Hazırda Ermənistan elə bir vəziyyətdədir ki, heç kimdən kömək gözləməməlidir. Çünki heç bir dövlət İrəvana kömək etmək niyyətində deyil. Bizim bir yolumuz var – Bakı və Ankara ilə münasibətləri normallaşdırmaq. Bizə yalnız onlar kömək ola bilər.
Bu sözləri ölkə mediasına açıqlamasında erməni siyasətçi Araik Davtyan bildirib.
Onun sözlərinə görə, Bakı 44 günə ermənilərin şüurunu dəyişə bildi. O bunu bir sıra arqumentlərlə əsaslandırıb: “Hazırda Ermənistan müharibə edəcək gücə malik deyil. İctimaiyyət də bunu çox gözəl başa düşür. Paşinyanın hakimiyyətdə qalma səbəbi də məhz budur. Erməni xalqının Paşinyandan zəhləsi getsə belə, təkrar seçki keçirilsə, yenidən ona səs verəcək. Çünki hamı kimi Nikol da müharibə olacağı təqdirdə Ermənistanın aqibətini çox gözəl anlayır. Bakı 44 günə ermənilərin şüurunu dəyişə bildi. Artıq Ermənistanda hamı başını aşağı salıb sakitcə yaşamaq istəyir. Artıq erməni analar oğullarını əsgərliyə belə göndərmək istəmir”.
Görünən odur ki, İkinci Qarabağ müharibəsi, revanşistlər xaric, erməni cəmiyyətinin müharibə ilə bağlı əvvəlki stereotiplərini əhəmiyyətli dərəcədə dağıda bilib. Ölkədə nə qədər militarist əhval-ruhiyyədə təbliğat aparılsa da, bütün bunları görməmək mümkün deyil.
“Onlar bu cür biabırçı məğlubiyyətlə üzləşəcəklərini heç təsəvvürlərinə belə gətirmirdilər”
Sözügedən məsələ ilə bağlı fikirlərini baki-xeber.com-la bölüşən hərbi ekspert Ramil Məmmədlinin fikrincə, 44 günlük müharibənin ermənilərin şüurunu dəyişdiyi barədə fikirlər reallığı əks etdirir: “Ona görə ki, müharibəyə qədər onlar bu cür biabırçı məğlubiyyətlə üzləşəcəklərini heç təsəvvürlərinə belə gətirmirdilər. Necə deyərlər, ağıllarına gəlməyən başlarına gəldi. Məsələ ondadır ki, 44 günlük savaş zamanı həm çoxsaylı düşmən əsgəri, onların hərbi texnikası məhv edildi, həm də işğal altında olan böyük bir ərazi azad edildi. İllərlə Ermənistan ordusu barəsində uydurulan məğlubedilməzlik mifi qısa müddət ərzində tarımar oldu. Zatən müharibədən əvvəl Ermənistanda əsgər anaları uşaqlarını Qarabağa göndərmək istəmirdilər. Dəfələrlə bununla bağlı ölkədə etiraz aksiyaları keçirilib. Digər tərəfdən, indi müasir dövrdir və nəyisə gizlətmək mümkün deyil. Müharibə vaxtı Ermənistan hakimiyyəti cəmiyyəti nə qədər aldatmağa çalışsa da, həqiqətləri gizlətmək mümkün olmadı. Məsələ ondadır ki, İnternet üzərindən Ermənistan ordusunun, onların malik olduğu müxtəlif hərbi texnikaların müasir silahlarla necə məhv edildiyini görürdülər. Həmçinin onu da gördülər ki, nə strateji yüksəkliklər, nə də uzun illər ərzində qurulan güclü mühəndis istehkam qurğuları onları qoruya bilmədi. Hansı ki, həmin müdafiə sədlərini keçilməz hesab edirdilər. Ona görə də bütün bunlar yox ediləndən sonra ermənilərin müharibə ilə bağlı düşüncələrinin dəyişməsi qaçılmaz idi və bu belə də oldu. Məhz bu düşüncə erməni cəmiyyətini məcbur etdi ki, seçkilərdə revanşistlərə yox, məğlub Paşinyana stavka etsinlər. Çünki növbəti müharibənin Ermənistan üçün daha böyük fəlakətlə nəticələnəcəyinin fərqindədirlər”.
Hərbi ekspert onu da qeyd etdi ki, bu cür düşüncə hələ uzun illər ölkədə mövcud olacaq.
Vidadi ORDAHALLI
