Qarabağdakı sülhməramlıların fəaliyyəti Ermənistan Müdafiə Nazirliyindən koordinasiya olunur?..

Əhəd Məmmədli: “Əslində, həmin kontingent bütün addımlarını Azərbaycanla razılaşdırmalıdır”

img

Sentyabrın 9-da Ermənistanın müdafiə naziri Arşak Karapetyan Qarabağdakı Rusiya sülhməramlı kontingentinin yeni komandanı, general-mayor Mixail Kosobokovla və Ermənistandakı 102-ci Rusiya hərbi bazasının komandiri, polkovnik Dmitri Ovçarovla görüşüb.

Məlumatı Ermənistan Müdafiə Nazirliyinin mətbuat xidməti yayıb. Bildirilir ki, Karapetyan Kosobokovu Dağlıq Qarabağdakı sülhməramlı kontingentin komandanı təyin edilməsi münasibətilə təbrik edib və ona uğurlar arzulayıb. Nazir, habelə, Ovçarovu da hərbi bazanın komandiri təyin edilməsi münasibətilə təbrik edib. General Kosobokov bundan əvvəl Rusiyanın Cənub Hərbi Dairəsinin tərkibinə daxil olan 58-ci ordunun komandan müavini, habelə separatçı Abxaziya bölgəsindəki Rusiya hərbi bazasının komandiri (2015-2017-ci illər) olub. Xatırladaq ki, Qarabağdakı Rusiya sülhməramlı qüvvələrinin komandanı Rüstəm Muradovun missiyasını başa vurduğu ötən həftə açıqlanıb. Üstəlik, bu məlumatı Rusiya Müdafiə Nazirliyi deyil, Ermənistan Müdafiə Nazirliyi yayıb. Və Rüstəm Muradovun missiyasını başa vurması ilə əlaqədar müdafiə naziri Arşak Karapetyanla protokol görüşü haqda məlumat verilib. Daha sonra Rüstəm Muradov Ağdərədə saxlanılan azərbaycanlı əsgəri iki erməni hərbçisinə dəyişmək üçün Bakıya gəlib və geri qayıdıb. Amma onun Azərbaycan Müdafiə Nazirliyinin rəhbərliyi ilə vida görüşü barədə hər hansı məlumata rast gəlinməyib.

Bunun ardınca Ermənistan Müdafiə Nazirliyindəki mənbələr Rüstəm Muradovu Mixail Kosobokovun əvəzləyəcəyi haqda məlumatı sızdırıblar. Rusiya Müdafiə Nazirliyi yenə məlumatı şərh etməyib. İndi isə, göründüyü kimi, Kosobokov artıq İrəvandadır və Karapetyanla tanışlıq görüşü keçirir, amma onun təyinatı haqda Rusiya Müdafiə Nazirliyinin saytında hər hansı məlumat yer almır. Rusiya sülhməralıları ilə bağlı vacib məlumatları Ermənistan Müdafiə Nazirliyinin yayması belə qənaət yaradır ki, sanki Rusiya sülhməramlıları Moskvadan deyil, İrəvandan idarə olunur.

Politoloq Əhəd Məmmədli “Bakı-Xəbər”ə açıqlamasında bildirdi ki, bütün bunlar Rusiyanın növbəti məkrli oyunlarından xəbər verir: “Azərbaycanı qıcıqlandırmaq üçün bunları edir. Nə qədər Azərbaycan Türkiyə ilə yaxınlıq edirsə, onlar da bir o qədər Ermənistana dəstək verir. Mənə elə gəlir ki, fərdlərin yeri dəyişəndə mahiyyət dəyişmir. Rüstəm Muradovun vaxtında onlar erməniləri necə dəstəkləyirdilərsə, Kosobokovun zamanında da elə olacaq. Hətta deyərdim ki, Kosobokov erməniləri daha böyük provokasiyalara cəlb edə bilər. Çünki iki general arasında müəyyən fərqlər var. Biri döyüş generalıdır, digəri isə separatçılarla iş təcrübəsi olan hərbçidir. Kosobokovun Rusiyanın zorla ilhaq etdiyi Abxaziyada iş təcrübəsi var. Düzdür, oradakı kontingenti də Rusiya sülhməramlı adlandırır, ancaq qətiyyən bu mandata uyğun gələn bir fəaliyyət ortaya qoymayıblar. Qarabağa Rusiya sülhməramlıları razılıqla gəliblərsə, ora dəvətsiz müdaxilə ediblər. Yəqin ki, döyüş generalı mövqeyini möhkəmlədib, separatçılarla iş təcrübəsi olan generala verdi. Bundan sonra erməni separatçılarına daha təcrübəli generalın yardım edəcəyinin şahidi olacağıq. Ermənilər bu dəstəyi hiss edəndən sonra daha geniş provokasiyalara əl atacaqlar. Həm siyasi, həm də hərbi müstəvidə adekvat addımlar atmalıyıq. Azərbaycan hərbi meydana qayıda biləcəyi ilə bağlı ritorikanı bir az da artırmalıdır. İstər keçmiş, istərsə də yeni təyin olunan sülhməramlıların rəhbərlərinin Ermənistandan koordinasiya olunması bu şübhələrə yer qoymur. Əslində, həmin kontingent bütün addımlarını Azərbaycanla razılaşdırmalıdır. Hətta sülhməramlılara kimin rəhbər təyin edilməsi bizimlə razılaşdırılmalıdır. Çünki onlar missiyalarını bizim ərazimizdə həyata keçirirlər. Bizim qanunlara da tabe olmalıdırlar. Təəssüf ki, biz bunun əksini görürük. Rusiya ya özünü neytral arbitr kimi aparmalı, ya da meydanı tərk etməlidir”

Məhəmmədəli QƏRİBLİ

Son xəbərlər