Ermənistan hakimiyyəti son vaxtlar Türkiyə və Azərbaycanla münasibətlərin normallaşdırılmasına yönəlik mesajlar verir. Guya ki, bunlar münasibətlərin yaxşılaşmasında maraqlıdılar.
Ancaq eyni vaxtda İrəvan şəhər meriyasında Ağsaqqallar Şurası “erməni soyqırımı”nın təşkilatçılarından qisas alanlara şəhərin mərkəzində abidə qoyulması qərarı verib. Şəhər merinin müşaviri Kamo Areyan bildirib ki, “erməni soyqırımı”nın təşkilatçılarından qisas alanlara abidənin şəhərin mərkəzində, Şahmat evindən çox da uzaq olmayan yerdə qoyulması planlaşdırılır.
Qərarda deyilir ki, abidə 7 terrorçuya qoyulacaq. Hansı ki, bu qatillər Türkiyə və Azərbaycan dövlət xadimlərini qətlə yetirdiklərinə görə ermənilərin milli qəhrəmanları hesab olunur. Abidəsi qoyulacaq terrorçular bunlardır:
1. Aram Erkanyan - 1922-ci ildə Berlində Türkiyə dövlət xadimi Bahəddin Şakiri, 1920-ci ilin iyununda Tiflisdə Azərbaycan Xalq Cümhuriyyətinin xarici işlər naziri olmuş Fətəli xan Xoyskini qətlə yetirib.
2. Soqomon Teyleryan - 1921-ci ildə Berlində Türkiyə dövlət xadimi Tələt paşanı qətlə yetirib, Berlin məhkəməsi ikiüzlülük edərək ona bəraət verib.
3. Misak Torlokyan - 1921-ci ildə İstanbulda Azərbaycan Xalq Cümhuriyyətinin Daxili işlər naziri olmuş Behbud bəy Cavanşiri qətlə yetirib.
4. Arşavir Şirakyan - 1921-ci ildə Romada Osmanlı imperiyasının böyük vəziri Səid Halim paşanı və 1922-ci ildə Berlində Trabzon valisi olmuş Camal Əzmi bəyi qətlə yetirib.
5. Petros-ter Poqosyan - 1922-ci ildə Tiflisdə Türkiyə hərbi dəniz naziri Əhməd Camal paşanı qətlə yetirib. Cinayəti Artaşes Gevorkyanla birlikdə həyata keçirib.
6. Artaşes Gevorkyan - Əhməd Camal paşanı Petros ter Poqosyanla birlikdə öldürüb.
7. Akop Melkumov- 1922-ci ildə Türküstanda Ənvər paşanın ordusuna qarşı vuruşub.
Bax, budur erməni xisləti. Bundan əvvəl İkinci Dünya müharibəsində faşistlərə xidmət edən ermənilərə abidə ucaldıldı. İndi də türklərə qarşı terror aktlatı törədən qatillərin adları əbədiləşdirilir.
“Bütün bunlar sülhə bəslənən ümidləri baltalayır”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, bütün bunlar erməni xislətini ortaya qoyur. Bununla yanaşı, o bunun arxasında digər məqamların da olduğunu qeyd etdi: “Məsələ ondadır ki, Ermənistanda vahid bir ideya ətrafında birləşmə yoxdur. Məsələn, 44 günlük müharibə dövründə Azərbaycanda xalqla dövlət arasında milli birlik yarandı. Onlarda isə bu yoxdur. Ermənistanda hazırda Rusiyapərəst qüvvələr var və onlar Paşinyanı devirmək istəyir. Onların hamısı antitürk, anti-Azərbaycan mövqedə dayananlardır. Ermənistanda elə qüvvələr var ki, antitürk olsalar da, Rusiyadan yox, Fransadan idarə olunurlar. Hər vasitə ilə bu qüvvələr çalışır barışıq olmasın. Hakimiyyət də zəif olduğuna görə bu təzyiqlərin qarşısında duruş gətirə bilmir. Məsələn, Paşinyan seçkilərdə Köçəryana qalib gəlsə də, ölkədə Rusiyanın mövqeyi güclüdür. Onlar bu cür layihələrlə terrorçulara abidə qoymaqla yenə düşmənçiliyi qızışdırmaq istəyirlər. İndiki vaxtda 7 terrorçunun adının əbədiləşdirilməsi bundan irəli gəlir. Hakimiyyət buna getməklə, revanşistlərin təzyiqini neytrallaşdırmaq istəyir. Ancaq Ermənistanda elə ziyalılar var ki, onlar Türkiyə və Azərbaycanla barışıqda maraqlıdır. Əhali də müharibə istəmir. Ən azı ona görə ki, İkinci Qarabağ müharibəsində böyük itki verdilər. Lakin xaricdən himayə olunan radikal revanşist qüvvələr isə sülhə mane olmağa çalışırlar. Bu səbəbdən faşist Qaregin Njdedən sonra 7 terrorçuya abidənin qoyulması gündəmə gətirilib. Bütün bunlar sülhə bəslənən ümidləri baltalayır. Bu da Ermənistana fayda gətirməz. Ona görə də qarşı tərəf buna son qoymalıdır”.
Professor hesab edir ki, əks təqdirdə bunun Ermənistan üçün nəticələri pis olacaq.
Vidadi ORDAHALLI
