Qarabağda yaşayan bir qrup separatçı qalığı oradakı erməni vətəndaşlara zülm edir. Bu barədə məlumatlara sosial şəbəkələrin erməni seqmentində çox rast gəlmək olur. Bir müddət əvvəl belə iddialar vardı ki, separatçılar müharibədən zərər görən ermənilərə müavinətlərin verilməsini dayandırıb.
Sonra məlumatlar yayıldı ki, yerli ermənilər iş istəmək üçün Azərbaycan hakimiyyətindən kömək istəyiblər. İndi də məlum olur ki, separatçı-terrorçu rejim ermənilərə “pasport” verməyi dayandırıb. Xankəndidə yaşayan ermənilər yazır ki, son iki ayda “pasport-stollar” onları geri qaytarır: “Pasport” almaq yaşı çatanlar və vaxtı bitmiş sənədi dəyişdirmək istəyənlər “passport”suz qalıb, problemin nə vaxt həll olunacağı haqda məlumat verilmir".
Separatçılar ermənilərə “pasport” verilməsini hansı məqsədlə dayandırıblar?
Politoloq Rəşad Bayramov “Bakı-Xəbər”ə açıqlamasında bildirdi ki, Qarabağda yaşayan ermənilərə nə “pasport” versələr də, onu kağız parçasından heç nə fərqləndirməyəcək: “Onlar yalnız bir pasportu əldə etməklə vətəndaşlıqlarını legitimləşdirə bilərlər. Bu da Azərbaycan vətəndaşlığını təsdiqləyən pasportdu. Ancaq bunun özü də asan proses deyil. Heç də o anlama gəlmir ki, Qarabağda yaşayan bütün ermənilərin hamısına ucdantutma pasport paylaya bilərik. Vətəndaşlığı təsdiq edən amillər var. Yaşlı nəsli yoxlamalıyıq ki, onlar 1988-ci ilə qədər harada yaşayıblar. Əgər Qarabağın ərazisində yaşayıblarsa, onlara pasport vermək olar. Onların övladlarına da vətəndaşlıq verə bilərik. Sonradan Qarabağa köçürülənlər isə süni məskunlaşdırma niyyəti ilə yerləşdiriliblər. Onlar gedib öz ölkələrində yaşamalıdırlar. Hətta Qarabağda bizim vətəndaşlığımızı haqq edən ermənilərlə bağlı da araşdırmalar aparılmalıdır. Bilməliyik ki, onlar Azərbaycana qarşı baş verən soyqırım və təxribatlara, digər cinayət əməllərinə görə axtarışda deyillərmi? Belə hal müəyyənləşsə, vətəndaşlığı verib, bizim qanunlarımızla hüquq qarşısında cavab verməlidirlər. Qarabağdakı ermənilər xaricə çıxanda daha çox Ermənistan pasportundan istifadə ediblər. Müharibədən sonra isə rus pasportu almaq iddiasına düşmüşdürlər. Rusiya xarici işlər naziri Sergey Lavrov ermənilərin pasport arzularını puç elədi. Qarabağda qalan ermənilərə rus pasportu paylanacağı iddiaları onları ümidləndirmişdi. Uzun müddət ayrı-ayrı rus və erməni KİV-ləri Xankəndi, Əsgəran və digər ərazilərdəki əhaliyə Rusiya vətəndaşlığı veriləcəyi haqda xəbərlər yayırdı. Bununla Kremlin Cənubi Osetiya və Abxaziyadakı siyasətini Dağlıq Qarabağda təkrarlayacağı ehtimalları irəli sürülürdü. Hərçənd, əvvəldən bölgədə yaşayan ermənilərə rus pasportu verilməsinin nonsens olduğu məlum idi. Əvvəla, Abxaziyadan fərqli olaraq, bu ərazilərin Rusiya ilə heç bir sərhədi yoxdur, prezident Vladimir Putin isə Qarabağı Azərbaycanın ayrılmaz hissəsi adlandırıb. Amma yenə də provokativ dezinformasiyalar tirajlanırdı və ermənilər rus pasportu alacağını gözləyirdi. Halbuki, istər Xankəndi, istər Xocavənd erməniləri olsun, hər biri Azərbaycan vətəndaşıdır, bizim qanunları qəbul etməlidirlər. Sadəcə, sülh müqaviləsi bağlanmalıdır, Ermənistan Azərbaycanın ərazi bütövlüyünü tanımalıdır, məsələ həll olunmalıdır. Bu, zaman tələb edir. Bundan sonra Rusiya XİN başçısı Lavrov Qarabağın Rusiyanın tərkibinə daxil olması ilə bağlı sualı ekzotik hesab etdi. Lavrov dedi ki, Dağlıq Qarabağın müstəqilliyi heç kim tərəfindən tanınmır, o cümlədən Ermənistan tərəfindən də: “Bizim isə bu, ağlımızın ucundan da keçmir”. Bununla da nazir Qarabağa qayıtmış ermənilərə guya rus pasportu veriləcəyi, Qarabağın hətta Rusiyanın tərkibinə verilə biləcəyi kimi absurd yalanları təkzib edib. Bununla Rusiya, həm də, birmənalı olaraq “rus pasportu”, “Qarabağ Rusiyaya verilib” kimi spekulyasiyalara son qoydu. Artıq İrəvanda da siyasətçilər bu üslubda utopiyaları dilə gətirməkdən vaz keçirlər. Açığını deyim ki, sadə ermənilərin çoxu Azərbaycan vətəndaşlığını qəbul etməkdə maraqlıdır. Separatçı qalıqları buna imkan vermir. Gec-tez bu olacaq. İndiki halda isə “pasport” paylanmamasını texniki amillərlə izaah edərdim”.
Məhəmmədəli QƏRİBLİ
