Azərbaycanla sazişsiz Paşinyanın Ərdoğana yaxınlaşmaq cəhdlərinin mənası...

Yeganə Hacıyeva: “Ərdoğanın Paşinyan qarşısında qoyduğu şərt elə “get İlham Əliyevlə razılaş, sonra gəl” anlamını daşıyır”

img

Türkiyə Prezidenti Rəcəb Tayyib Ərdoğan BMT Baş Assambleyasının toplantısında iştirak etmək üçün Nyu-Yorka səfərdən öncə keçirilən mətbuat konfransında Paşinyanın onunla görüşmək istəyinə reaksiya verib. Türkiyə Prezidenti deyib ki, Nikol Paşinyan onunla görüşmək istəyirsə, Ermənistanın müsbət addımlar atması lazımdır:

“Gürcüstanın Baş naziri Nikol Paşinyanın görüş keçirilməsi ilə bağlı təklifini mənə çatdırıb. Ancaq bunun üçün Ermənistanın müsbət addımlar atması lazımdır. Bu görüş baş tutarsa, Türkiyə də diplomatik əlaqələrə başlayar”. R.T.Ərdoğan ümid etdiyini bildirib ki, Azərbaycan-Ermənistan münasibətlərindəki çətinlik Zəngəzur koridorunun açılması ilə aşılmış olar.

Əslində, Türkiyənin mövqeyi başadüşüləndi. Qardaş ölkə əvvəllər də sərhədlərin açılmasında Azərbaycanla bağlı amilləri önə çəkirdi. Ancaq Paşinyanın bu məsələdəki gedişi hiyləgərlik kimi qiymətləndirilə bilər. Hazırda gündəmdə olan məsələ Ermənistanın Azərbaycanla sülh sazişi hazırlamasıdır. Paşinyan bilir ki, bunu etməklə elə Türkiyə ilə də münasibətlərini normallaşdıra bilər. Bundan əlavə, Türkiyə ilə vasitəçiliyi İlham Əliyev Gürcüstanın baş nazirindən daha yaxşı edə bilər. Çünki daha qlobal problemlərin həllində İlham Əliyevin vasitəçilik səyləri səmərə verib. Paşinyan niyə bizim başımızın üstündən Türkiyə ilə yaxınlaşmaq yolunu seçir?

Politoloq Yeganə Hacıyeva “Bakı-Xəbər” qəzetinə açıqlamasında bildirdi ki, 44 günlük müharibədən sonra  Paşinyan Ermənistanın öz qonşuları ilə münasibətlərinin normallaşması istiqamətində bir xarici siyasət xətti ortaya qoyub:  “Bunun nə qədər səmimi istək olması isə başqa bir mövzudur. Buna rəğmən, Paşinyan ilin sonuna kimi irəliləyişə dair bir hesabat ortaya qoymaq istəyir. Çalışır ki, uğur kimi təqdim edəcəyi məqamlar olsun. Ermənistan parlamentində çox güclü müxalifət var.  Paşinyan onlara mütləq nəsə uğur hekayəsi təqdim etməlidir ki, başları qarışsın. Ermənistan məcburən buna gedir. Məsələn, bizimlə sərhəddə demarkasiya və delimitasiyanı etməyə məhkumdur. Ərdoğanla görüşə gəldikdə isə, bunun üçün Ermənistan müəyyən addımları atmalıdır. Onların ideologiyasında olan saxta “soyqırım” iddiaları artıq öz aktuallığını itirib. Əvvəlcə, Ermənistan bundan imtina etməlidir. Sonra Konstitusiyasında olan Türkiyəyə ərazi iddialarından imtina etməlidir. Nikol Paşinyan fikirləşir ki, bütün dünya Türkiyəyə təzyiq kimi bu kartdan istifadə edirsə, elə ən doğrusu bu olar ki, ondan özləri yararlansın. Amma məsələnin daha tez həll olunması üçün Paşinyan həm də Azərbaycanla olan problemlərini həll etməlidir. Daha doğrusu, üzərinə götürdüyü öhdəlikləri icra etməlidir. Bunlardan birini Ərdoğan şərt kimi ifadə edib. Biz də görürük ki, Ermənistanın Türkiyə ilə yaxınlaşması Azərbaycanın başının üzərindən mümkün deyil. Paşinyan bunu Gürcüstan vasitəsilə etmək istəsə belə, Türkiyənin şərtləri əvvəlki kimi qalır. Əslində Ermənistanla Türkiyə arasındakı sərhədlərin açılması üçün ciddi bir maneə də yoxdur. Sadəcə, Türkiyə həmin sərhədləri əsasən Qarabağ probleminə görə bağlamışdı. Proqnozum budur ki, müəyyən saziş olacaq.  Bu razılaşmada Azərbaycanla bağlı maraqlar mütləq nəzərə alınacaq. Cünki Ermənistanın bundan başqa çıxış yolu qalmır. Yəqin ki, ilin sonuna qədər bu istiqamətdə irəliləyişlər olacaq. Ərdoğanın Paşinyan qarşısında qoyduğu şərt elə “get İlham Əliyevlə razılaş, sonra gəl” anlamını daşıyır”.

Məhəmmədəli QƏRİBLİ

Son xəbərlər