Son günlər erməni mediasında, sosial şəbəkələrdə Ermənistanın Uxtasar yüksəkliyini Azərbaycana təhvil verdiyi barədə məlumat yayılıb. Ermənistan Müdafiə Nazirliyi isə yayılan məlumatı təkzib edərək, bunu dezinformasiya adlandırıb. Bu ölkənin Müdafiə Nazirliyi bildirib ki, Ermənistan Azərbaycana heç bir yüksəklik, ərazi güzəştə getməyib.
Gördüyümüz kimi, Ermənistanın Müdafiə Nazirliyi rəsmi şəkildə bəyan edir ki, biz Azərbaycana sərhədlərdən heç bir ərazi güzəştə getməmişik, yayılan məlumatlar dezinformasiyadır. Lakin Fransa başda olmaqla, bəzi Qərb dövlətləri bəyanat verirlər ki, “Azərbaycan Ermənistanın torpaqlarına girib, o torpaqlardan geri çıxmalıdır”. Ermənistan özü deyir ki, Azərbaycan bizim torpaqlara girməyib, heç bir ərazi verməmişik, amma bəzi dövlətlər Azərbaycanı Ermənistanın torpağına girməkdə, ərazi tutmaqda ittiham edir.
Bəzi dövlətlərin Azərbaycana qarşı bu əsassız ittihamı nə deməkdir, bu nədən qaynaqlanır? Ermənistan deyilənləri rəsmən təkzib etdiyi halda, Fransanın və bəzi başqa dövlətlərin dərdi nədir?
“Ermənistanda hakimiyyət başında olanlar düşünməlidir ki, belə təxribatçı bəyanatlar təkcə Azərbaycana qarşı deyil, həm də Ermənistanın, ermənilərin özünə qarşıdır”
Siyasi şərhçi Azər Həsrət hesab edir ki, bəzi xarici ölkələrin Azərbaycana qarşı təxribatçı mövqe tutması ilk hadisə deyil, dəfələrlə Azərbaycana qarşı bu kimi şər-böhtan kampaniyaları aparılıb, yalan dolu bəyanatlar verilib: “Bilirik ki, Azərbaycan dövləti müharibə dövründə də dəfələrlə bəyan edib ki, heç bir dövlətin, o cümlədən də Ermənistanın torpağında gözümüz yoxdur. İkinci bir tərəfdən də, 44 günlük müharibə sonucu Azərbaycan Ermənistanın bir qarış da olsun torpağına daxil olmayıb. Müharibə gedən günlərdə belə bizim əsgərimiz Ermənistan ərazisinə daxil olmayıb, günü bu gün də Azərbaycan əsgəri, hərbçisi, mülki vətəndaşı Ermənistan ərazinə girməyib, sərhəddən içəri adlamayıb. Yəni Sovet dönəmində iki respublika arasında mövcud olmuş sərhəddə Azərbaycan sərhədçiləri dayanır, bundan Ermənistan çox narahat da deyil. Ermənistanın Baş naziri Nikol Paşinyan da artıq bunu öz xalqına həzm etdirmək üçün çalışır. Yəni belə bir durum varkən kiminsə hardasa nə isə uydurması, guya Ermənistanın hansısa yüksəkliyi bizə verməsi iddiası ilə çıxış etməsi qətiyyən yolverilməzdir. Digər tərəfdən də, Azərbaycanın da, Ermənistanın da bu əsassız iddiaları təkzib etməsinə baxmarayaraq, bəzi ölkələrin dezinformasiya yayması, Azərbaycanı “Ermənistan ərazisinə” girməkdə ittiham etməsi qəbuledilməzdir. Bəzi ölkələrin “papadan artıq katoliklik” etməyə qalxması bir daha onu göstərir ki, o dövlətlər Azərbaycana qarşı qərəzlidir, ümumiyyətlə, Azərbaycanla dinc, bərabər qonşuluq şəraitində yaşamaq onları qane etmir. Bu bir daha onu göstərir ki, əslinə qalanda bizimlə münaqişədə olan Ermənistan bu cür dövlətlərin fitvasına gedib, yolunu azıb və Azərbaycan torpaqlarını işğal edibmiş. Və bu gün də Ermənistanda hakimiyyət başında olanlar düşünməlidir ki, belə təxribatçı bəyanatlar təkcə Azərbaycana qarşı deyil, həm də Ermənistanın, ermənilərin özünə qarşıdır. Həmin ölkələr yenidən Ermənistanı müharibəyə sürükləmək, savaş durumuna gətirmək istəyirlər. Bundan da, əlbəttə ki, zərər çəkən tərəf ermənilər olacaq. Buna görə də, düşünürəm ki, Ermənistan da Azərbaycan qədər bu məsələlərdə diqqətli olmalıdır, təxribatçılara imkan verməlidir”-deyə A.Həsrət qeyd etdi.
Yeri gəlmişkən, bəzi siyasi şərhçilər deyir ki, Fransanın və bəzi başqa ölkələrin suyu bulandırmaqda məqsədi Azərbaycan və Ermənistan arasında gözlənilən sülh müqaviləsinin bağlanmasına mane olmaq, daha çox təxribatlar törətməklə, Azərbaycana qarşı şər kampaniyasını davam etdirməklə yeni problemlər yaratmaqdır.
İradə SARIYEVA
