“Moskva müqaviləsindən fərqli olaraq, Ermənistanın düşmənlərinin (Azərbaycan, Türkiyə) və kapitulyatorun (Paşinyan) istinad etdiyi Qars sazişində indiki Tiqranaşen (Kərki) ərazisi Ermənistana məxsusdur”.
Erməni mediasının yaydığı məlumata görə, bu cür sərsəm fikirlərlə politoloq Edqar Elbakyan çıxış edib.
O, bununla bağlı əsası olmayan fikirlər səsləndirib: “Ermənistan-Azərbaycan sərhədlərinin demarkasiyası ilə bağlı danışıqlar qarşılıqlı əsaslandırma şəklində həyata keçirilmədiyindən, Azərbaycan təslim olan Ermənistana və onun liderinə istəklərini məcburi qəbul etdirir. Kərki üzərindən siqnallar isə gəlməkdə davam edir”.
Erməni politoloqun təəssüflə bildirdiyinə görə, Avroatlantik məkanda və Rusiyanın hakim dairələrində kapitulyatorun gələcək idarəçiliyini davam etdirməsi ilə bağlı ümumi fikir birliyi mövcuddur. Ona görə də, erməni xalqı bu mübarizədə təkdir və yalnız öz gücünə güvənməlidir.
Görünən odur ki, erməni tərəfi xəstə ərazi iddialarından əl çəkmək istəmir. Məlumat üçün qeyd edək ki, Moskva müqaviləsi 1921-ci ilin martında, Qars müqaviləsi isə həmin ilin oktyabrında imzalanıb. Həmin müqavilələrlə bağlı ortada arxiv sənədləri var. Belə olan halda, Kərki Ermənistana məxsus idisə bəs hanı arxiv sənədi?
“Sadəcə, o vaxt Azərbaycan müstəqil olmadığı üçün başımıza bu fəlakət gəlib”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının sözlərinə görə, Kərkinin Ermənistana məxsus olması ilə bağlı deyilənlər sadəcə uydurmadır: “Əvvəla, erməni saxtakarlığı hər zaman olub və bundan sonra da olacaq. Çünki onlar bir millət kimi əfsanələrə inanıblar. Onların tarixçiləri də ermənilərə əfsanələr yazıblar. Moskva və Qars müqavilələrini müzakirə edirlər. Bəs ondan əvvəlki illərdə nə olub? Bu barədə niyə danışmırlar? İrəvanı biz onlara güzəştə getdik, bundan heç danışmırlar. Kərki kəndi Azərbaycanın tarixi ərazisidir. Moskvanın himayəsi ilə Azərbaycan ərazilərini ələ keçirib yoxdan Ermənistan yaratdılar. Ətraf əraziləri zəbt edə-edə Kərki anklav vəziyyətinə düşdü. O vaxt Moskvadan deyirdilər ki, nə fərqi var, vahid ittifaq dövlətidir. Hətta o vaxt Mərkəzi Komitədən Naxçıvana gedən nümayəndə heyəti bu fikirləri işlədəndə əhali buna etraz edib. Sual veriblər ki, SSRİ ilə Çin kommunist dövlətləridir. O zaman bəs niyə bu iki ölkə 1969-cu ildə adi Damans adasına görə toqquşub? Ona görə də torpaq müqəddəsdir. Sadəcə, o vaxt Azərbaycan müstəqil olmadığı üçün başımıza bu fəlakət gəlib. Moskva və Qars müqavilələrinə əsasən Azərbaycanın sovet dövrü sərhədləri müəyyən olunub. Həmin müqavilələrdə Kərkinin Ermənistana məxsus olması ilə bağlı heç nə yoxdur”.
Professor hesab edir ki, bu kimi fikirlər ermənilərin uydurmasıdır.
Vidadi ORDAHALLI
