Qarabağa “sülhməramlı” adı ilə yerləşdirilən Rusiya hərbi kontingentinin sabiq başçısı, general Rüstəm Muradov Rusiya mediasına açıqlama verib. Qarabağdakı “xidməti” barədə danışan Muradov “sülhməramlılar”ın işini yüksək qiymətləndirdiyini deyib. Bununla yanaşı, rusiyalı general onların fəaliyyətinə əsas qiyməti “dinc əhalinin” verdiyini bildirib: “Bizə qiyməti dinc əhali verir. Bu gün Qarabağda həyat tam axarı ilə davam edir. Əlbəttə ki, çətin məsələlər var, amma proses gedir – insanların qayıtması, bir sıra problemlərin həlli. Ona görə düşünürəm ki, hər şey normaldır”. Muradovun açıqlamasının ən maraqlı yeri isə “sülhməramlılar”ın Qarabağda qalma müddətilə bağlı olub. O, rus hərbi kontingentinin gözlənilən xidmət müddətilə bağlı deyib: “Birinci beş il üç dövlət başçısının imzaladığı razılaşmaya görədir. Daha sonra rus sülhməramlı kontingentinin vaxtının uzadılmasıyla bağlı qərar qəbul olunacaq”. Rusiyalı generalın bu açıqlaması erməni mətbuatında böyük həvəslə qarşılanaraq tirajlanıb. Rusiya hərbi kontingentinin Qarabağda qalma müddəti Rüstəm Muradovun istəyinə uyğun tənzimlənir, yoxsa hansısa razılaşma ilə?
Yaxşı olardı ki, həmin kontingent uzun müddət regionda qalmağın yollarını axtarmaqdansa, elə ilk 5 ildə prosesləri tənzimləyib bölgədən çıxmaq barədə düşünsün”
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Rüstəm Muradov bu məsələdə razılaşmanın tələblərinə uyğun şəkildə deyil, öz ölkəsinin planlarına uyğun danışıb. Bununla bağlı şərt 10 noyabr üçtərəfli razılaşmasının 4-cü bəndində açıq şəkildə göstərilib. Orada deyilir ki, Rusiya Federasiyasının sülhməramlı kontingentinin qalma müddəti 5 ildir və müddətin bitməsinə 6 ay qalmış hazırkı müddəanın tətbiqinə xitam verilməsi niyyətilə bağlı tərəflərdən hər hansı biri çıxış etməzsə, müddət avtomatik olaraq növbəti 5 ilə uzadılır. Yəni ki, rus hərbi birləşməsinin Qarabağda qalma müddəti Muradovun dediyi kimi Rusiyanın hansısa planı ilə tənzimlənmir. Rüstəm Muradov gözəl anlayır ki, onların indiyə qədər olan fəaliyyəti Azərbaycan tərəfini qane etmir. Buna görə də, indidən regionda qalmaq üçün müxtəlif zəminlər hazırlayırlar. Ancaq onlar bilməlidirlər ki, missiyalarına uyğun fəaliyyət göstəməyəcəkləri təqdirdə, Azərbaycan müddətin bitməsinə 6 ay qalmış kontingentin çıxarılmasını tələb edə bilər. Yaxşı olardı ki, həmin kontingent uzun müddət regionda qalmağın yollarını axtarmaqdansa, elə ilk verilən 5 ildə prosesləri tənzimləyib bölgədən çıxmaq barədə düşünsün. Erməni separatçılarının Qarabağdakı qalıqlarına humanitar yardım göstərməklə isə sülhməramlılar buna nail ola bilməz. Bu baxımdan da, yaxşı olar ki, Rüstəm Muradov gedib öz gələcək iş yerindəki fəaliyyətilə məşğul olmaq barədə planlar cızsın”.
Məhəmmədəli QƏRİBLİ
.
