarımız var. Lazım olacağı təqdirdə onlar da bizə istənilən hərbi yardımı göstərməyə hazırdırlar. Ermənilər revanşist hisslərdən əl çəkməsələr, yenə də başlarının üstündə dəmir yumruğu görəcəklər”.
Məhəmmədəli QƏRİBLİ
