Fransa azad olunan ərazilərin minalardan təmizlənməsi üçün Azərbaycana 400 000 avro bağışlayacaq. Bu barədə Fransanın Azərbaycandakı səfiri Zakari Qros öz “Twitter” hesabında yazıb: “Beynəlxalq əməkdaşlığa ehtiyac duyulan başqa bir sahə məcburi köçkünlərin öz torpaqlarına qayıda bilmələri üçün ərazilərin minalardan təmizlənməsidir. Qarabağda minalardan təmizlənməni tələb edən ərazilər çox böyükdür. Buna görə rəsmi olaraq ANAMA-ya bu məlumatı verməkdən məmnunam. Fransa ərazilərin minalardan təmizlənməsi üçün Azərbaycana 400 000 avro bağışlamaq niyyətindədir”.
Bundan öncə, sentyabrın 2-də Böyük Britaniya minalardan təmizləmə işlərində texniki dəstək məqsədilə BMT İnkişaf Proqramının həyata keçirəcəyi tədbirlərə dəstək olmaq üçün 500 000 funt sterlinq maliyyə yardımı ayırıb. ABŞ-ın Marşal İrsi İnstitutunun (Marshall Legacy Institute, MLI) prezidenti Perri Baltimor avqustun sonlarında Azərbaycanda olub. O, minaaxtaran itlərlə bağlı görülən işlərə dair müzakirələr aparıb və gələcək əməkdaşlıq əlaqələrini müzakirə edib. Razılaşmaya görə, ABŞ-ın Marşal İrsi İnstitutu Azərbaycana 30 minaaxtaran it təhvil verəcək. Bu itlərin 18-i Marşal İrsi İnstitutu tərəfindən donorlar hesabına maliyyəşdiriləcək. Artıq 10 minaaxtaran it Azərbaycana təhvil verilib.
ANAMA-nın məlumatına görə, 2005-ci ildən bügünədək Azərbaycanın minatəmizləmə proqramına ABŞ Dövlət Departamentinin və fərdi donorların dəstəyi ilə Marşal İrsi İnstitutu tərəfindən 50 baş minaaxtaran və partlayıcı axtaran it hədiyyə edilib.
Fransanın bu istiqamətdə etdiyi jest çox maraqlı görünür. Çünki həmin ölkə erməni diasporonun sıx olduğu ölkədir və daima ermənipərəst mövqeyilə seçilir. Fransanın bu yöndə atdığı addımı necə dəyərləndirmək olar?
Politoloq Elşən Mustafayev “Bakı-Xəbər”ə açıqlamasında bildirdi ki, minalarla bağlı vəziyyət həllə həllini tapmayıb: “Məlum olduğu kimi, Ermənistan uzun müddət işğal altında saxladığı əraziləri tam minalayıb. Azərbaycanın minalanmış sahələrin xəritəsinin verilməsi ilə bağlı tələbinə əməl etmir. Bu mövzunu alver predmetinə çevirib. Minalanmış ərazilərin xəritələrini erməni diversantları ilə dəyişir. Prezident İlham Əliyev çıxışlarından birində dedi ki, bizə təqdim olunan xəritələr dəqiq deyil. Yəni Ermənistan bu məsələdə də çığallıq edir. Postmüharibə dönəmində biz həmin minalardan ciddi ziyan görmüşük. Rəsmi məlumatlara görə, Ermənistan və Azərbaycan arasında 30 illik münaqişədə döyüş əməliyyatlarının dayandırılması ilə bağlı Azərbaycan, Ermənistan və Rusiya liderlərinin imzaladığı 2020-ci il 10 noyabr tarixli bəyanatdan bu il avqustun 11-dək həmin ərazilərdə minaya düşmələri nəticəsində 23 mülki şəxs həlak olub, 36 mülki şəxs isə müxtəlif dərəcəli bədən xəsarətləri alıb. Rəsmi statistikaya görə, ümumilikdə 2020-ci il də daxil olmaqla, Azərbaycanda 2439 nəfər müharibənin təhlükəli partlayıcı qalıqlarından zərər çəkib, onlardan 383 nəfər ölüb və 2056 nəfər yaralanıb. Azərbaycanın azad edilmiş ərazisində hazırda ermənilər yaşayan hissədə Rusiya Müdafiə Nazirliyi, azərbaycanıların yaşadığı hissədə isə Azərbaycan Minatəmizləmə Agentliyi, Azərbaycan, Rusiya və Türkiyə hərbi istehkamçıları minatəmizləmə işlərini həyata keçirir. Məlum olduğu kimi, bu artıq dünyaya səs salan problem həddinə çatıb. Buna görə də adlarını demokratik qoyan ölkələr simvolik olaraq bu sahəyə yardımlar etməklə öz imiclərini təmizləmək istəyirlər. Fransa ilə yanaşı, başqa ölkələr də belə yardım edib. 400 min avro Fransa kimi ölkə üçün olduqca az bir məbləğdir. Minalardan təmizlənməli olan ərazilərimiz həddən artıq genişdir və buna külli miqdarda vəsait lazımdır. Ən əsası isə, Ermənistan xəritələri təqdim etməlidir. Təəssüf ki, bunu etmir. Yaxşı olardı ki, Fransa Ermənistan qarşısında xəritələrin təqdim edilməsilə bağlı məsələ qaldıraydı. Niyə bunu etmir? Belə xırda jest heç də o demək deyil ki, Fransa ermənipərəst mövqeyindən əl çəkib. Sadəlövh olmamalıyıq. Fransanın Ermənistana və Qarabağdakı erməni separatçılarına etdiyi yardımın fonunda bu məbləğ olduqca kiçikdir”.
Məhəmmədəli QƏRİBLİ
