Ermənistan parlamentinin “Şərəf duyuram” fraksiyasının deputatı Anna Mkrtıçyan Ermənistanın ombudsmanını “ağ yuyub qara sərib”. Ombudsmanı saxtakarlıqda ittiham edən Mkrtıçyan onun Bakıda guya erməni “hərbi əsir”lərə işgəncə verilməsi ilə bağlı hesabatında təqdim olunan epizodların uydurma olduğunu qeyd edib.
Xüsusilə vurğulayıb ki, ombudsmanın hesabatında Azərbaycan tərəfin Ermənistan “hərbi əsir”lərinə, guya (10 noyabr bəyanatından sonra Azərbaycan ərazilərinə soxulan və ordumuz tərəfindən zərərsizləşdirilən terrorçuları, diversantları nəzrdə tutub-İ.S) şiddətli işgəncə verməsi məsələsi də şişirdilib, bu, həqiqətə uyğun deyil. “Bununla onlar (Ermənistan hakimiyyəti) manipulyasiya edirlər. Ölkəmizin daxilində atəşfəşanlığa pul tapa bilirlər, ancaq hərbçilərin, insanların ehtiyaclarını normal ödəyə bilmirlər. Hətta görün vəziyyət nə yerə çatıb ki, Ermənistanda belə fikirlər səslənir: “hərbi əsir”lərimiz Azərbaycanda iki ay da qala bilərlər, çünki onlarla Ermənistandakından daha yaxşı rəftar olunur”.
Bütövlükdə A.Mkrtıçyan öz çıxışında Ermənistan ombudsmanını saxtakarlıqda və “hərbi əsir”lərlə bağlı məsələləri şişirtməkdə ittiham edib. Bildirib ki, işgəncə faktı yoxdur, bu, ombudsman tərəfindən şişirdilir. A.Mkrtıçyanın dilindən səsləndirilən fikir odur ki, erməni ombudsmanın Bakıdakı “hərbi əsir”lərlə bağlı təqdim etdiyi hesabatlar həqiqəti əks etdirmir.
Gördüyümüz kimi, guya Bakıda “erməni əsir”lərə işgəncə verildiyi barədə iddiaları ermənilər özləri də təkzib edir.
“Beynəlxalq təşkilatların əl buyruqçusu olan Ermənistan ombudsmanı bundan sonra ermənilərin özü tərəfindən daha çox ifşa ediləcək”
BDU-nun “Erməni Araşdırmaları və Təlim Mərkəzi”nin rəhbəri İsmayıl Tanrıverdi bizimlə söhbətində bildirdi ki, Ermənistanın ombudsmanı həddindən artıq riyakar birisidir və həqiqətən də onun təqdim etdiyi hesabatlar heç zaman həqiqəti əks etdirməyib: “Ermənistanın ombudsmanı həmişə müxtəlif qüvvələrin siyasi sifarişlərini yerinə yetirib, bunu erməni deputatlar da yaxşı bilir. O, indiyə qədər bir dənə də olsun doğru-düzgün məlumatlar əsasında hesabat hazırlamayıb. Bu da ondan irəli gəlir ki, bu insan onun-bunun buyruğunu yerinə yetirib. Ermənistanda ombudsmanın heç bir nüfuzu qalmayıb, ondan yalnız bəzi qüvvələr öz maraqları üçün istifadə edir. Azərbaycan tərəfi deyəndə ki, Ermənistanın ombudsmanının hesabatlarının hamısı saxtakarlıq yığınıdır, Ermənistan tərəfin səsi çıxmırdı, amma indi erməni deputatının özü dilə gəlir. Ermənistan ombudsmanının Azərbaycanla bağlı beynəlxalq təşkilatlara yalan məlumatlar ötürdüyü də faktdır, inanıram ki, tezliklə bu da elə ermənilərin özü tərəfindən ifşa ediləcək. Biz dəfələrlə bəyan etmişik ki, Azərbaycanda Ermənistanın hərbi əsiri yoxdur, buradakılar terrorçulardı, diversantlardı. Amma Ermənistanın ombudsmanı öz hesabatlarında diverstantları “hərbi əsir” kimi qələmə verməklə və yalan işgəncə epizodu uydurmaqla həm dünyanı, həm də Ermənistan cəmiyyətini aldadıb”.
İ.Tanrıverdi qeyd etdi ki, Ermənistanın ombudsmanı hər zaman təxribatla məşğul olub və gah Ermənistanda müxalifətlə iqtidarın arasına girib, gah Zəngəzura gələrək Azərbaycan hərbçilərini təxribata çəkmək istəyib, amma heç nəyə nail ola bilməyib: “Artıq Ermənistanın öz parlamentindən həqiqət səslənməyə başlayıb ki, Azərbaycanda erməni “hərbi əsir”lərə heç bir işgəncə verilməyib, ombudsmanın təqdim etdiyi hesabatlarda əks olunanlar yalandır, uydurmadır. Beynəlxalq təşkilatıların əl buyruqçusu olan Ermənistan ombudsmanı bundan sonra ermənilərin özü tərəfindən daha çox ifşa ediləcək. O Zəngəzura gəlir və guya Zəngəzurdan “dəqiq məlumat”lar toplayır, o “məlumatları” da tələm-tələsik beynəlxalq təşkilatlara ötürür”.
İradə SARIYEVA
