Ermənistan baş naziri Nikol Paşinyan parlamentdə çıxışı zamanı 44 günlük müharibə ilə bağlı fikirlərini bölüşüb. O, İkinci Qarabağ müharibəsi ilə bağlı bəzi məqamlara toxunub.
Paşinyan 2020-ci il sentyabrın 27-də hərbi əməliyyatların başlanmasının onun üçün gözlənilməz olduğunu etiraf edib. Qeyd edib ki, onlar müharibənin başlayacağını güman etmirdilər: “Ermənistan dövlət strukturlarının 2020-ci il 25 sentyabr tarixinə qədər mənə təqdim etdikləri hesabatlarda müharibənin başlanma ehtimalı cüzi dəyərləndirilirdi”.
Məlumat üçün qeyd edək ki, düşmən təxribatlarına cavab olaraq, 2020-ci il sentyabrın 27-də Azərbaycan Ordusu Qarabağda “Dəmir yumruq” əməliyyatına başlayıb. Nəticədə Silahlı Qüvvələrimiz 30 ilə yaxın işğal altında olan 7 rayonu və Dağlıq Qarabağın əhəmiyyətli hissəsini azad edib.
Görünən odur ki, Paşinyan rəsmən müharibənin başlayacağını gözləmədiklərini etiraf etdi. Bunlar o qədər arxayın olublar ki, müharibənin baş verəcəyini heç təsəvvürlərinə belə gətirmək istəməyiblər. Tutaq ki, müharibənin başlamasını bilsəydilər, məgər məğlubiyyətdən qaça bilərdilər?
“Lakin o da bir reallıqdır ki, əməliyyatların başlanması ilə bağlı məxfilik qorundu və hansısa sızma olmadı”
Məsələyə münasibət bildirən hərbi ekspert İbrahim Rüstəmlinin sözlərinə görə, bir sıra səbəblərdən ermənilər aşırı dərəcədə özlərinə arxayın idilər: “Hesab edirdilər ki, bütün strateji əhəmiyyətli yüksəkliklər onlarda olduğu üçün, güclü mühəndis istehkam qurğuları qurduqlarına görə üstünlük onların tərəfində olar. Bu, məsələnin hərbi tərəfi. Siyasi tərəfinə gəldikdə isə, Ermənistan hesab edirdi ki, Azərbaycan beynəlxalq müstəvidə ola biləcək siyasi təzyiqlərdən çəkinir. Ancaq Paşinyanın bu açıqlamanı verməklə nə qədər səmimi, obyektiv olduğunu demək çətindir. Lakin o da bir reallıqdır ki, əməliyyatların başlanması ilə bağlı məxfilik qorundu və hansısa sızma olmadı. Ali Baş Komandan İlham Əliyev böyük bir məsuliyyəti öz üzərinə götürərək bütün məqamları nəzərə aldı. O baxımdan Prezidentin bu qələbənin əldə olunmasında müstəsna rolu var. İlham Əliyev prezident seçiləndən sonra ordunu xeyli gücləndirdi. Onun ordu quruculuğunu prioritet elan etməsi Azərbaycanın dövlət və milli maraqlarının təminatına xidmət edir. Azərbaycanın milli maraqlarının arxasında nə dayanırdı? Ölkənin ərazi bütövlüyünün təmin edilməsi, insanların tapdanmış hüququnun bərpası və s. Prezident İlham Əliyevin qətiyyəti sayəsində biz buna nail olduq. Şəxsən onun diqqət və qayğısı sayəsində ordumuzun modern bir struktura çevrilməsi mümkün oldu. Ermənilər o qədər azğınlaşmışdılar ki, özləri barədə ağlasığmaz mif uydurmuşdular. Azərbaycanı həm dövlət, həm də xalq səviyyəsində aşağılayırdılar. Ancaq Azərbaycan təmkinlə hazırlaşaraq, əlverişli zəmin formalaşan kimi hücuma keçdi və uğurla işğala son qoydu”.
Hərbi ekspert onu da qeyd etdi ki, İkinci Qarabağ müharibəsində Azərbaycan Ordusu böyük döyüş təcrübəsi qazandı.
Vidadi ORDAHALLI
