Ermənistan 44 günlük müharibədəki kapitulyasiyadan sonra imzalanan üçtərəfli sənədin bəzi bəndlərini öz xeyrinə yozmaq üçün yollar axtarır. Hətta bu istiqamətdə daxili auditoriyanı belə aldatmaq üçün media resursları və ekspertləri cəlb ediblər.
Məsələn, həmin ekspertlərdən biri olan Artyom Yerkaryan iddia edib ki, Laçın dəhlizi ilə Qarabağa başqa ölkə vətəndaşlarının, o cümlədən fransalıların girişinə Bakının qadağa qoymaq hüququ yoxdur, çünki 10 noyabr 3-tərəfli sazişində bu qadağa haqda heç nə deyilmir. Sitat: “Orada yalnız göstərilib ki, Azərbaycan hər iki istiqamətdə vətəndaşların, nəqliyyat vasitələrinin və malların Laçın dəhlizi boyunca hərəkətinin təhlükəsizliyinə zəmanət verir”.
Düzdür, sənədin 6-cı bəndində belə bir cümlə yer alıb, ancaq ermənilər onu tam oxumur. Həmişəki kimi, həmin bəndi öz xeyirlərinə yozmağa çalışırlar.
Laçın dəhlizi hansısa xarici ölkə vətəndaşları üçün açılmayıb. Dəhliz yalnız Qarabağdakı erməni əhalinin Ermənistanla humanitar əlaqəsinin saxlanması üçün və Bakının razılığı ilə müvəqqəti yaradılıb. Dəhlizə nəzarət isə 5 illiyinə Rusiya sülhməramlılarına tapşırılıb.
Demək, Laçın dəhlizi öz təyinatına uyğun fəaliyyət göstərməlidir. Laçın humanitar dəhlizindən başqa məqsədlər üçün istifadə qanuni sayıla bilməz. Azərbaycanın buna etiraz etməyə haqqının olmadığını iddia etmək isə yalnız erməni həyasızlığından irəli gələ bilər.
Laçın dəhlizi və bütün Qarabağın de-yure Azərbaycana məxsus olduğunu təsdiqləyən ən güclü dəlil Rusiya sülhməramlılarının qalıb-qalmaması məsələsində həlledici sözün Bakıya məxsus olmasıdır.
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Ermənistanın bu iddialarının heç bir əsası yoxdur: “Çünki 10 noyabr bəyanatında aydın şəkildə yazılıb ki, Laçın dəhlizi Qarabağla Ermənistanın arasındakı əlaqəni təmin etmək üçündür. Həmin sənəddə hansısa üçüncü ölkənin yüklərinin daxil olması, yaxud üçüncü ölkə vətəndaşlarının dəhlizdən istifadəsinə dair heç bir bənd yoxdur. Humanitar dəhliz olduğuna görə Ermənistanla Qarabağ arasında əlaqə ilə bağlı heç bir məhdudiyyət qoyulmayıb. Hətta bəzi təxribatçı ünsürlərin ora səfərinə də biz ciddi etiraz etmirik. Köçəryan gəlir, son vaxtlar Paşinyan qorxusundan gəlmir. Həmin bəndə əsasən biz etiraz etmirik. Ancaq üçüncü ölkələrin avtomobillərinin, yüklərinin və nümayəndələrinin Azərbaycanın rəsmi icazəsi olmadan Qarabağa girməsinə icazə yoxdur. Çox qəribədir ki, 10 noyabr bəyanatından ermənilər hansısa gaydaları öz xeyirlərinə şərh etməyə çalışırlar. Bir bəndi oxuyurlar, ancaq ondan əvvəl yazılanları nədənsə oxumaq istəmirlər. Bütün bunlar həmin bəyanatın təhrifinə yönələn addımlardı. Azərbaycan tərəfi bu cür detallara çox ciddi şəkildə yanaşmalıdır. Yeri gəlmişkən deyim ki, arada xarici ölkə vətəndaşlarının həmin dəhlizdən ölkəmizə daxil olmasına rus sülhməramlıları imkan verməmişdi. Hətta onlara məsləhət görmüşdülər ki, Azərbaycandan icazə alsınlar. Həmin nümayəndələr də Fransadan ora səfər edirdi. Yaxşı olardı ki, dəhlizə nəzarət edən rus sülhməramlıları bir dəfə deyil, hər zaman ora bu formada nəzarət etsinlər. Hansısa xarici ölkənin vətəndaşı və ya yükləri yalnız bizim icazəmizlə Qarabağa keçə bilər. Bununla bağlı hər hansı bəndlərə istinad etmək pozuntudan başqa nəsə deyil”.
Məhəmmədəli QƏRİBLİ
