Gorus-Qafan yolunda İran sürücülərinin həbsi - Azərbaycan polisinin dövlətlərarası cinayətlərlə mübarizədə peşəkar iştirakı...

Mehman Muradlı: “Hüquqi məsuliyyətə cəlb olunmalarını istəmirlərsə, beynəlxalq yükdaşıma qaydalarına əməl etməlidirlər”

img

Azərbaycan polisi Gorus-Qafan avtomobil yolunda İrandan gələn iki yük maşınının sürücüsünü həbs edib. Bu barədə erməni KİV-i məlumat yayıb. Məlumata görə, Azərbaycan polisi Xankəndiyə və İrəvana sement daşıyan iki iranlı sürücünü həbs edib. Məsələ ilə bağlı açıqlama verən DİN mətbuat xidmətinin rəisi Ehsan Zahidov bildirib ki, saxlanlan sürücülər qanunsuz yollarla Azərbaycan ərazisinə giriblər:

"Ermənistan ərazisindən yük daşımaq məqsədilə qanunsuz yollarla Azərbaycan ərazisinə keçən avtomobillər Azərbaycanın aidiyyəti dövlət qurumlarının əməkdaşları tərəfindən saxlanıblar. Həmin avtomobillərin sürücüləri barəsində Azərbaycan Respublikasının qanunlarına uyğun müvafiq tədbirlər görüləcək".

Azərbaycan polisinin bu cür addımları onu deməyə əsas verir ki, DİN daxili asayişi qorumaqla yanaşı, həm də beynəlxalq cinayətkarlıqla operativ mübarizə aparır.

Azərbaycan Vəkillər Kollegiyasının üzvü, hüquqşunas Mehman Muradlı “Bakı-Xəbər”ə açıqlamasında bildirdi ki, polisin bu addımları tam qanun çərçivəsindədir: “Həmin post Qubadlı rayonu ərazisində qurulub. Qubadlı uzun müddət işğalda qaldığı üçün ermənilər həmin magistraldan istədikləri kimi istifadə ediblər. İrandan ürəkləri istədiyi yükü maşınlara doldurub işğal altındakı ərazilərə keçiriblər. İndi yerin və yolun əsl yiyəsi gəlib və öz qanunlarını ora tətbiq edir. Ermənilər çox çalışdılar ki, bu addımların qanunsuz olduğunu beynəlxalq ictimaiyyətə sırısınlar, alınmadı. Hazırda qanunlara tabe olmaqdan başqa çarələri qalmır. İran maşınları və onların sürücüləri də bu qanunlara tabe olmağa borcludur. Azərbaycan polisi sentyabrın 12-si saat 12:00-dən etibarən Gorus-Qafan yolunun Azərbaycanın nəzarəti altında olan Eyvazlı yaşayış məntəqəsində İran dövlət nömrə nişanlı yük avtomaşınlarının sürücüləri və yüklərinin sənədlərini yoxlayır. Ancaq görünür, İran sürücüləri bundan yaxşı nəticə çıxarmayıblar ki, qanunsuz üsullarla ərazimiz vasitəsilə yükdaşıma həyata keçirmək qərarına gəliblər. Hətta erməni mənbələri məlumat yayır ki, Gorus-Qafan yolunda Azərbaycanın İran nömrəli nəqliyyat vasitələrinə gömrük rüsumu tətbiq etdiyi bildirilir. Lazım gəlsə bu da edilməlidir. Çünki istənilən ölkənin sərhədini keçəndə, gömrük rüsumu verməlisən. Ermənistan və İrana bu sərf etmirsə, alterantiv yoldan istifadə edə bilərlər. Ərazidə ictimai qaydanın, ictimai təhlükəsizliyin təmin olunması məqsədilə qanunvericiliyə uyğun olaraq müvafiq yoxlamalar həyata keçirilir. İşğaldan azad edilmiş bütün şəhər və rayonların ərazisində olduğu kimi, Qubadlı rayonunun inzibati ərazisində də Daxili İşlər orqanlarının əməkdaşları öz xidməti vəzifələrini layiqincə yerinə yetirir. Azərbaycanın başqa rayonlarında postların olması normal qarşılanırsa, işğaldan azad olunmuş ərazilərində də polis postunun olması tam qanunauyğundur. Azərbaycan polisi ictimai asayişi qorumaq üçün məqsədəmüvafiq bilinən yerlərdə polis postları təyin edəcək və bunu edir də. İranlı sürücülər isə əvvəlki qaydanı unutmalıdır. Hüquqi məsuliyyətə cəlb olunmalarını istəmirlərsə, beynəlxalq yükdaşıma qaydalarına əməl etməlidirlər. Heç bir qanunsuz yükdaşıma bizim ərazidən reallaaşa bilməz. Belə olsa, bunun adı olur transmilli cinayətkarlıq. Azərbaycan isə buna heç vaxt imkan verməz”.

Məhəmmədəli QƏRİBLİ

Son xəbərlər