Rusiya Aerokosmik Qüvvələrinin təyyarələri İdlibin deeskalasiya zonasında yerləşən Hamame, Mazra və Zarzur yaşayış məntəqələrinə hücum edib. Anadolu Agentliyinin yaydığı xəbərə görə, ümumilikdə 15 aviareyd həyata keçirilib.
Suriya müxalifətinin yaydığı məlumata görə, hava hücumları üç hərbi təyyarə tərəfindən həyata keçirilib. Döyüş təyyarələri Hmeymim bazasından havaya qalxıb. Rusiyanın Zarzur kəndinə hava hücumu zamanı həmçinin kimsəsiz uşaqlar üçün Türkiyənin qeyri-hökumət təşkilatı tərəfindən tikilmiş yaşayış binalarının olduğu ərazi də bombardman edilib. Mərmilərdən biri kompleksdən 100 metr aralıya düşüb. Zərərçəkənlər və yaralılar barədə hələlik məlumat yoxdur. Bu hadisə maraqlı zamana təsadüf edir. Rusiya prezidenti Vladimir Putin sentyabrın 13-də Bəşər Əsədlə görüşüb. Əsədin Moskvaya səfəri əvvəlcədən elan olunmamışdı. Guman olunur ki, bu səfər Dəməşqin Rusiyanı “İdlib məsələsi”nin güc yolu ilə həllinə cəlb etmək niyyəti ilə baş tutub. Söhbət stutas-kvonun saxlanmasının təminatçısı rolunda Türkiyə ordusunun çıxış etdiyi İdlib əyaləti üzərində Suriya rejiminin nəzarətini hərbi yolla bərpa etməkdən gedir. Faktiki olaraq, Rusiya Əsədin bu istəyini reallaşdırmaq yolunda risqli addım atmaqdan çəkinmədi. Bu, eyni zamanda, Türkiyə ilə Rusiyanın münasibətlərini korlaya biləcək bir hadisə də sayıla bilər. Hər iki ölkə biizmlə həmsərhəddir və Qarabağdakı proseslərdə aktiv aktorlardan sayılırlar. Bu iki ölkənin münasibətlərinin kəskinləşməsi Qarabağdakı proseslərə hansısa formada təsir edə bilərmi?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Rusiyanın İdlibə hücum etməsi bizim üçün xoş olmayan hadisədir: “Çünki bilirik ki, Suriyanın 70 faizə yaxın ərazisi rusların, 20 faizi, yəni neftlə zəngin olan hissələri ABŞ-ın himayə etdiyi kürdlərin, 10 faizə yaxını isə Türkiyənin nəzarətindədir. Belə bir hücum Türkiyəyə meydan oxumaq anlamına gəlir. Görünür, Türkiyənin “Krım platforması”nda iştirakına Rusiya bu yolla cavab vermək istəyir, yəni Türkiyəni öz düşüncəsində olan cəzalandırma metodu ilə. Təbiidir ki, bu bizi narahat etməyə bilməz. Çünki Türkiyə ilə Rusiya arasında olan yaxınlaşma həm də Azərbaycanın maraqlarına cavab verir. Mən inanmıram ki, bu soyuqlaşma uzun sürəcək. Yəqin ki, qısa zamanda tərəflər arasında kompromis əldə olunar. Üstəlik, bu da hər iki dövlət üçün test sınağı olar. Qısa müddət ərzində buna son qoyulmasa, Qarabağ məsələsində də bizim üçün problemlər yarada bilər. Çox ümid edirəm ki, bu məsələ böyüməyəcək. Türkiyə və Rusiya, həmişə olduğu kimi, yenə də ortaq məxrəcə gələ biləcəklər. Rusiya bir daha Türkiyənin onun üçün nə qədər dəyərli olduğunu özü üçün aydınlaşdıracaq. Bunun da nəticəsində Qarabağ məsələsində bizim üçün heç bir probem yaranmayacaq. Qarabağın indiki vəziyyətində Azərbaycanı dəstəkləyən üç ölkə var. Bunlar Türkiyə, Pakistan və nə qədər qəribə olsa da, Rusiyadır. Digər dövlətlərlə müqayisədə Rusiya bizə kifayət qədər yaxındır. Cənab Prezident bu yaxınlardakı çıxışlarından birində bu amili xüsusi qeyd etdi. Müharibənin bitməsinə münasibətdə dedi ki, Rusiya ilə bizim aramızda heç bir fikir ayrılığı yoxdur. Bizdə müəyyən ümidlər vardı ki, Rusiyanın və Türkiyənin fəal iştirakı ilə Ermənistanla bizim aramızda tez bir zamanda Sülh Sazişi imzalanar. Təəssüf ki, iki ölkənin münasibətində sərinlik yarandı. Mən sizin qəzetə demişdim ki, Türkiyənin “Krım platforması”nda iştirakı müəyyən problemlərə səbəb olacaq. Ancaq ümidvaram ki, bu böyüməyəcək, tez bir zamanda öz həllini tapacaq”.
Məhəmmədəli QƏRİBLİ
