Ermənilər 5 il əvvəlki hərbi paradlarını xatırlayıb daha da bədbinləşirlər - “heç vaxt o səviyyədə olmayacağıq”

Afsəddin Nəbiyev: “İkinci Qarabağ müharibəsi məğlubedilməz erməni ordusu mifini yox etdi”

img

Ermənistanda sonuncu hərbi parad 2016-cı ilin sentyabrında keçirilib. O vaxt işğalçı ölkənin prezidenti Serj Sarkisyan idi. Paraddan bir neçə ay əvvəl Aprel döyüşlərində sarsıdıcı zərbə alan Ermənistan bunu ört-basdır etmək üçün müxtəlif vasitələrə əl atırdı. Bu baxımdan, məhz həmin paradda ilk dəfə “İsgəndər” raketləri nümayiş olundu. Çünki Aprel döyüşlərindən sonra Rusiya sözügedən raket komplekslərini Ermənistana peşkəş etdi.

Ancaq İkinci Qarabağ müharibəsindən sonra keçmişin nostalgiyası ilə yaşayan ermənilər o qədər bədbinləşiblər ki, köhnə parad şəkillərini paylaşıb, əvvəlki nəticənin bir daha bərpa olunmayacağını deyirlər: “Bu son hərbi paradımızdır. Hakimiyyətdə olmuş keçmiş siyasətçilər, hər yerə zəhər tökmələrinə, sizi təqib edib gözdən salmalarına baxmayaraq, qalib ölkənin rəhbərləri və əsgərləri idilər. Siz təslim oldunuz. Onlar isə müstəqilliyin 25 illiyini hərbi paradla qeyd ediblər. İndi sizin bu bayramı qeyd edəcək bir şeyiniz yoxdur. Həmin məşhur paradımızdan beş il sonra tamamilə fərqli bir ölkədə yaşayırıq. Kim bilir, ermənilərin həmin ordunu, müstəqil bir dövləti yenidən qurması üçün neçə onilliklər, bəlkə də yüz illər lazım olacaq. Bu şəkillərə baxın. O bizim son hərbi paradımız idi”.

Ermənistan himayədarları hesabına Azərbaycan ərazilərini işğal etdi. O baxımdan bu o demək deyil ki, erməni ordusu qəhrəman və məğlubedilməz idi.

  • “Ermənilər rus ordusunun uğurunu öz adlarına yazırdılar və utanmadan hərbi parad keçirirdilər”

Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev hesab edir ki, İkinci Qarabağ müharibəsi məğlubedilməz erməni ordusu mifini yox etdi: “Məlum oldu ki, bu barədə deyilənlər sadəcə sabun köpüyü imiş. Ermənilər rus ordusunun uğurunu öz adlarına yazırdılar və utanmadan hərbi parad keçirirdilər. Halbuki, onların buna heç bir mənəvi haqqı yox idi. Çünki o zaman bilavasitə Rusiya hərbçilərinin iştirakı ilə ərazilərimiz işğal olundu. Parad və təlimlərin keçirilməsi dövlətlərin ordusunda vəziyyəti və döyüş hazırlığını nümayiş etdirmək üçün bir vasitədir. Ermənistan Azərbaycanın ərazisini işğal altında saxladığı illərdə bir çox parad və təlimlər keçirməklə “öz gücünü” dəfələrlə nümayiş etdirib. Ancaq bütün dünya bir həqiqəti bilirdi ki, Ermənistan ordu saxlamaq gücündə deyil. Bu ölkənin iqtisadi potensialı bir ordunu saxlamağa, təminatını qurmağa yetərli deyil. Rusiya ilə Ermənistan arasında bağlanmış əsgəri müqavilə 50 ili əhatə edirdi. Bu müqavilə onu deməyə əsas verir ki, Ermənistanın ordu təchizatını Rusiya siyasi məqsədləri üçün təmənnasız təmin edirdi. Görüntü yaradaraq elə təqdim edirdilər ki, guya Ermənistan bölgədə güclü orduya sahibdir. Ancaq 44 günlük Vətən savaşında ordumuz Ermənistan ordusunu darmadağın etdi. İndi Ermənistanın özünə yenidən ordu qurması mümkünsüzdür. Ona görə ki, ölkə sürətlə boşalır. Əhali sürətlə Ermənistanı tərk edir. Azərbaycanda İkinci Qarabağ müharibəsindən sonra orduya göstərilən diqqət daha da artırmaqda davam edir. Bu belə də davam etməlidir. Çünki Ermənistan kimi məkrli dövləti himayə edən qüvvələr hələ ki, öz çirkin niyyətlərindən əl çəkməyiblər”.

Sədr müavini hesab edir ki, müharibədə qələbə qazanmış olsaq da, arxayınlaşmaq olmaz.

Vidadi ORDAHALLI

Son xəbərlər