Məlum olduğu kimi, Gürcüstan və Rusiyanın vasitəçiliyi ilə 2 dəfə mina xəritələri qarşılığında erməni diversantların bir qismi geri qaytarıldı. Sonra Prezident İlham Əliyev bəyan etdi ki, verilən xəritələrin yüzdə 25-i düzdür, digərləri düz deyil.
Belə ki, dövlət başçısı “CNN Türk” televiziyasına müsahibəsində ermənilərin işğaldan azad olunan ərazilərə 100 minlərlə min basdırdığını qeyd etdi: “Müharibə bitəndən sonra 150-dən çox sivil və ya hərbçi minalı ərazilərdə həlak oldu və ya sağlamlığını itirdi. Ermənilər bizə mina xəritələrini də vermir. Sonuncu mərhələdə verilən mina xəritələrinin dəqiqliyi 25 faizdir. Hazırda azad edilmiş torpaqlarda həm minalardan təmizlənmə işləri gedir, həm də infrastruktur işləri gedir”.
Görünən odur ki, Ermənistanın bizə verdiyi mina xəritələrinin çoxu saxtadır. Halbuki, bizim geri qaytardığımız diversantlar saxta deyildi. Maraqlı olan odur ki, Ermənistanın təqdim etdiyi mina xəritələrinin özünü doğrultmaması ilə bağlı nə Rusiyadan, nə də Gürcüstandan heç bir rəsmi münasibət olmadı. Halbuki, vasitəçiliklə bağlı onların üzərinə məsuliyyət düşür. Vasitəçilik edən dövlətlərin borcu idi ki, mina xəritələrinin böyük bir qisminin saxta olmasına görə izahat versinlər.
Maraqlıdır, bütün bunlara görə həmin dövlətlərin heç bir münasibət bildirməməsi nə deməkdir?
“Rusiya problemin həllində maraqlı olsaydı, dərhal bu saxtakarlığa etiraz edərdi”
Məsələyə münasibət bildirən politoloq Məhəmməd Əsədullazadənin sözlərinə görə, bu onu göstərir ki, vasitəçi olan tərəflər işində məsuliyyətli deyil: “Aprel ayından başlayaraq Azərbaycan Ermənistandan minalanmış ərazilərin xəritələrini tələb etməyə başladı. Ancaq qarşı tərəf xəritələri vermək istəmirdi. Bu isə humanitar missiyanın pozulması demək idi. Bu zaman Qərbin təmsilçisi qismində Gürcüstan prosesə qoşuldu. Nəticədə bir neçə diversantın azad olunması müqabilində Ağdam rayonunun mina xəritələri verildi. Daha sonra Rusiyanın vasitəçiliyi ilə Füzuli və Zəngilan rayonlarının mina xəritələri verildi. Ancaq sonra məlum oldu ki, həmin xəritələtrin böyük hissəsi saxtadır. Zatən Azərbaycan Ermənistana inanmır və həmin əraziləri minalardan tam təmizləyəcək. Ancaq problem ondadır ki, bu, böyük vaxt və vəsait tələb edir. İstənilən halda bu, Ermənistanın etimadı doğrultmadığının göstəricisidir. Vasitəçi dövlətlərin saxta mina xəritələri ilə bağlı susqun mövqedən çıxış etməsi təsadüfi deyil. Rusiya onsuz da məsələnin tezliklə həllində maraqlı deyil. Rusiya istəyir ki, məsələ həll olunmasın və hər iki dövlətə Kreml təzyiq göstərsin. Rusiya problemin həllində maraqlı olsaydı, o zaman dərhal bu saxtakarlığa etiraz edərdi. Gürcüstana gəldikdə isə, bu ölkə separatizmdən əziyyət çəksə də Ermənistanla olan münasibətlərə xüsusi önəm verir. Buna görə Gürcüstan rəsmiləri, irad bildirmək əvəzinə, Paşinyanı Tiflisdə təmtəraqla qarşıladılar”.
Politoloq hesab edir ki, Azərbaycan bu məsələdə daha tələbkar mövqedən çıxış etməlidir.
Vidadi ORDAHALLI
