Ermənistanın “Past” qəzeti yazır ki, Baş nazir Nikol Paşinyan Qarabağ fiaskosundan sonra yeni siyasi oyuna başlayıb. Qeyd olunur ki, baş nazir əvvəllər tənqid etdiyi “Madrid prinsipləri”ni yenidən gündəmə gətirməyi planlaşdırır.
Qəzet Paşinyanın bu yöndə cəhdlərini paradoksal hal kimi dəyərləndirir: “Hakimiyyətə gəlməzdən qabaq da, hakimiyyət illərində də Paşinyan komandası 2007-ci ildən masada olan “Madrid prinsipləri”ni kəskin tənqid edirdi. Onlar Dağlıq Qarabağ münaqişəsinin nizamlanmasında bu prinsipləri ən pis variant sayırdılar. Amma müharibədən sonra bu prinsiplər Paşinyan üçün münasib olub”.
Paşinyanın “Madrid prinsipləri”ni Qarabağ məsələsində əsas müzakirə mövzusu etməklə uğradığı hərbi-siyasi fiaskonun nəticələrini yumşaltmağa çalışdığını yazan qəzet münaqişənin sonlandığını elan edən rəsmi Bakının “Madrid prinsipləri”ni rədd edəcəyinə əminlik ifadə edib.
Aydın məsələdir ki, rəsmi Bakı İkinci Qarabağ müharibəsindən sonra yaranmış yeni reallıqlar fonunda heç vaxt "Madrid prinsipləri”ni qəbul etməyəcək. Paşinyan da bunun fərqindədir. Belə olan halda onun bunu gündəmə gətirməyə hazırlaşmasında məqsədi nədir?
“Paşinyan hakimiyyətə gələndən sonra illərlə aparılan Qarabağ danışıqlarının üstündən xətt çəkdi”
Məsələyə münasibət bildirən “Səs” Media Qrupunun rəhbəri, politoloq Bəhruz Quliyevin fikrincə, məqsəd əvvəlki status-kvonu bərpa etməkdir: “Ermənistanda Levon Ter-Petrosyandan başlamış bütün ölkə rəhbərləri Qarabağ məsələsinin həllini uzatmaq üçün bütün vasitələrə əl atıblar. Özü də o zaman onlar qalib tərəf olduqları üçün bu məsələdə daha hiləgər və həyasız mövqe sərgiləyirdilər. Onlardan nisbətən kompromislərə meylli prezident Levon Ter-Petrosiyan idi. Ancaq işğal etdikləri ərazilərin miqyasının böyük olması onları daha da azğınlaşdırmışdı. Xüsusən də Ter-Petrosyanın ətrafı və ondan sonra hakimiyyətə gələn Köçəryan-Sarkisyan cütlüyü daha radikal mövqe sərgiləməyə başladılar. Hər vasitə ilə prosesi uzadırdılar. Hesab edirdilər ki, zaman onların xeyrinə işləyir. O zaman Azərbaycan erməni tərəfinə ən yüksək status təklif etdi, amma onlar bunu qəbul etmədi. Ərazilərimizi hərb yolu ilə azad etməyimizdən sonra bir zamanlar onlara verilən şans da aradan qalxdı. İndi nəinki “Madrid prinsipləri”ndən, o cümlədən digər təklif olunan variantlardan da söhbət belə gedə bilməz. Çünki İkinci Qarabağ müharibəsi zamanı məsələ həll edildi. Paşinyan yaxşı bilir ki, Azərbaycan o təklifi qəbul etməyəcək. Sadəcə, o bununla revanşistlərin ona qarşı olan təzyiqlərini neytrallaşdırmaq istəyir. Paşinyan hakimiyyətə gələndən sonra illərlə aparılan Qarabağ danışıqlarının üstündən xətt çəkdi. Hansı ki, baza prinsiplərinin müəyyən hissəsi razılaşdırılmışdı. Paşinyan provokativ formada Azərbaycanı qıcıqlandırdı. Şuşada andicmə şousu təşkil etdi, “Qarabağ Ermənistandır nöqtə” kimi avanturist fikirlər səsləndirdi. Belə olan halda yeni yaranan reallıqlar konteksində köhnə həll variantlarını irəli sürmək sadəcə gülüncdür. Azərbaycan bütün mənalarda – hərbi, siyasi baxımdan qalib tərəf olduğu halda buna gedərmi? Təbii ki, yox”.
O baxımdan politoloq hesab edir ki, bütün bunlar Paşinyanın növbəti uğursuz siyasi manevr cəhdidir.
Vidadi ORDAHALLI
