Sentyabrın 8-də Rusiya prezidenti Vladimir Putin və Avropa Şurasının sədri Şarl Mişel Qarabağda vəziyyətlə bağlı fikir mübadiləsi aparıblar. Bu barədə Ş.Mişel Tvitter hesabında yazıb.
Ş.Mişel Qarabağla bağlı bunları yazıb: “Ermənistan-Azərbaycan münaqişəsinin həlli perspektivlərinə baxış mübadiləsi aparılıb, dialoq və etimadın formalaşdırılması vacibdir”.
Bununla yanaşı, o qeyd edib ki, Əfqanıstan mövzusu və Belarus hökumətinin Avropa İttifaqı ölkələrinə qanunsuz miqrasiyaya xidmət edən qanunsuz hərəkətləri də müzakirə olunub.
Sözügedən telefon söhbətində diqqəti çəkən məqam odur ki, Şarl Mişel münaqişənin həlli perspektivindən danışır. Məgər münaqişə həll olunmayıb ki, Mişel bir də həll perspektivinə baxışlardan danışır?
“Bunu Avropa Şurasının sədri və Rusiya prezidenti çox yaxşı bilir”
Məsələyə münasibət bildirən millət vəkili, politoloq Elman Nəsirovun fikrincə, münaqişənin həll olunmadığını düşünmək doğru yanaşma deyil: “Rusiya prezidenti Vladimir Putin və Avropa Şurasının sədri Şarl Mişel apardıqları fikir mübadiləsində 3 məqam üzərində dayanıblar. Birincisi, Qarabağda etimad mühitinin yaradılması. İkincisi, Qarabağ məsələsi ilə bağlı dialoqun aparılması. Üçüncüsü, münaqişənin həlli perspektivləri. Ümumən, tərəflər arasında Qarabağla bağlı müzakirələrin aparılması özü-özlüyündə müsbət hadisə olsa da, amma burada diqqətdən yayınmayan bəzi məsələlər var. Xüsusən də Ş.Mişelin Qarabağ münaqişəsinin perspektivləri ilə bağlı fikirləri müəyyən düşüncələrə gəlməyə əsas verir. Birincisi, Qarabağ münaqişəsinin hansı perspektivini Ş.Mişel nəzərdə tutur? Qarabağ münaqişəsi öz həllini tapıb. Ali Baş Komandan, Prezident İlham Əliyev dəfələrlə çıxışlarında qeyd edib ki, münaqişə öz həllini tapıb. Bütün bunların nəticəsində yeni reallıqlar yaranıb və bunu qəbul etmək lazımdır. Azərbaycan bu münaqişəni həm hərb yolu ilə, həm də masa ətrafında həll etdi. O ki qaldı həllini gözləyən müəyyən məsələlərin müzakirəsinə, onlarla bağlı da Azərbaycanın qətiyyətli və prinsipial mövqeyi var. Bu, ilk növbədə böyük sülh sazişinin imzalanması ilə bağlıdır. Bu, Ermənistan və Azərbaycanın qarşılıqlı şəkildə bir-birinin ərazi bütövlüyünü, suverenliyini və sərhədlərinin toxunulmazlığını qəbul etməsi ilə bağlıdır. Xüsusən də bu, sərhədlərin delemitasiya və demarkasiya işlərinin başlanması ilə bağlıdır. Həmçinin, bu, ilk növbədə nəqliyyat-kommunikasiya xəttlərinin bərpası ilə bağlıdır. Bunların hər biri ilə bağlı Azərbaycanın dəyişməz və prinsipial mövqeyi var. Bütün bunları ölkənin ali siyasi rəhbərliyi hər zaman bəyan edib. Bunu Avropa Şurasının sədri və Rusiya prezidenti çox yaxşı bilir. Belə olan halda Qarabağ münaqişəsinin həlli perspektivləri barədə ümumi ifadələr əsasında danışmaq düzgün deyil. Ona görə ki, münaqişə həllini tapıb. Münaqişənin həllini tapmadığı iddiasında olan Ermənistandır. Bu səbəbdən eyni məntiqlə Ermənistan tərəfi tez-tez atəşkəsi pozur, təxribatlara əl atır. Bu minvalla belə rəy yaratmaq istəyir ki, guya münaqişə həllini tapmayıb. Əslində isə münaqişə öz həllini tapıb”.
Millət vəkili hesab edir ki, Ermənistan öz pozucu istəklərini reallaşdıra bilməyəcək.
Vidadi ORDAHALLI
