Tariximizə daha bir saxtakar təcavüz - “Nəbinin ölümündən sonra Həcər erməniyə ərə getdi?...

Qasım Hacıyev: “Həcərlə bağlı səsləndirilən bu əsassız iddia erməni qazanında bişib, bu saxtakarlıqdır”

img

Son dövrlər tariximizi və tarixi şəxsiyyətlərimizi ləkələyənlər durmadan artır, elə bu təxribatları “sevə-sevə” tirajlayanlar da onlardan geri qalmır. Mübaliğəsiz deyə bilərik ki, bu adamlar ermənilərin indiyə qədər bizim tarixi şəxsiyyətlərimizə qarşı apardığı qaralama kampaniyasını davam etdirir, bir sıra hallarda tarixi şəxsiyyətlərimizə, qəhrəmanlarımıza qarşı ermənilərdən də tünd boyalardan istifadə edirlər.

Qaçaq Nəbi Azərbaycan xalqının tarixi qəhrəmanlarından biridir, həyat yoldaşı, uzun illər onunla çiyin-çiyinə döyüşən Həcər xanım da Azərbaycan qadınının qoçaqlıq, hünər, cəsarət simvoludur. Çox təəssüflər olsun ki, son vaxtlar bəziləri Qaçaq Nəbinin həyat yoldaşı Həcər haqqında qarayaxma kampaniyası aparır və onu erməniyə “ərə getməkdə” ittiham edirlər. Belələri iddia edir ki, guya Qaçaq Nəbi öldürüldükdən sonra onun arvadı Həcər ərinin qırxı çıxmamış “erməniyə ərə gedib”. Həcərin erməniyə ərə getdiyi barədə şaiyələri sanki qəsdən yayırlar. Həcərə şər ataraq, ləkələyərək onu erməniyə ərə getməkdə ittiham edənlər tarixi həqiqəti niyə unudur? Onlar bilmirlər ki, bu iddiaları tamamilə əsassızdır? Belələri niyə tarixi şəxsiyyətlərimizi hədəfə alır?

  • “Qaçaq Nəbinin həyat yoldaşı onun ölümündən sonra erməniyə ərə getməyib, onun barəsində deyilənlər böhtandır, şərdir”

Azərbaycan Milli Elmlər Akademiyası (AMEA) Qafqazşünaslıq İnstitutunun Ermənişünaslıq şöbəsinin müdiri, professor Qasım Hacıyevin sözlərinə görə, Həcər xanım barədə bu şaiyələr aradabir gündəmə gətirilir, məqsəd də tarixi Azərbaycan qadınına qarşı şər-böhtan kampaniyası aparmaqdır. “Qaçaq Nəbinin həyat yoldaşı ilə bağlı ermənilərin apardığı şər-böhtan kampaniyasını, çox təəssüflər olsun ki, bizim içimizdən də davam etdirənlər tapılır. Ermənilərin məqsədi aydındı. Bizim elə bir tarixi şəxsiyyətimiz, tarixi hadisəmiz yoxdur ki, ermənilər onlara qarşı böhtanlar yağdırmasın, qara piar aparmasın. Hətta “Şərqi Ermənistan” uydururlar, “Albaniya dövləti olmayıb” deyirlər... Bu da erməni xislətindən irəli gəlir. Qaçaq Nəbinin həyat yoldaşı onun ölümündən sonra erməniyə ərə getməyib, onun barəsində deyilənlər böhtandır, şərdir. Bu, ermənilərin uydurmasıdır və içimizdən də bəziləri gündəmə gəlmək üçün bu uydurmanı, saxtakarlığı  “həqiqət” kimi cəmiyyətə sırımaq istəyir. Bir neçə dəfə bu məsələni gündəmə gətiriblər. Biz də bu məsələni dərindən araşdırıb həqiqəti üzə çıxarmışıq, bu barədə elmi ictimaiyyətə də, cəmiyyətə də məlumat vermişik”.

Q.Hacıyev deyir ki, gözümüzün qarşısında baş verən gerçəkliyin özünə qara yaxırlar, o ki qala tarixi şəxsiyyətlərə. “İnanın, o qədər cəfənglər danışırlar ki... İndi də guya o vaxt Həcərin “erməniyə ərə getdiyini” deyirlər. Bütün bunlar hamısı böhtan və şərdir. Həcərlə bağlı səsləndirilən bu əsassız iddia erməni qazanında bişib, bu saxtakarlıqdır”-deyə Q.Hacıyev qeyd etdi.

İradə SARIYEVA

Son xəbərlər