Erməni əsilli tarixçi-tədqiqatçı Filipp Ekozyans növbəti dəfə erməniləri ifşa edib. O bütün erməni tarixçilərinə müraciət ünvanlayıb.
Müraciətində bir sıra tutarlı arqumentlərlə çıxış edib: “Erməni tarixini bilən, araşdıran peşəkarlar, siz hardasız? Heç biriniz son illərdə İnternetdə görünmürsünüz. Bəlkə kimsə bunu hiss etmir, amma mən bu tendensiyanın fərqindəyəm. Siz sabit olaraq səssizlik taktikası seçmisiz. İndi sizin əsl gizlənməli olduğunuz vaxt gəlib çıxıb, çünki ortalığa həqiqət gəlib!
Sizə bəzi suallarım var: nədən tarixi sənədləri erməni xalqından illərdir gizlədirsiz? Ermənistanın “qədim” tarixini puç edə biləcək faktları nə vaxta qədər ictimaiyyətdən saxlamaq niyyətiniz var? Siz ermənilərin cəmi 300 il bundan əvvəl hansı adla tanındıqları barədə susursunuz, halbuki bu, artıq heç kimə sirr deyil. Erməni əlifbasının yaradıcısı İohan Zlatoust haqqında niyə susursunuz? Artıq onun haqqında bütün dünya bilir. Siz dissertasiyalarınızda səxavətlə yazdığınız uydurma soyqırımlar barədə bir dənə də olsun tarixi sübutun olmaması barədə susursunuz. Siz “qədim” erməni əlyazmalarının müstəqil ekspertlərlə bir dəfə də olsun eyni məkanda olmamasından danışmırsınız. Siz Moisey Xorenskinin orijinal əlyazmalarının harada gizlədildiyi barədə susursunuz. Yunan dilindən erməni dilinə tərcümə olunmuş yüzlərlə tarixi “sübutlarınız” olduğu halda, nədən bir dənə də olsun, tarixi yunan-erməni lüğətinin olmadığını demirsiniz?
Bəs niyə minlərlə “qədim” erməni memarlarının və inşaatçılarının təhsil aldığı məktəb və institutların hara yoxa çıxdığını deyə bilmirsiz? Bu memarların Xəzərdən başlayaraq Aralıq dənizinə qədər uzanan ərazilərdə bir dənə də olsun əl işlərinin qırıntısının belə olmaması barədə susursunuz”.
Göründüyü kimi, F.Ekozyans tutarlı faktlarla erməni saxtakarlığını növbəti dəfə ifşa etdi.
“Ermənilər yunan mədəniyyətindən oğurluq edərək bunu öz adlarına çıxarıblar”
Sözügedən məsələ ilə bağlı fikirlərini “Bakı-Xəbər”lə bölüşən Azərbaycan Milli Elmlər Akademiyası (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev qeyd etdi ki, bir ildən çoxdur F.Ekozyans çox ciddi tədqiqat apararaq ermənilərin saxtakarlıqlarını üzə çıxarır: “Özü də əsaslı şəkildə üzə çıxarır. O, ciddi mənbələrə əsaslanaraq yazılanların saxta olduğunu üzə çıxarır. Əslində bu məsələlərin əksəriyyəti bizə çoxdan məlumdur. Sadəcə problem onda idi ki, SSRİ dövründə erməni yalanlarının qarşısına hasar çəkmək mümkün deyildi. Ona görə ki, xristianlıq həmrəyliyindən istifadə edərək ermənilərə şərait yaradırdılar. Ermənilər nə istəyirdi, onu yazırdılar. Hətta 90-cı illərin əvvəllərində belə bir məqalə yazmışdım ki, ermənilər saxtakarlığı uzada-uzada gedirlər. Ancaq nəzərə almırdılar ki, sonra yazanlar əvvəlkilərin yalanını üzə çıxarır. Özləri də bilmədən əvvəlkiləri ifşa edir. Artıq get-gedə daha çox dünya alimi ermənilərin saxtakar olmalarının fərqindədir. Üç dəniz arasında erməni dövlətinin olması barədə deyilənlər sadəcə mifdir. Bunu ermənilərdən başqa heç kəs uydurmur. Çünki ortada nə qədim yazı var, nə də hansısa atribut. Biz Moisey Xorensk, erməni qədim əlifbası haqqında səslənən fikirlərin cəfəng olduğunu bilirik. Ancaq bunun ciddi bir erməni tarixçisi tərəfindən deyilməsi daha məqsədəuyğundur. Ona görə ki, biz deyəndə xaricdə məlum səbəblərdən buna siyasi don geydirirlər. F.Ekozyansdan başqa digər tarixçilər də qeyd edirlər ki, Moisey Xorensk adında nə erməni müəllifi olub, nə də onun tarix kitabı. F.Ekozyans haqlı olaraq soruşur ki, İohan Zlatoust haqqında niyə susursunuz. Düz deyir. Çünki İ.Zlatoust Konstantinopol yepiskopu idi. Ancaq necə oldu ki, onun yazdığı əsərlər yoxa çıxdı, amma ermənilərin yazdıqları üzə çıxdı? O cümlədən, niyə yunanların yaratdığı mədəniyyət yoxa çıxdı, ermənilərin uydurma əlifbası meydana çıxdı? Məsələ ondadır ki, ermənilər yunan mədəniyyətindən oğurluq edərək bunu öz adlarına çıxarıblar. Get-gedə bunların da üstü açılır”.
Bir sözlə, professor hesab edir ki, ermənilərin saxta tarixi getdikcə daha çox ifşa olunur.
Vidadi ORDAHALLI
