Rusiya Müdafiə Nazirliyinin özünüifşa xəbəri - Şuşa istiqamətində "iki erməni silahlısı yaralanıb" nə deməkdir...

Rövşən Rəsulov: “Bu amillər artıq əndazəni aşan və xoş olmayan gerçəkliklərdir ki, Rusiya MN həmin addımları ilə əslində özünü ifşa etmiş olur”

img

Rusiya Müdafiə Nazirliyi, erməni tərəfinə istinadən, guya Azərbaycan Ordusunun bölmələri tərəfindən atəşin açılması nəticəsində sentyabrın 17-də Şuşa istiqamətində 2 erməni silahlısının yaralanması barədə məlumat yayıb. 

Azərbaycan Müdafiə Nazirliyi isə Rusiya MN-in yaydığı məlumatın həqiqəti əks etdirmədiyini, yalan olduğunu bəyan edib.

Qeyd edək ki, Rusiya Müdafiə Nazirliyi birinci dəfə deyil ki, belə təxribatlar yayır. Bundan əvvəl də yaymışdı ki, guya Azərbaycan atəşkəsi pozub və sair.

Rusiya MN nə üçün belə təxribatçı xəbərlər yayır?

  • “On aydan artıqdır ki, RSK-nın və tabe olduğu Rusiya MN-nin oxşar təxribatlarını...”

Siyasi ekspert Rövşən Rəsulov bizimlə söhbərində qeyd etdi ki, Rusiya Müdafiə Nazirliyi bununla özünü bir daha ifşa edib: “Rusiya sülhməramlıları kontingentinin (RSK) Qarabağda məsul olduqları ərazilərdəki fəaliyyətləri barədə artıq bir sıra narazılıqlar mövcuddur və onların məsul olduqları suveren bölgələrimizdə üzərlərinə düşən öhdəliklərə əməl etməmələri, habelə üçtərəfli bəyanatda qəbul olunmuş bəndlərin icrasını həyata keçirməmələri haqlı olaraq Azərbaycanın ictimai rəyində suallar doğurmaqdadır. Xüsusilə qanunsuz erməni silahlılarını “formalaşma” adlandırmaları, onları Azərbaycan torpaqlarından çıxarmaq yerinə gözlərinin qarşısında müdafiə istehkamları qurmalarına, səngər qazmalarına göz yummaları, Laçın dəhlizində yaratdıqları problemlər və s. Kimi çoxsaylı faktlar artıq bu məsələnin çərçivədən çıxması anlamını daşımağa başlayıb.

Xüsusilə Rusiya Müdafiə Nazirliyinin bu və ya digər şəkildə yaydığı rəsmi məlumatlarında Azərbaycanın tarixi toponimlərindən istifadə etməməsi, erməni silahlı quldurlarının Azərbaycan hərbçilərinə atəş açmalarının qarşısını almamaları, cavabında isə hərbçilərimizin atəş açaraq düşməni susdurması faktlarını da məhz təqsirkar qismində Bakının üzərinə yıxmaq cəhdləri, yumşaq desək, aşkar həyasızlığın sübutudur. Biz on aydan artıqdır ki, RSK-nın və tabe olduğu Rusiya MN-in oxşar təxribatlarını təəssüflə müşahidə etməkdəyik. Və əgər bu gün Moskva Bakının nəyə görə RSK-ya rəsmi mandat vermədiyini sual edirsə, ilk əvvəl öz əməllərinə, fəaliyyətinə yenidən nəzər salmalıdır. Bu amillər artıq əndazəni aşan və xoş olmayan gerçəklilərdir ki, Rusiya MN həmin addımları ilə əslində özünü ifşa etmiş olur.

Təsəvvürünüzə gətirin ki, bir neçə gün əvvəl Şuşa ətrafında separatçı quldur dəstələrinin açdığı atəşə cavab atəşləri açan Azərbaycan hərbçiləri dərhal RSK və tabe olduğu Rusiya MN tərəfindən hədəfə alınaraq suçlandılar. Üstəlik, erməni KİV-i dərhal iki rus hərbçisinin yaralandığını iddia etdi. Sonra isə aydın oldu ki, yaralananlar elə separatçıların özləriymiş. Məgər bunu araşdırmaq onlar üçün bu qədərmi çətin bir məsələdir? Yoxsa Azərbaycan tərəfini ittiham etmək üçün onlara bənzər bəhanələr lazımdır? Əgər belədirsə, açıq-aydın öz real münasibətlərini ortaya qoysunlar ki, biz də nə istədiklərini anlayaq”. 

R.Rəsulovun fikrincə, bu baxımdan, artıq Azərbaycan tərəfi gecikmədən antiterror əməliyyatlarını həyata keçirmək hüququndan istifadə edə və separatçı-quldur rejimin fəaliyyətinə son qoya bilər. “Bu, suveren, sərhədləri beynəlxalq çərçivədə tanınan ölkəmizin tam və birmənalı hüququdur. Təsəvvürünüzə gətirin ki, 44 günlük Vətən müharibəsi dövründə Bakının mövqeyini dəstəkləyən rusiyalı politoloqlar, konfliktoloqlar və hərbi ekspertlər də bu gün eyni düşüncəni paylaşırlar, erməni separatçılığına birdəfəlik son qoyulması prosesinin reallaşdırılması vacibliyindən danışırlar. Əgər bu gün Rusiya MN mövcud yanaşmalarından əl çəkməzsə, Bakının da səbrinin tükənməz olduğunu düşünməməlidir” - deyə siyasi ekspert vurğuladı.

İradə SARIYEVA

Son xəbərlər