Gorus-Qafan yolunda Azərbaycanın qanuni addımları - erməni parlamenti qapalı iclasa qərar verdi…

İbrahim Rüstəmli: “Azərbaycan çox qısa müddətdə qalan ərazilərimizdə də öz yurisdiksiyasını təmin edəcək”

img

Ermənistan parlamentindəki Ermənistan” müxalif bloku fraksiyasının katibi Artsvik Minasyan keçirdiyi brifinqdə Gorus-Qafan dövlətlərarası avtomobil trasında yaranmış vəziyyətlə bağlı parlamentin xüsusi iclasının keçirilməsi barədə anlaşma əldə olunduğunu açıqlayıb. Onun sözlərinə görə, bu müzakirələr qapalı şəkildə aparılacaq.

Ölkənin güc strukturlarına parlamentin iclaslarında iştirak etmələri barədə bu qurumların rəhbərləri səviyyəsində “Ermənistan” fraksiyası adından məktublar ünvanladıqlarını vurğulayan Minsayan sözügedən məsələ ilə bağlı tam məlumat ala biləcəklərinə ümidli olduqlarını bildirib.

Bu kontekstdə aparılacaq dinləmələrdə dövlət sirri olan məlumatların açıqlana biləcəyi ehtimalı nəzərə alınaraq, parlamentin iclasının mətbuat üçün qapalı formatda keçirilməsinə qərar verilib. Minasyan bildirib ki, əsas problem ölkə qarşısında duran vəzifələri həll edə bilmədikləri ilə bağlıdır: “Ən sadə nümunə Ermənistan Respublikasının suverenliyinin pozulmasıdır. Biz faktiki olaraq bu rayonda (Sünik vilayəti) suverenliyi itirmişik, ərazi bütövlüyümüz pozulub ki, bununla bağlı cinayət işi açılmalıdır. Baş prokurorun bütün suallara cavab verəcəyini gözləyirik. Xarici İşlər Nazirliyinin İran tərəfi ilə zəruri işlər apardığına əmin olmalı, beynəlxalq müstəvidə hansı işlərin görüldüyünü bilməliyik”. Onun sözlərinə görə, parlamentin qapalı iclasının bacardıqca tez keçirilməsi barədə razılığa gəlindiyindən, bu məsələ ilə bağlı dinləmələr tez bir zamanda baş tutmalıdır.

Göründüyü kimi, Ermənistanda Azərbaycanın Gorus-Qafan yolunu nəzarətə götürməsindən ciddi narahatlıq başlayıb. Hətta bir az da irəli gedərək, bu addımları qanunsuzluq kimi qələmə verirlər. Azərbaycanın öz suverən ərazisində yoxlama postları qurması nə vaxtdan  qanunsuzluq olub?

Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki,  Ermənistan parlamentindəki müxalifət blokunun təmsilçisinin keçirdiyi brifinqdə Gorus-Qafan yolunda yaranmış vəziyyətlə bağlı parlamentin qapalı iclasının keçiriləcəyi ilə bağlı verdiyi anons maraqlı görünür: “ Hətta erməni xislətinə uyğun olaraq qeyd edirlər ki, güya biz öz ərazimizdə postlar qoymaqla onların suverenliyini pozmuşuq. Bütün bunlar növbəti erməni təxribatının işartısı və davamıdır. Hesab edirəm ki, ermənilər real vəziyyətlə bağlı aydın təsəvvürə malik deyillər. Üçtərəfli qaydada imzalanmış sənəd vəziyyəti anlamaq üçün kifayət qədər bəndlərlə zəngindir. Minasyanın bu bəyanatını revanşistlərin növbəti uğursuz cəhdi kimi dəyərləndirirəm. Azərbaycan öz ərazisində post qurub, oranı mühafizə edir. Buna bizim tam hüququmuz çatır. Bu, nəinki Ermənistanı, ümumiyyətlə heç bir ölkəni narahat edə bilməz. Onlar başqa ölkələrə ərazi iddiası irəli sürməyə, həmin ölkələrin daxili işlərinə qarışmağa çox öyrəşiblər. Gürcüstana, Rusiyaya, Türkiyəyə qarşı da ərazi iddiaları irəli sürürlər. Ətraflarında kim varsa, hamısından torpaq istəyirlər. Cənab Prezidentin dediyi kimi, bizi heç bir revanşıst bəyanat narahat edə bilməz. Görünür, Ermənistan hələ Azərbaycan haqqında kifayət qədər məlumata malik deyil. Onlar bizim hansı gücə malik olduğumuzu bilsələr, gedib sakit yerlərində oturarlar. Bilməlidirlər ki, belə addımların sonu onlara yaxşı nəsə vəd etmir. Azərbaycan çox qısa müddətdə qalan ərazilərimizdə də öz yurisdiksiyasını təmin edəcək. Ermənistanda bunu bildikləri üçün belə dərin narahatlıq keçirirlər”.

Məhəmmədəli QƏRİBLİ

Son xəbərlər