“Qarabağ qüvvələrinin komandanı” Mikael Arzumanyan cümə axşamı istefa verdi, lakin separatçıların lideri Arayik Arutyunyan istefasını qəbul etmədi”.
Bu məlumatı erməni mətbuatı sentyabrın 9-da axşam yayıb. İstefanın səbəbi barədə məlumat verilməyib. Bu həmin Arzumanyandır ki, bir neçə ay əvvəl Qarabağda itkin düşən hərbçilərin valideynləri onu döyüb. Buna səbəb isə növbəti dəfə yaxınlarından xəbər ala bilməyən ermənilərə şablon cavab verilməsi olub.
Sözügedən məlumat İrəvanın yaxın gələcəkdə Azərbaycanla sülh müqaviləsi imzalamaq və sərhədlərin demarkasiyasını həyata keçirmək planları ilə bağlı xəbərlərlə üst-üstə düşdü. Bu, yüksək rütbəli hərbçilər də daxil olmaqla, Ermənistan və Qarabağda radikal qüvvələrin qarşı çıxdığı Qarabağın faktiki olaraq Azərbaycan ərazisi kimi tanınması deməkdir. Bu səbəbdən oktyabrın 1-dən müxalifət Paşinyan hökumətinin Türkiyə və Azərbaycanla münasibətləri normallaşdırmaq planlarına qarşı Ermənistanda mütəmadi etiraz aksiyalarına başlamaq niyyətindədir.
Belə görünür ki, Azərbaycanla imzalanması gözlənilən sülh sazişi erməni siyasi elitasında dərin parcalanma yaradıb. O baxımdan bunu ekspertlər necə dəyərləndirir?
“Separatçıların hərbi birləşmələri arasında çaxnaşma yaratmaqla ictimai diqqəti çaşdırıb, prosesi pozmaq istəyirlər”
Məsələyə münasibət bildirən Yeni Yol Partiyasının sədri Ramil Hüseynovun fikrincə, son zamanlar Paşinyanın Türkiyə ilə kommunikasiya xətlərinin açılması ilə bağlı verdiyi mesajlar, digər müəyyən təmaslar hansısa proseslərin getməsindən xəbər verir: “Bu da, məlum olduğu kimi, Ermənistanda və Qarabağdakı revanşistləri narahat edir. Çünki onlar görür ki, müəyyən beynəlxalq güc mərkəzləri bir sıra iri layihələrin həyata keçirilməsindən ötrü sülh prosesini sürətləndirmək istəyir. Revanşistlər çoxsaylı cəhdlər etsələr də, Ermənistanda parlamentin işini iflic edə bilmirlər. Bu səbəbdən separatçıların hərbi birləşmələri arasında çaxnaşma yaratmaqla ictimai diqqəti çaşdırıb, prosesi pozmaq istəyirlər. Nəzərə almaq lazımdır ki, “Qarabağ klanı”nın ordunun içində təsir imkanları qalmaqdadır. Xüsusən də Qarabağdakı separtçı tör-töküntülərə təsir imkanları daha böyükdür. Ona görə də Mikael Arzumanyanın ətrafında qurulan şou təsadüfi deyil. Paralel olaraq revanşistlərin mitinq hazırlığı da bunun tərkib hissəsidir. Heç şübhəsiz, Rusiyadakı müəyyən dairələr də bu prosesin içindədir. Ona görə də Ermənistan hakimiyyəti bir sıra məsələlərin həllini yubadır”.
Partiya sədri hesab edir ki, qarşıdakı dövrdə Ermənistanda Qarabağla bağlı gərginlik arta bilər.
Vidadi ORDAHALLI
