Rusiya Xarici İşlər Nazirliyi (XİN) Gorus-Qafan yolunda Azərbaycan tərəfinin İranın yük avtomobillərini saxlamasına münasibət bildirib.
Rusiya XİN-in rəsmi nümayəndəsi Mariya Zaxarova keçirdiyi brifinqdə deyib ki, Ermənistan-Azərbaycan sərhədinin ayrı-ayrı məntəqələrindəki vəziyyəti diqqətlə izləyirlər: “Varatan kəndi yaxınlığındakı vəziyyətin inkişafı bir daha Ermənistan-Azərbaycan sərhədinin delimitasiya və demarkasiya prosesinə tezliklə başlanmasının vacib olduğunu təsdiq edir. Bu barədə Rusiyanın təklifi həm Bakıya, həm də İrəvana təqdim olunub. Biz bundan sonrakı kursun formalaşması üçün cavab gözləyirik”.
Zaxarova yenə də Rusiyanın adından verdiyi bəyanatda demarkasiya və delimitasiya prosesi ilə bağlı məsələdə doğru olmayaraq məsuliyyətləri tərəflər arasında eyniləşdirir. Məlumdur ki, Azərbyacan hər zaman bu prosesə hazır olduğunu bəyan edir. Prosesi açıq şəkildə sabotaj edən tərəf isə bununla qalmayıb, şərtlər irəli sürür. Həmin şərtlərdən birini ABŞ-ın İrəvandakı səfiri dilə gətirdi ki, hərbi əsirlər (erməni diversantları-red) təhvil verilməsə, Ermənistan Azərbaycanla dialoqa hazır deyil. Bu şərti dəfələrlə erməni rəsmiləri də işlədib. Bütün bunları Zaxarova təbii olaraq bildiyi halda niyə tərəflər arasındakı məsuliyyət məsələsini eyniləşdirir? Şərtlərə qalsa, Azərbaycan da kifayət qədər əsaslı tələblər irəli sürər. Məsələn, deyə bilər ki, minalanmış ərazilərin bütün xəritələri verilməyincə proses ləngiyir. Ancaq biz görürük ki, Azərbaycan bunu etmir.
Politoloq Elşən Mustafayaev “Bakı-Xəbər”ə açıqlamasında bildirdi ki, prosesi yubadan Ermənistandır: “Açıq şəkildə deyirlər ki, Azərbaycanla sülh sazişini imzalamağa, Azərbaycanın ərazi bütövlüyünü, sərhədlərini tanımağa hazır deyil. Azərbaycanı Beynəlxalq Məhkəməyə verir. Bunlar faktiki olaraq müharibə etməyə bərabər fikirlərdir. Ermənilər deyir ki, Zəngəzur koridorunu açmağa razı deyillər. Ermənistan o koridora bir dövlət kimi nəzarət etmək istəyir. Ermənistan nə vaxtdan öz sərhədlərinə nəzarət edən olub? Bəllidir ki, onun bütün sərhədlərini rus hərbçiləri qoruyur. Ermənistan sərhədlərini, o cümlədən Zəngəzurda İranla sərhədləri də Rusiyanın sərəncamına verib. 10 noyabr 2020-ci ildə imzalanmış üçtərəfli sazişdə də qeyd olunub ki, Naxçıvandan Azərbaycana açılan yola Rusiya sərhədçiləri nəzarət edəcək. İndi Ermənistan Rusiya ilə sərhədlərin birgə qorunmasına dair sazişdən imtina etmək istəyir. Yəni Ermənistan sazişin tələblərini yerinə yetirməkdən boyun qaçırır. Rusiya rəsmiləri yaxşı olar ki, bu faktı dilə gətirsinlər. Azərbaycan delimitasiya, demarkasiya işlərini sürətlə həyata keçirməkdə maraqlıdır. Ermənistan Gorus-Qafan yolu ilə bağlı İrana şikayət etmişdi. İran da bildirdi ki, Azərbaycanda delimitasiya, demarkasiya işlərini sürətləndirmək lazımdır. Dövlətlərarası münasibətlər sərhədlərin tanınmasandan keçir. Delimitasiya və demarkasiya fonunda Qazaxın 7 kəndi və Naxçıvanın Kərki kəndi ilə bağlı məsələ də həll edilməmiş qalır. Üçtərəfli sazişin ilkin layihəsində bu bənd var. Ermənistan Zəngəzur dəhlizini də yubadır. Bütün bunlar bir daha sübut edir ki, prosesi sabotaj edən Ermənistandır. Yaxşı olardı ki, Zaxarova hər şeyi öz adı ilə çağırsın”.
Məhəmmədəli QƏRİBLİ
