Məşhur Laçın təliminin ardınca üç qardaş ölkənin xüsusi qüvvələrinin Bakı təlimi...

Daşdəmir Əliyev: “Bununla isbatlanır ki, bizim hərbi müttəfiqlərimiz bir dəqiqə də olsun Azərbaycanı yalqız buraxmırlar”

img

Bakıda ilk dəfə olaraq Azərbaycan, Türkiyə və Pakistanın xüsusi təyinatlı qüvvələrinin “Üç Qardaş - 2021” birgə beynəlxalq təlimi keçiriləcək. Bu barədə  Müdafiə Nazirliyindən məlumat verilib.

Birgə təlimin əsas məqsədi döyüş əməliyyatlarının aparılması zamanı dost və tərəfdaş ölkələrin xüsusi təyinatlı bölmələrinin qarşılıqlı fəaliyyətinin təkmilləşdirilməsi, sülh və müharibə dövründə əməliyyatlara hazırlanması, bilik və təcrübə mübadiləsinin aparılmasıdır. "Üç qardaş - 2021" beynəlxalq təlimi sentyabrın 20-dək davam edəcək.

"Azərbaycan, Türkiyə və Pakistan bəşəriyyət tarixinə bir-birinə yaxın dost və qardaş ölkələr kimi düşüb. Bu əlaqələrin mərkəzində dayanan isə xalqlarımızın bir-birinə sıx şəkildə bağlı olmalarıdır. Buna əyani sübut kimi Azərbaycanın 2020-ci il sentyabrın 27-də təcavüzkar Ermənistanın silahlı qüvvələrinə qarşı başlatdığı 44 günlük əks-hücum əməliyyatının ilk günündən Türkiyə və Pakistanın Azərbaycana həmrəylik və dəstək nümayiş etdirməsini göstərmək olar".

Bu sözləri Xüsusi Təyinatlı Qüvvələrin komandanı, Vətən Müharibəsi Qəhrəmanı, general-leytenant Hikmət Mirzəyev deyib.

"Bu gün ölkələrimiz arasında bütün sahələr üzrə əməkdaşlıq ən yüksək səviyyədədir. Regionun və xalqlarımızın təhlükəsizliyinin təmin edilməsi üçün əlaqələrimizin daha da gücləndirilməsi və inkişaf etdirilməsi istiqamətində mühüm tədbirlər həyata keçirilir", - deyə H.Mirzəyev əlavə edib.

General-leytenant "Üç qardaş - 2021" beynəlxalq təlimlərinin hər üç ölkənin hərbi qulluqçuları arasında geniş təcrübə və fikir mübadiləsi aparılacağına və onların peşəkar hazırlıq səviyyəsinin daha da artırılmasına böyük töhfə verəcəyinə əminliyini bildirib. Qeyd edək ki, bu təlim Laçında keçirilən Türkiyə -Azərbaycan birgə təlimindən sonra start götürür. Üş qardaş ölkənin birgə təlimindən hansı nəticələri çıxarmaq olar?

Hərbi-siyasi ekspert, ehtiyatda olan polkovnik-leytenant  Daşdəmir Əliyev “Bakı-Xəbər”ə açıqlamasında bildirdi ki, Azərbaycanın hüququ çatır öz ərazisində istənilən ölkə ilə istənilən növ hərbi təlimlər keçirsin: “Biz fikir veririk ki, Azərbaycanın bu addımlarından daha çox Ermənistan narahat olur. Hətta biz Rusiya mətbuatında da bu amildən narahatlıq ifadə edən yazılara rast gəlirik. Bunu müsəlman hərbi bloku kimi qələmə verirlər. Rusiya hegemonluğunu qorumaq istəyir. Çalışır ki, Pakistan kimi atom silahına malik bir müsəlman ölkəsi bu regiona nüfuz etməsin. Eləcə də Türkiyənin təşəbbüsü ələ alması ona sərf etmir. Bütün bunlara baxmayaraq, Azərbaycan müstəqil siyasətini həyata keçirir. Sözügedən iki ölkə ilə bizi bir çox tellər bağlayır. Xüsusilə də 44 günlük mühüribədə biz öz dostlarımızı və düşmənlərimizi yaxşı tanıdıq. Müharibənin ilk günündən Türkiyə və Pakistan bizə hər cür dəstək göstərdilər. Buna görə də, bizim hərbi və digər sahələrdə əməkdaşlığımızın davam etdirilməsi olduqca vacibdir. Həm Türkiyə, həm də Pakistan çox güclü orduya malik ölkələrdi. Bizim bəzi qoşun növlərimizin onlarla birgə hərbi təliminin bizim ordumuzun peşəkarlığının yüksəldilməsinə böyük təsiri olacaq. Bu təlimlərin eyni zamanda başqa  əhəmiyyəti də var. Dünya gücləri görür ki, Azərbaycanı təkləmək olmaz. Bunu etmək fikrinə düşənlər qarşılarında həm də Türkiyə ilə Pakistanı görə biləcəyini bilməlidir. Rusiya və İran birmənalı şəkildə Ermənistana yardım edir. Azərbaycan da bu təlimlərlə mesaj verir ki, bizi təkləmək mümkün deyil. Bu təlimlər bölgədəki güc balansının bizim ziyanımızıa dəyişə bilməsi amilini də tam neytrallaşdırmış olur. Azərbaycan heç bir narahatlığı nəzərə almadan bu yöndə təlimlərini keçirməlidir. Xüsusilə də Laçındakı Türkiyə-Azərbaycan birgə təlimindən sonra bu tədbirin keçirilməsinin daha böyük əhəmiyyəti var. Bununla isbatlanır ki, bizim hərbi müttəfiqlərimiz bir dəqiqə də olsun Azərbaycanı yalqız buraxmırlar”.

Məhəmmədəli QƏRİBLİ

Son xəbərlər