Ermənistanda antirusiya əhvalı yalnız cəmiyyətdə, sadə ermənilər və revanşist qüvvələr arasında deyil, həm də Baş nazir Nikol Paşinyanın ailəsində hökm sürür. Paşinyanın arvadı Anna Akopyan Rusiyanın əleyhinə davamlı olaraq fikirlər səsləndirir. Rusiyanı Ermənistanla dost-müttəfiq olmamaqda ittiham edən Anna “Rusiya bizə müttəfiqdən çox düşməndir, bu səbəbdən də üzümüzü Qərbə tutmalıyıq” - deyib.
Ekspertlər deyir ki, Paşinyanın Gürcüstan səfərindən sonra A.Akopyanın da birdən-birə belə bir sərt anti-Rusiya ritorikası ilə çıxış etməsi Kremli əməlli-başlı qıcıqlandırsa da, Qərb dairələrini məmnun edib.
“Annanın Rusiya ilə bağlı açıqlamalar verib antirus mövqeyi sərgiləməsi bir tərəfdən...”
Siyasi şərhçi Azər Həsrətin sözlərinə görə, əlbəttə ki, Paşinyan hakimiyyətə gəldikdən sonra diqqət onun həyat yoldaşına yönəlib: “Anna da Paşinyanın özü kimi təsadüfi bir insandır. Ona görə də o, birinci xanım kimi davrana bilmir. O, birinci xanım kimi öz statusuna uyğun davranamaq əvəzinə anlamadığı, bilmədiyi məsələlərlə bağlı sağa-sola açıqlamalar paylaşır, bu da onu biabırçı, pis vəziyyətə salır. Xatırlayırsınızsa, Qarabağ torpaqları işğaldan azad edilməzdən əvvəl o, Azərbaycanın Birinci xanımı Mehriban Əliyevanı Şuşada muğam dinləməyə dəvət etmişdi və həddini aşaraq bu hərəkətə yol vermişdi. O dövrdə Azərbaycanın birinci xanımı Mehriban Əliyeva bu məsələyə çox təmkinli yanaşdı. Bunu hamımız xatırlayırıq. Bir müddət sonra isə Mehriban Əliyeva Şuşada musiqi, muğam dinlədi və dinlətdi, amma Anna Akopyan orada olmadı”.
A.Həsrətin bildirdiyinə görə, A.Akopyanın təsadüfi adam olması və hər addımbaşı siyasi naşılığının özünü büruzə verməsi onu pis vəziyyətə salır: “Annanın Rusiya ilə bağlı açıqlamalar verib antirus mövqeyi sərgiləməsi bir tərəfdən onda uzaqgörənliyin olmamasınından qaynaqlanır, digər tərəfdən, Paşinyan hakimiyyətinin əsl mahiyyətini çılpaqlığı ilə göstərir. Yəni Paşinyan Rusiya ilə məcburi dostluq etsə də, Rusiyayönümlü deyil. Ənənəvi erməni siyasəti həmişə Rusiyayönlü olub, amma Paşinyan bunun əleyhinə gedir. Belə görsənir ki, Paşinyan özünün deyə bilmədiklərini Anna Akopyanın dili ilə deməyə çalışır. Hər halda, bu baş verənlər bizim zərərimizə deyil, xeyrimizədir. Düşünürəm ki, belə gəlişmələr Azərbaycana heç bir zərər gətirməyəcək, əksinə, Azərbaycan özünün sabit siyasəti və mövqeyi ilə bundan sonrakı mövqelərini də möhkəmləndirməkdə davam edəcək”-deyə A.Həsrət qeyd etdi.
İradə SARIYEVA
