Ermənistanın baş naziri Nikol Paşinyanın ölkə müstəqilliyinin növbəti ildönümü münasibətilə bayram tədbiri keçirmək qərarı övladları Qarabağda ölən valideynlərin kəskin etirazlarına səbəb olub. Onlar və siyasi revanşist güclər sentyabrın 21-də keçiriləcək bayram tədbirini pozacaqlarını iddia edirlər.
Hətta sentyabrın 21-i anti-Paşinyan inqilabının başlandığı gün kimi də qiymətləndirilməkdədir. Bu gün Paşinyana "Türk Nikol" deyən revanşistlər və daşnaklar nəticədə yeni sürprizlə də qarşılaşıblar. Məlum olub ki, konsertin keçirilməsi üçün Türkiyədən Ermənistana konsert avadanlıqları və daşınan səhnə gətirilərək, İrəvandakı əsas meydana boşaldılıb.
“Müstəqillik günü ilə bağlı bayram tədbirinin keçirilməsində Türkiyənin texniki bazasından istifadə buna misaldır”
Siyasi ekspert Rövşən Rəsulov bizimlə söhbətində vurğuladı ki, Nikol Paşinyanın sentyabrın 21-də müstəqillik günü ilə bağlı konsert və bayram tədbiri keçirməsi qərarını həm də ölkənin, necə deyərlər, “qaradan çıxması” kimi də dəyərləndirilə bilər: Nikol Paşinyan bu gün ona “Türk Nikol” deyə xitab edən revanşçılara sanki tərs cavab verməkdədir. Hətta belə desək, sentyabrın 21-də Ermənistanın müstəqilliyi günü ilə bağlı keçiriləcək böyük konsertin və bayram tədbirinin texniki və səhnə avadanlıqlarının Türkiyədən xüsusi yük maşınları ilə gətirilməsi də revanşistlərə verilən cavab kimi qiymətləndirilə bilər. Düşünürəm ki, Nikol Paşinyan bu məsələdə ona qarşı çıxan müxalif qüvvələrə prinsipiallıq nümayiş etdirir. Demək istəyir ki, siz nə desəniz də, mən öz yoluma davam edəcəyəm. Misal üçün, son bir ayda o bir neçə dəfə Türkiyə ilə münasibətlərin normallaşdırılmasında maraqlı, Ermənistan-Türkiyə münasibətlərinin qurulmasının tərəfdarı olduğunu bəyan edib. Hətta Ankaradan da bununla bağlı İrəvana müsbət cavab gəlib. Sadəcə, iş qalır bu təkliflərin realizə olunmasına.
Düzdür, bu gün Ermənistanda Türkiyə məhsullarının satışına qadağalar var və həmin qadağaları məhz Paşinyan hökuməti tətbiq edir, ancaq göründüyü kimi, hər qadağa həyata keçmir və bu gün Ermənistan bazarında Türkiyə məhsullarını görmək adi hala çevrilib. Eləcə də müstəqillik günü ilə bağlı bayram tədbirinin keçirilməsində Türkiyənin texniki bazasından istifadə buna misaldır.
Revanşistlərin iddialarına gəldikdə isə, hesab edirəm ki, bütün bunlar boş, mənasız qara-qışqırıqlardır”. R.Rəsulovun sözlərinə görə, çünki 44 günlük müharibə bitəndən sonra Ermənistanda başlayan anti-nikolizm hərəkatı həmin dövrdə heç nəyə nail ola bilmədi. “Nə birləşmiş müxalifət Nikolu devirə bildi, nə də digər güclər öz istəklərinə çata bildilər. Əksinə, keçirilən növbədənkənar parlament seçkiləri Paşinyan hökumətinin yerini daha da möhkəmləndirdi. İndi isə daha əvvəllər verilən sərt bəyanatlar yumşaq fəaliyyətlərlə əvəzlənməkdədir.
Bu arada, Ermənistandakı Qarabağ erməni icmasının təmsilçilərindən və rəhbərlərindən biri olan Artur Ağacanovun Ermənistan müxalifətinin Azərbaycanla sülh müqaviləsinin bağlanmasına imkan verməyəcəkləri ilə bağlı iddialarına münasibətini xatırlatmaq istərdim. Bu barədə erməni mətbuatında oxudum. Onun sözlərinə görə, əslində sülh müqaviləsi imzalanıb, bu, 2020-ci ilin 20 noyabr üçtərəfli bəyanatıdır. Sadəcə, revanşçılar istəyirlər ki, oradakı bəndlər realizə olunmasın. Amma hər şey onların istədikləri kimi ola bilməz ki... Ağacanov hətta Zəngəzur dəhlizinin də açılması prosesinin getdiyini bildirib və onun kimi onlarla erməni ictimai-siyasi adamları da var ki, revanşizmin heç nə əldə edə bilməyəcəyi siqnallarını verirlər.
Beləliklə, Nikol Paşinyanın sentyabrın 21-də müstəqillik günü ilə bağlı konsert və bayram tədbiri keçirməsi qərarı, həm də ölkənin, necə deyərlər, “qaradan çıxması” kimi də dəyərləndirilə bilər. Bunu onun özü də demişdi. O bəyan etmişdi ki, artıq ağlayıb-sızlamağın vaxtı deyil, reallıqla barışmaq lazımdır. Bu baxımdan, Qarabağda öldürülmüş əsgər valideynləri, ya da radikal müxalifət təmsilçiləri nə qədər iddialar etsələr də, həmin gün yeni inqilabın başlanacağı tarix kimi yazılacaq və s., bütün bunlar pafos və populizm cəhdləridir. Necə deyərlər, tutar qatıq, tutmaz ayran misalı kimi.
Əslində, proqnozlar belədir: Ermənistan əvvəl-axır Azərbaycanla sülh müqaviləsini imzalayacaq, dəhliz də açılacaq, yerdə qalan problemlər də aradan qaldırılacaq və ona görə yox ki, bunu Nikol Paşinyan istəyir, xeyr, bunu güclü, qüdrətli Azərbaycan istəyir və edəcək də” - deyə R.Rəsulov vurğuladı.
İradə SARIYEVA
