Əhəd Məmmədli: “Düşünürəm ki, o bunu deyəndə Rusiyanı nəzərdə tutur”
Ermənistanın baş naziri Nikol Paşinyan ölkə parlamentində bəyan edib ki, onlar qoşunlarını Sovet sərhədlərinə çəkməsəydi, bu, fəlakətli bir səhv olardı. Paşinyanın sözlərinə görə, bu qərar Ermənistanın ərazi bütövlüyünü və suverenliyini qorumaq üçün qəbul edilib. Eyni zamanda, qərar təkbaşına qəbul olunmayıb, müzakirələr və dərin təhlillər əsasında qəbul olunub: "Düzdür, sonradan həmin müzakirələrin bəzi iştirakçıları xəbərsiz olduqlarını bildirdilər".
Onun sözlərinə görə, bununla da sovetdən qalma inzibati sərhəd dövlət sərhədinə çevrilib: “Gorus-Qafan avtomobil yolu iki yerdə Ermənistan Respublikası və ya Sovet Ermənistanı ərazisindən çıxır. Məhz buna görə də məlum rayonlarda hamının bildiyi trafaretlər və dayaq məntəqəsi yaradılıb”.
N.Paşinyan bildirib ki, 2020-ci ilin dekabrında bu yoldan nəqliyyat vasitələrinin tranziti kimi istifadə edilməsinə dair razılıq əldə olunub: “Razılaşmanın mətnində xarici ölkələrə məxsus yüklərin daşınması nəzərdə tutulmadığından, ehtimal edirəm ki, bu şəraitdə Azərbaycan tərəfi həmin məqamdan istifadə edir”.
Paşinyan qeyd edib ki, bu qərarı tək verməyib. Maraqlıdır, bu yöndə müzakirələri o kiminlə apara bilərdi?
Politoloq Əhəd Məmmədli “Bakı-Xəbər”ə açıqlamasında bildirdi ki, Paşinyanın bunun doğruluğunu etiraf etməkdən başqa çarəsi qalmır: “Çünki gördü ki, sərhədlərin dəqiqləşdirilməsi ilə bağlı etdikləri çığallıqlar fayda vermədi. Bizim aramızdakı sərhədlər SSRİ dönəmində olub. Ölkələr müstəqillik əldə edəndən sonra münaqişə səbəbindən həmin sərhədləri dəqiqləşdirmək mümkün olmadı. Çünki bir sıra ərazilər Ermənistanın işğalı altına düşmüşdü. Hazırda Azərbaycanla sərhəd həmin xəritələr əsasında müəyyənləşir. Ermənistanın tabe olmaq istəmədiyi yerlərdə Azərbaycan ordusu özü lazım olanı təmin edir. Bəli, bu məsələ ilə bağlı qərarı Paşinyan tək verməyib. Düşünürəm ki, o bunu deyəndə Rusiyanı nəzərdə tutur. Çünki Ermənistanın bütün dövlət sərhədləri Rusiyanın nəzarəti altındadır. Özü də bu nəzarət sözdə deyil, əməldə həyata keçirilir. Yəni Ermənistanın xarici ölkələrlə olan sərhədlərini rus sərhədçiləri qoruyur. Paşinyan geri addım atmayıb nə edəcəkdi? Onsuz da Azərbaycan bu məsələdə prinsipial mövqe ortaya qoyur. Bir millimetr də olsun, güzəştə getmək fikrimiz yoxdur. Bunu Rusiya da görür. Yəqin bu prinsipiallığın fonunda Rusiya Paşinyana məsləhət görüb ki, taleyini bir daha sınağa çəkməsin. Azərbaycan Qarabağda qalan separatçıların nəzarətində olan ərazilərlə də bağlı prinsipal olmalıdır. Təzyiqlərimizi daha güclü etməliyik ki, Laçın dəhlizi və Xankəndi ətrafında da Rusiya ilə Ermənistan geri çəkilsin. Bunun da nəticəsində Azərbaycan öz yurisdiksiyasını tam təmin etmiş olacaq. Yalnız bunlardan sonra sülh müqaviləsi bağlana bilər. Əks halda, Ermənistan Rusiyanın dəstəyi ilə növbəti müharibə ocağına hazırlıq görəcək. Bunu Ermənistan siyasiləri açıq şəkildə etiraf da edirlər. Ona görə də, prosesləri bu templə davam etdirməliyik”.
Məhəmmədəli QƏRİBLİ
